مصر موتورز مجتمع السيارات - ضبط الكهربا و الكربراتير ... أيهما أولاً

مصر موتورز مجتمع السيارات (https://www.masrmotors.com/vb/index.php)

- ميكانيكا السيارة (https://www.masrmotors.com/vb/forumdisplay.php?f=148)

- - ضبط الكهربا و الكربراتير ... أيهما أولاً (https://www.masrmotors.com/vb/showthread.php?t=113138)

رد: ضبط الكهربا و الكربراتير ... أيهما أولاً

فهمت الجزء بتاع الأبلاتين إزاى يتعمل, هأحاول إن شاء الله أجيب فيللر و أضبطه على الركب العليا على 50

معلش يا جماعة أستفسار بسيط
أنا عملت زى طريقة مستر أسترا فى ضبط الكهربا
http://masrmotors.com/vb/showthread.php?t=53203

اقتباس:

- فك البوجية رقم ( 1 ) الامامى واغلق فتحة الوجية بصباعك الكبير وخلى حد يديلك سنة مرش متقطعة ( تك....تك...تك) لغاية اما تحس بضغط خارج من فوهه فتحة البوجية
2- هات مفك رفيع ودخلة على راس البستم
3- ادى العربية الرابع وزقها فى اتجاة الامام الى ان تصل باقصى ارتفاع للمفك ودى اهم نقطة فى الموضوع لازززززززززززم المفك يكون فى اقصى ارتفاع لة

فى النقطة الثانية: أدخل المفك فين فى المحرك علشان يكون على رآس البستم؟
من فتحة أول بوجية إللى أنا فكيته؟ طيب الفتحة تعتبر قطرها صغير بالنسبة للشوط الكامل للبستم, يعنى هل المفك هيتحرك براحته و لا ممكن لاقدر الله يتقطم جوه و تبقى حوسه؟ - ربنا يستر.

طيب فى طريقة الزونبه إللى على طنبورة الكرنك مع الشرطة إللى على سير التقسيمه
هل اللادا فيها الكلام ده؟ أصل أنا مش واخد بالى من الشرطه و الزونبه .

معلش بأرخم عليكم بس عاوز أفهم و أتعلم الضبط الصح إزاى؟

رد: ضبط الكهربا و الكربراتير ... أيهما أولاً

جزاكم الله خيرا
معلش تاعبكم معايا بس بجد نفسى أضبتها

إمبارح رحت للميكانيكى
أعاد تقسيم الكهربا و ضبط مسامير الهوا و البنزين فى الكربراتير و ضبط مقاس الفيللر للأبلاتين و نضف البوجيهات و ضبطها بالفيللر

النهارده طلعت عالشغل من الأوتوستراد علشان أجرب
- العربية مش ناعمه, يعنى بتبرجل خاصة لما أهّدى عند أى مطب و بأحس إنها هتبطل
- فى رعشه متقطعه فى المكنه
- الـ RPM بيعلا (و صوت المكنه) و بيشبّع الغيار بدرى, يعنى بأحس إن الغيار الثانى مثلاً جاب آخرة قبل ما أوصل لـ 40 كم, و الـ RPM يبقى عالى, فأضطر أنقل للى بعده
- أول ما أنقل لأى غيار بأسمع صوت تسقيف عالى للمكنه
- صوت الموتور عالى عن الأول (مع العلم أن صوت اللادا أصلاً عالى بس الصوت ده مش طبيعى)
- آخرها 100 كم/س و بعد كده إسمع الموتور بيشتم و يسبّ.

- أنا راجعت على مسمار الهوا فى الكربراتير (3 لفات إلا ربع), و البنزين (بعد ما قفلته و المكنه برجلت و هتبطل , رحت فاتحه بمقدار لفه كامله)
- الكربراتير لسه منضفه بأبرو, و التانك بحاول دايماً ميقلش عن النص
- حاسس إن العيب فى الكهربا بس مش عارف منين.

عاوز طريقة ضبطها عالشعرة

رد: ضبط الكهربا و الكربراتير ... أيهما أولاً

اللى حضرتك بتقوله ده اعراض تلف جوان وش السلندر :sycho26:

رد: ضبط الكهربا و الكربراتير ... أيهما أولاً

لا إله إلا الله, سترك يا رب
يا أستاذ هشام , موضوعك عن جوان الوش بيقول فيه نفخ فى القربه و الريداتير و إختلاط الماء بالزيت و عمل لون طحينى.
الحمد لله مفيش عندى الأعراض دى. بس أنا عندى مشكله فى ضبط الكهربا و مش عارف أضبطها.

رد: ضبط الكهربا و الكربراتير ... أيهما أولاً

اقتباس:

المشاركة الأصلية كتبت بواسطة zing0 (المشاركة 882373)

لا إله إلا الله, سترك يا رب
يا أستاذ هشام , موضوعك عن جوان الوش بيقول فيه نفخ فى القربه و الريداتير و إختلاط الماء بالزيت و عمل لون طحينى.
الحمد لله مفيش عندى الأعراض دى. بس أنا عندى مشكله فى ضبط الكهربا و مش عارف أضبطها.

لأ انت مركزتش فى الموضوع كويس
هو البداية ان العربية مكانتش بتتظبط كويس وعملت نفس اللى بيحصل معاك بالظبط
وموضع الطحينة ده حوار تانى المشكلة فى تسريب من الجوان من عند غرف الحريق مش الزيت انا مجيبتش سيرة طحين

موضوع الجوان ده بيبقى تراكمى الأول مش عاوزة تتظبط وآخرا تنفخ من غرف الحريق
على حسب الجوان ما بيضرب ونتا وحظك
وربنا يسترها مع الجميع بإذن الله