مصر موتورز مجتمع السيارات - احذروا التعامل مع بنزينه التعاون و total

اقتباس:

المشاركة الأصلية كتبت بواسطة crime (المشاركة 526376)

يا جماعه
بنزينه التعاولن وتوتال بيغشوا ف البنزين فعلا والموضوع ده زاد عن حده وناس كتيير اشتكت من الاتنين دول
ف ياريت محدش يتاعمل معاهم حفاظا على سيارته
ولو فيه اى حد اتعامل مع بنزينه اخرى واكتشف ان البنزين بتاعها مغشوش
يقول علشان الكل ياخد حذره
انا مش عارف الناس ديه ازاى بتستحل الغش وبتقبلوا على نفسها

شكرا يا باشا على نشر الموضوع ..... انا كمان متغاظ منهم قوي و مش باروحلهم غير مضطر ... علشان البنزين بتاعهم بيلخبط العربية و معاملتهم سيئة و كمان البقشيش بياخدوه "إجباري" من الفلوس .....
"و خصوصاً التعاون ... بس للأمانة مش كل محطاتهم"

و انا هاحكيلكم ازاي "إجباري" .... انا جنبي في العبور بنزينة التعاون و دي أسوأ بنزينة شفتها في التاريخ
دخلت البنزينة دي 4 مرات بس ...

أول مرة إديت للراجل جنيه بحاله فوق ثمن البنزين "زي ما انا متعود" ... و استنيت يجيبلي باقي 50 جنيه و انا حاطط 20 لتر بنزين 92 ، لقيته جايبلي 10جنيه بس ، يعني البيه واخد 4 جنيه بقشيش .... فمشيت و انا متغاظ

ثاني مره بعدها بإسبوعين .... عملت ناصح .... و اديته الـ 37 جنيه الأول و قولتله "20 لتر" لقيته حط بنزين ب 36 جنيه بس .... فمشيت و انا متغاظ أكتر

و ثالث مره بعد شهرين .... إضطريت أروحلهم تاني علشان اللمبة الحمراء كانت منوره .... و رايح و أنا مفقوع منهم و مستني الموضوع يتكرر علشان أعمل مشكلة و المرة دي "نزلت من العربية و وقفت جنب التانك" و بعد ما حط " بـ 30 جنيه بس زي ما طلبت منه" اديته الخمسين جنية و استنيت أشوف هايعمل إيه ..... و لأن "ديل الـ ...... عمره ما يتعدل" عمل نفس الحركة تاني و حط في ايدي 15 جنيه و ابتدى يديني الجنيهات الباقية واحده واحده و بعد كل جنيه يبصلي " كأني باشحت منه ... أو كأنه بيقولي كفاية كده ولا عايز تاني" لغاية ما بقى معايا 18 جنيه راح ساكت و بطل يحط الفلوس في ايدي ... فقلت أعمل مشكلة و عليت صوتي و قلتله فين الباقي قاللي هو مافيش حاجه لينا "شوف البجاحة" قولتله " لأ مافيش حاجة ليكم" خد الفكة دي كلها و اديني 20 جنيه صحيحة و أخدت الفلوس و مشيت و انا سايبة يبرطم و بصيت باحتقار ليهم كلهم و مشيت.

و رابع مره كان معايا واحد صاحبي بعربيته و هو اللي خلاني أروح معاه و بعدد ما هو حط بنزين و انا دخلت بعده قولت للراجل حطلي ب 20 جنيه بس و لما خلص اديته العشرين جنيه .... لقيته بصلي و قاللي " هو احنا كده خالصين؟ " ..... فبصراحه اتصدمت من الكلمة .... "هو فيه بجاحة و قلة أدب بالشكل ده" ..... قلتله "خالصين !!!! .... أيوه خالصين ... هو انت مديني فلوس و انا واكلها عليك قبل كده و لا انت حاططلي بنزين زيادة و انا عايز أضحك عليك" .... فين المدير بتاع المحطة ... و ابتديت أزعق لغاية ما اتلم كل اللي في المحطه علينا و انا راسي و ألف سيف لازم يجيلي المدير .... لغاية ما رد عليا واحد منهم بكل برود و قاللي " المدير مش موجود" ... فقلتلهم انا بقى هاعمل فيكم شكوى في الوزارة و في ادارة الشركة بتاعتكم ... و من يومها و انا نفسي أعرف طريق إدارتهم علشان أعمل شكوى فيهم و مش لاقي حد يدلني عليها.

حد يعرف مكانهم أو وسيلة الاتصال بالوزارة ؟؟؟؟؟؟؟