مصر موتورز مجتمع السيارات

نكمل رغم نوم مجموعة المشجعين
حكايات تيك اواى
1__مرة روحت اركب لدمياط من عبود ولقيت عربية بيجو سواقها بينادى دمياط / دمياط
وروحت له فقال انت لو حدك فقلت اه فقال روح العربية اللى هناك دى ولما سالت سواق العربية التانية فقال اصل الراجل ده بيركب حريم بس (قالها كده ) فقلت اشمعنى قال بعيد عنك راجل كبير وبايظ رغم انه جد وفعلا اخدت بالى انها كلها كانت بنات صغيرين وهو كان راجل كبير ولابس قميص مشجر
2__ مرة جاى من دمياط (فعلا سواقين دمياط دول اعجب سواقين ) والسواق اول م دور ومشى مش يشغل قرأن بداية الرحلة زى كل الدنيا م بتعمل
لا
راح مشغل اغنية لوردة اللى بتقول فيها دول كل يوم قاعدين ف بيتنا ويطلعو يجيبو ف سيرتنا المهم الاغنية خلصت راح عايدها تانى وخلصت وشغلها تانى
واحد من الركاب قال له هو مفيش غيرها وواحد تانى قال م تشغل قرآن ياعم ده احنا على طريق
لقيت السواق وقف وركن وقال والله اللى م هيسكت هرجع دمياط تانى
وانا بصراحة اتفلقت فقلت / يانهار أبوك اسود انت عايز ترجع دمياط بعد م وصلنا بطرة (بلد بعد شربين) وانت جاى من هناك يعنى كنا طالعين من ساعة تقريبا لسه هيرد عليا ولقيت شغل المطيباتية بدأ بتاع المصريين معلش يااسطى اصل دماغنا واجعانا ومشى وراح مشغلها تانى فحلفت عليه لو م طفى التسجيل لاوقفه ف كمين المنصورة وهيبقى نهار ابوه ازرق ومش هنروح الليلة دى فقفله لحد مصر
3__ مرة راكب من المنصورة وكان السواق بيدور على زبون واحد علشان يمشى وواقف بقى له اكتر من ساعتين وظهرت انا و زى ميكون لقى لقية وقال بلهفة / تعالى ياراجل انت فين ونتش منى الشنطة قبل م اغير رايى ورماها فى العربية من ورا وقبل م اركب سالته فى تدخين فى العربية والا ممنوع فقال ممنوع التدخين فركبت
المهم وصلنا كفر شكر ولقيت واحد قال اعمل معروف عايزين نشرب سيجارة اقف فى اى حتة
واول م ركن فوجئت ب12 واحد من ال14 نزلو يدخنو فواحد قاعد جنبى قال لى /شوف انت معذب كام واحد ياقلبك القاسى وضحكنا
4_ لازلنا فى دمياط وكان اخر يوم فى المصيف كان يوم خميس والسبت كان اول يوم المدارس وكله راجع ومفيش عربيات
ووقفنا منتظرين وجات عربية ميكروباس ونظرا لان 99% من سائقى الميكروباس مرضى بالسادية (التلذذ بتعذيب الأخرين ) فقفل باب العربية وقال العربية مش طالعة وطبعا قعدو الركاب يحايلو فيه شوية وانا فى قمة الغيظ فقال طب هريح شوية وفضل قافل باب العربية والناس واقفة متغاظة وهتتفرس وده ولا على باله وقعد على القهوة وشرب شاى واكل ولمع الجزمة وشرب شيشة فبقول له انت ناوى تسافر والا عاجبك شكل الناس وهما واقفين كده فقال خلاص هقوم وقام فتح باب العربية ورجع لورا فوقفت ادام مكانى وانا قاعد على القهوة جنبه فقمت وركبت بقوة الدفع طبعا لان الناس كانت بتضرب بعض على الركوب بعد م ركبنا جه وبص علينا وبيتفرج علينا زى ميكون رئيس مباحث واحنا مجرمين بيتفرج علينا ولقيته بيقول (ولا رئيس مباحث الزيتون والله )/ انت ايوه انت وشاور على واحد وقال له تعالى انزل فساله ليه فقال معاك شنطة تقيلة وراح نادى على واحد تانى وقال انت انت ايوه انت تعالى فساله فى ايه فقال انزل /انت مليان شوية وراح منادى 2 رفيعين وركبهم ولاجل الحق اللى نزلو معترضوش لكن انا العرق الصعيدى نقح عليا/ فقلت له / هما الناس دول نزلو ليه فقال وزنهم تقيل فقلت ليه هيا عربية بلاستيك والا ايه وال انت محنيها فبص وقال/ مين بيتكلم فقلت / انا ايه ناوى تنزلنى والا ايه فقال بخبث بتوع الميكروباس لانه شايفنى متحفز وشافنى فى الموقف كتير قبل كده / بلاش انت احنا زمايل القهوة وقلبها هزار
5__ كنت فى المنصورة وركبت الميكروباس وشغل الكاسيت بصوت عااااااالى جدا ولم يعترض احد وانا كنت قاعد ورا فبقول له وطى التسجيل فقال انا حر هو انا جايبه ليك انت هو انت علشان ال7 جنيه (الاجرة وقتها معرفش كام دلوقت )بتوعك هتقرفنى وانا مسكتتش وقلت له طيب لو انت راااااااااااجل خليك مشغل التسجيل وانا حافظ جميع كماين الطريق لحد مصر وهخرب بيت ابوك لان الكاسيت ممنوع قانونا ( انا خبطتها كده)وخاف وشغله بصوت واطى لحد م عدينا كفر شكر فقلت له فى كمين واقف فى طوخ ولما اقوللك حافظ كماين الطريق تتلم فقفله واشترى دماغه
6__مرة لقيت قلم مرمى على محطة بنها ونظرا لانى اشتغلت فى تجارة الادوات الكتابية فترة فاناعارف قيمة القلم ده وهو ماركته اسمها يونى بول قلم بلاستيك بس غالى يوصل تمنه الى 8 جنيه فروحت لناظر المحطة وبديهوله فقال الميكروفون اهو واعلن عنه فاعلنت عنه فى الميكروفون
وكانت المفاجأة
زبون غتت فى بنها كنت هارب منه سمع صوتى فى الميكروفون دخل المحطة لقانى واحرجنى اخر احراج وبقى يقول /انت بتهرب منى ليه انا هلتزم وهدفع كويس دى كانت ظروف وانا بقيت كويس
واناعرقااااااان فى عز الشتا ووشى احمر ومش عارف اقول له ايه
7_ نرجع دمياط
مرة راكب من دمياط للمنصورة ومعظم صنايعية النجارة فى دمياط واصحاب الورش الصغيرة من قرى المنصورة وماحولها او من المنصورة نفسها
وفى يوم لقيت راكب بيتكلم باللهجة الدمياطى اللى هيا زى لهجة بورسعيد وبيقول
انا دخلت على وكيل النيابة وبيقول لى ضربته فقلت ايوه ياباشا بقول له ناولنى كوباية الشاى ولقيته بيفكر روحت ماسك القمطة (الامطة ) وضربته ف وشه اخد 7 غرز
فزميله بيقول / وحصل ايه فقال اخدت براءة ياجدع مهو وكيل النيابة عارف قلة الأدب بتاعة العيال ديه
فانا بينى وبينكم مرارتى اتفقعت ( لان دى حتة ابو العربى بتاع الفيلم بجد يعنى)
ولسه هخش عليه وفكرت بعقل شوية وقلت فى بالى موضوع مش مهم وواحد بيفشر على واحد خلاص هما احرار مع بعض كدب ميضرش حد