مصر موتورز مجتمع السيارات - أيه رأيكم أفيو ولا لانوس ولا جين تو ولا أسبرانزا ؟

بص يا باشا انا هضيف حاجة للكلام اللى الاعضاء المحترمين قالولك عليه وهو انك لازم تحط فى مقارنتك دى ان العربية اللى انت عاوزها تكون :- 1 - شبابية ام عائلية . 2 - سعر اعادة البيع . 3 - اسعار قطع الغيار وتوافرها . 4 - التوكيل وما ادراك ما التوكيل . 5 -استهلاك البنزين . 6 - سهولة تصليحها بعيدا عن التوكيل فى حالة لا قدر الله حصل مشكله فى الميكانيكا او الكهرباء . 7 - الميزانية المخصصة لشراء السيارة .( لانك بتحاول تقارن بين سيارات متفاوتة كثيرا فى اسعارها من 70000 الى 86000 . وهنا هقولك على شوية حاجات كده عن كل عربية حسب معلوماتى المتواضعة عنهم وطبعا الحاجات دى انا عرفت اكثرها من المنتدى هنا وشوية تانية من الصنايعية ومن ملاك هذه السارات وتقدر تدخل على كل قسم وتتاكد . اولا اللانوس :- هى 128 مصر الكورية بص حواليك هتلاقيها منتشرة زى الرز وقطع غيار متوفرة وصيانة سهلة واعادة بيع ممتاز وسريع شبابية عائلية وفيها تعديلات كتير وسهلة بس يعيبها هو الشكل اللى متغيرش من اول موديلاتها 1999 وانا ارشحهالك بقوة . ثانيا الافيو :- هى هى اللانوس من ناحية الموتور والاختلاف فى الصالون ( اوسع واشيك ) والشكل الخارجى ( يعنى انت وذوقك ) ولكن هو بيعجبنى اكتر من اللانوس ولكن قطع الغيار بخلاف الموتور اغلى من اللانوس والثبات فى صالح اللانوس وفيها مشكلة ( كذا واحد من ملاكها اشتكى منها ) وهى عداد RPM بيهيس .ومتهيالى ان صاج اللانوس اقوى من صاج الافيو. واما الجين 2 :- فهى عربية جميلة جدا وشبابية ( ليست عائلية ) وجراية وثبات مفيش بعد كده وقوية ولكن يعيبها خامات رديئة من الداخل وضيقة جدا من الخلف ( عشان كده مش عائلية ) وسعر اعادة البيع ( ضاااااااااايع ) وكمان التوكيل من اسوا ما يكون واسعار قطع الغيار غالية . واما الاسبيرانزا :- فدى بقه يا سيدى زى البطيخة انت وحظك وعموما هو الصينى كله كده مع ان هى فيها كل الامكانيات اللى انت عاوزها فى عربية ولكن الخوف من البطيخة .يعنى هتلاقى حد بيمدح فيها وهتلاقى حد تانى بيلعنها . مع انها عائلية وشبابية وقوية وامكانيات مهوولة ( كعادة الصينى ) ولكن صينى والتوكيل برده سيء . وبالتالى يكون الترتيب بناء على سابق كلامى ومن وجهة نظرى المتواضعة كالتالى :- لو انت عاوز عربية عائلية و شبابية وقطع غيار متوفرة فى كل حتة وباسعار رخيصة واعادة بيع ممتازة واعتمادية هايلة واى حد يشتغل فيها وسعرها فى حدود 72000 جنيه يبقى عليك وعلى اللانوس وممكن تبص على الفيرنا كمان والبى واى دى ثم الافيو ثم الاسبيرانزا ثم الجين 2 . وياريت محدش ينسى ان دى وجهة نظرى الشخصية وانا عاوز اساعدك وفى النهاية القرار ليك .