مصر موتورز مجتمع السيارات - شباب ضرورى اللى فاهم سيارات يقولى ده ايه

بص يا باشا
علشان الميكانيكية ميلعبوش كثير
إختار ميكانيكى ثقه و متسيبش نفسك ليه برضه
قوله إعمل , و هو يعمل, مش هو إللى يفتح لنفسه الشغل
- الأسهل فى التنتيش ده , الكشف على البوجيهات زى ما مستر أسترا قالك
فك البوجيهات و شوف السن بتاعها؟ عليه كربون و لا زيت و لا متآكل و لا ؟؟؟؟؟ صور البوجيه و إرفع لنا الصور و هنرد عليك إن شاء الله بالمفيد.
- الخطوة إللى بعدها نضافة الكربراتير و البكات بتاعته, و تنظيف فلتر الهواء بالكمبروسر (هواء مضغوط) و تغيير فلتر البنزين.
(الكلام ده كله مش هيكلفك أكثر من20- 25 ج شامل شراء الفلتر و مصنعية التنضيف)
- الخطوة الأخيرة: تغيير مشط الإسبراتير, لأنه فعلاً ممكن يكون السبب.

موضوع الشنبر ده ليه دلائل و متصدقش الميكانيكى لما يقولك شنبر (عاوز يشتغل)
تعرف الشنبر من الآتى:
- فيه دخان أبيض من الشكمان (أو خرطوم الفايظ)
- سن البوجيهات عليها زيت
- العربية بتاكل زيت (يعنى محتاج كل شويه تزود زيت)
- سحب العربية مش حلو
(لازم الأسباب دى كلها مجتمعه, مش سبب واحد)

لو لا قدر الله فعلاً ده الوضع, يبقى تعمل طقم شنبر بشرط توافر 3 أشياء:
1- ميكانيكى خبرة (يعنى أشتغل فى المواتير و عمل 1000 عمرة للبرايد قبل كده مش لسه هيجرب فيك)
2- قطع غيار نوعها كويس (طبعاً كله مضروب بس أفضل أنواع الشنابر البرازيلى و يكون عليه ختم (دمغة) فى الشنبر زى بتاعة الدهب بالضبط)
3- فترة تليين كويسه و مراعاة الحرارة
يعنى متستعجلش و تجرى بالعربية قبل ما تحرق صفحيتين-ثلاث صفائح بنزين عالواقف, و تتابع الحرارة لو الموتور سخن, توقف العربية شويه علشان تبرد.

و بإذن الله مش هتحتاج للكلام ده