مصر موتورز مجتمع السيارات - انا لسا جايب عربية 128 موديل 75

اقتباس:

المشاركة الأصلية كتبت بواسطة sayed2077 (المشاركة 502036)

بص يا اخى الفاضل
اولا مبروك على العربية
ثانيا انا اول ما جبت ال 128
عملت الاتى
1:وديتها لميكانيكى عمل الاتى(تغير سير كاتينة و تغير زيت موتور و تذويد زيت فتيس و تذويد زيت فرامل و تغير بوجيهات و تغير فلاتر كاملة هواء و بنزين و زيت وطبعا فحص على الفرامل و تغير التالف ان وجد وتشحيم جميع اجزاء العربية و عمل فحص على اى شىء اخر )

2:وديتها لكهربائى عمل الاتى (فحص دورة البنزين تنظيف الكربورتير و الاسبرتير و ظبطهم بحيث العربية تدور من المفتاح فقط بدون الضغط على البنزين و عمل فحص على انوار العربية كاملة و اى شىء عموما يخص كهرباء العربية)

3:وديتها لعفشجى عمل ترصيص وظبط زاوايا وربط عفشة كاملة وعمل الكشف عليها وتغير ما يلزم ولو انت شاكك انك لسه جديد فى السواقة وممكن ما تخدش بالك من الطريق وتاكل مطبات بسرعة فخلى بالك ان ده بيفتح الشاسية بس الكلام ده لو العربية مش نضيفة بس لو هيا نضيفة مش بتفرق قوى مثال مثلا خدت مطب جامد اوى ولقيت بعده العربية بتحدف يمين شمال يبقى اعرف ان فيه حاجة حصلت للشاسية فممكن العفشجى لو لقى الشاسية ضعيف عموما والعربية حالتها مش ولا بد و من اول مطب الشاسية هيفتح منك فخلية يظبطهولك انه بيركب شدادات للشاسية بحيث الشاسية ميفتحش منك .
و طبعا بقى فحص الكبالن و المساعدين والاطارات لو واحد متاكل او كدة هات واحد بدالة ونصيحة منى هات اطارات عريضة وليس رفيعة علشان هيفرق معاك فى الثبات بعد سرعة ال 80 لما فوق

والاهم من ده كلة لو ملكش اوى فى حوار العربيات ده فلازم لازم لازم لازم تشوف واحد صحبك او قريبك او حبيبك ليه فى العربيات وتديلة العربية وهو يعملك كل الكلام ده حتى لا تقع فريسة للناس اللى هتتعامل معاهم فى تظبيت السيارة وطبعا تبقى واثق ان هو مش هيعمل عليك شغل ولو حاسس انه هيعمل عليك شغل يبقى روح معاه فى كل حتة وابقى ظبطة فى الاخر ب 100 جنية ولا حاجة كده

اه حاجة تانية كنت هنساها لما تجي العربية لو التابلوة لما بتشغل الوضع اليلى فى العربية مفيهوش نور ركبله نور عند الكهربائى لو العداد بيخرف و مش بيدى سرعة مظبوطة اظبطة عند الكهربائى و طبعا لو مفيهاش كاسيت ركبلها جى ام ابو فلاشة وراديو وهات لها فلاشة 8 جيجا وحط عليها اللى انت عاوزه وشوية دباديب ولعب وشخاليل والشغل ده

طبعا الحكاية ديه هتصرف معاك جامد شوية بس صدقنى هتكون ظبت العربية مره واحده و مش هتحس بتعب بعد كده ونصيحة كل شهر تروح عند كهربائى وكنيكى يعملوا الفحص اللازم للعربية وتروح كل شهرين لعفشجى يعملك ترصيص وظبط زوايا وتربيط عفشة وطول ما ايدك فى العربية هتبقى كانك راكب BMW لو بقيت من الناس اللى بتقول خاليها شغالة لغاية ما الحاجة تبوظ هتتعب و هتعمل معاك مواقف قلة اصل اه ونسيت حاجه تانية خلى الكهربائى يعملك مفتاح علشان ال 128 الفيوزات بتاعتها بتضرب كل شوية لو محمل عليها جامد و بالتالى ممكن فيوز المروحه بتاع دايرة التبريد يبوظ فالمروحة متشتغلش و العربية تسخن لا قدر الله فخلى الكهربائى يعملك مفتاح للمروحة بحيث لو الفيوز باظ ولقيت المروحة مش بتشتغل و العربية بتسخن منك فتقوم انت تشد المفتاح والمروحة تشتغل وتسيبة لغاية ما تروح للكهربائى ونصيحة شوف انهى فيوز عليه حمل جامد وخلى الكهربائى يحطلك فيوز كبير مثلا 30 امبير و الزيت يفضل تجيب زيت كالتكس ب 55 جنية العلبة و طبعا تعمل فحص عند الكهربائى على البطارية والدينمو
وهذا ما اتذكر

وارجو منك فقط ان تدعو الله لى ان يغفر لى ويهدينى و يوفقنى فى دراستى و ان تدعو لى و لوالداى و المؤمنين و المؤمنات الاحياء منهم والاموات
و
سبحان الله وبحمده سبحان الله العظيم
و
السلام عليكم ورحمة الله وبركاته

اخوك فى الله سيد

ربنا يباركلك و يبارك فيك و يغفرلك و يغفر لكل المسلمين ذنوبك ان شاء الله و شكرا جزيلا على الكلام الرائع دة وانا انهاردة لسا كنت ججاى من عند العفشجى و ظبطها كلها و عمل اللازم و روحت نظفت الحوض و غسلتة و غيرت الزيوت و فلتر الزيت بس بعد اما غسلة لقيت مفتاح الكوناكت السلك بتاعة بيعلق لسا هروح للكهربائى و بتاع الردياتير عشان مخروم عندى و لبتاع الابواب عشان يظبطها و مش تطلع صوت و شكرا على كلامك الرائع