المشاركة الأصلية كتبت بواسطة thesward_6000 (المشاركة 660342)

بص يابوب صلى عالنبى
الفكره انت هاتاجرها لمين محل ولا شركه سياحه ولا شركه بترول ولا شركه مقاولات ولا مين
وخد بقى التفاصيل واحده واحده وعلى رواقه

هاتاجرها لواحد عندك خيارتين
الخياره الاولانيه بسواق وهايبقى انت يبقى اشطه مفيهاش مشاكل او حد من طرفك وبرضه اشطه لانك هاتبقى شايف كل حاجه فيها ومتابعها
الخياره التانيه : من غير سواق وساعتها بتاع المكتب هيطلعها لكل من هب ودب وساعتها العربيه هاتجيبلك سليمه بس الماتور مع عدد مرات الايجار هايروح ف داهيه لانهم بيخمسو بيها ولو حصل حاجه فيها بيداروها والكلام ده والرينو عموما عربيه حريمى ومش اى ميكانيكى بيعرف يلعب فيها او يصلحها وبالتالى هاتتعب ف الحوار ده

تانى حاجه الشركات بقى
الشركات ديه بتفرق من شركه للتانيه يعنى لو سياحه يبقى العربيه هاتتدلع حته امريكى على حته اسبانى على حته ايطالى فى الحنين وبتطلع ساعتها اى عربيه من رينج 3500 لغايه فوووق بقى على حسن نوع العربيه بس انت هاتبدا ب3600 بالسواق طبعهاا او 3800 بالظبط لان السواق 1800 والعربيه 2000 وممكن يزيدو كل واحده وشطارته
بس اهم حاجه ان فى شركات نظيفه جدا جدا جدا بتعمل الزيت والبنزين واى خبطه عليهم وف شركات تانيه بتلبس صاحب العربيه ف الحوار ده ودول اغلبهم شركات نجمتين واقلب انما شركه سياحه تقيله كل حاجه عليها

البترول بيودو الصحرا والعربيه هاتبوظ مساعدين بس هم ممكن يصلحوها لو شركه نضيفه برضه

المقاولات فى اى حته خلقها ربنا لانهم ماشين بمبدا سنحيا فى اى نحيه تبع عمرو موسى ودول بقى ممكن مره ف بلطيم وممكن مره ف الساحل ومره فى الدويقه مبدا ارزقنا يارب يعنى

الفكره انك لما تاجرها اجرها وخلى حد من قرايبك هو السواق اهو انت تسفيد وقريبك يستفيد وتبقى مش خايف عليها
ولما تختار شركه اختار شركه نضيفه واقرا العقد واتكلم ف بنوده ومين هايشيل ايه ومين مش هايشيل ايه
وابقى شوف راس مال الشركه كام وليها ويب سايت ولا لا فاتحه كام شاليه وفاتحه كام بيت وافلست قبل كده ولا لا والحوارات ديه لان الشركات ديه الفلوس ف الاخر مش ف الاول وده عيبه يانجم بس اشطه مبدا حقك وحقى

عاشر نصيحه هانصحالك ماتاجرش العربيه لحد خاااااااااالص وخليها تحت ايدك عشان يوم ماتحتاجها تلاقيها
ولو حصل واجرتها ابعد عن المكاتب لو هايطلعها لواحد من غير سواق

شكراا والسلام عليكم