مصر موتورز مجتمع السيارات - عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

مصر موتورز مجتمع السيارات (https://www.masrmotors.com/vb/index.php)

- تعديل السيارات العــام (https://www.masrmotors.com/vb/forumdisplay.php?f=5)

رد: عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

اقتباس:

المشاركة الأصلية كتبت بواسطة ahmed-casper (المشاركة 293860)

بمناسبه الجنوط انا عندى مقاس ١٤/٦٠/١٨٥ و عايز اجيب اعرض اجيب مقاس كام؟ و المقاسات دى ازاى اعرفها او معناها ايه؟ و سؤال كمان فى التعديل .. النور اللى بيركب تحت العربيه عباره عن ايه و بيركب ازاى و بيتكلف كام؟معلش متعب انا

بص ياكبير, 14 دى معناها مقاس الجنط اللى عندك 14 بوصة, , ال185 دى هى عرض سطح الأطار اللى هيركب على الجنط من الشفة للشفة المقابلة ليها بالملى (اللى هى المقطع اللى شبه ال U من الأطار:)), 60 ده البروفايل بتاع الأطار (الكاوتش) اللى هو أرتفاع الكاوتش عن الجنط نفسه, ودى نسبة من عرض الكاوتش, يعنى الرقم الحقيقى = 60% من 185 = 111

يعنى مساحة الكاوتش الملامسة للأرض = المساحة الكلية 185 - البروفايل 111= 74 ملى فقط

دلوقتى لنفترض أن حضرتك عايز تعرض الكاوتش فقط علشان الثبات من غير ماتغير حجم الجنط ال 14 , من الموقع هنستنتج الأتى

ممكن تجيب 220/50/14, أو 200/55/14, والأحتمالات كتير.

مساحة الكاوتش الملامسة للأرض هتبقى 110ملى للأول, و 90 ملى للتانى

لو عايز تجيب 15 ممكن التالى

220/45/15, أو 195/50/15, وبرضه الأحتمالات كتير, بس دول أنسب أتنين لأطار أعرض خاصة ال 220 هيبقى عريض عن الأول كتير لأن البروفايل 45% بس والأول كان 60%

لو 16

215/40/16 هيبقى كويس جدا

فحضرتك بتدور على أيه بالظبط, عايز جنط يديك ثبات عالى, ولا جنط شكله حلو وكويس ويديك ثبات برضه مع التضحية بالراحة جوه العربية, ولا جنط يديك راحة نسبية وشكل كويس.

مساحة الأطار الملامسة للأرض اللى بنحسبها, دى هتأثر فى حاجتين لو زودناها, هتخلى العربية أثبت وتحسن قدرتها على الفرملة والتسارع, بس هتحس بالطريق أكثر من الأول لأنك زودت مساحة الأطار, فالزلطة اللى كنت بتعدى من جنبها هتعدى من عليها وبالتالى هتحس بيها, ده غير أنك هتبقى ماشى على مساحة أكبر من الشارع بمرتفعاته ومنخفضاته عن الأول .

وضيف على ده أن أرتفاع الكاوتش من الجنب قل, بالتالى مش هيمتص المطبات زى الأول, وهينقل تفاصيل الطريق ليك أكثر.

معلش أنا اللى تاعبك معايا ومدوخك, بس قل لى أنت عايز ثبات وراحة لا بأس بها, ولا شكل كويس وراحة لابأس بها, ولا ثبات عالى وشكل حلو ومش مهم الراحة.

والأهم أنت عايز جنط مقاسه أيه:)؟

رد: عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

ومعلش النور اللى بيركب تحت العربية أسمه under car neon وده زى أسمه مابيقول, لمض نيون بتتركب تحت العربية, أو شرايط ليدات اللى هى شريط
من اللمض الصغيرة.

دول بيتركبوا تحت العتب بمسامير أو لصق, وبيتوصلوا على كهرباء العربية بمفتاح أو مع النور الواطى, وبتتباع الكيت كلها على بعضها فى المحلات الكبيرة بتاعة التعديل بأسعار تتراوح فى رينج 500 جنيه.

فيه ناس بتجيب شريط الليدات ده بأقل من 10 جنيه للواحد وبيلزق مثلا 4 أو أكثر واحد فى كل جنب, وبيوصلهم عند كهربائى, والموضوع بيتكلف أقل من 100 جنيه, مشكلته العربية هتبقى فى الغالب شكلها عامل زى التاكسى.

وخلى بالك اللمض النيون اللى فى الكيت غير اللمض العادية تماما, وبتبقى مقاومة للأرتطامات وكده ومش هتتكسر بسهوله

أنظر الصفحة التالية وهتعجبك جدا

http://www.urban-neon-car-lights.com...erbody-lights/

رد: عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

يا باشا اذا كان على اللى عاوزه انا عاوز راحه و ثبات و كله بس أكيد دى معاله صعبه بس انا نفسى فى ثبات و شكل و الراحه هى كده كده معدومه تقريبا فى شوارعنا ..بس انا اللى يهمنى يا باشا انى احط حاجه توفرلى كل ده و الاهم انها ولا تأثر على الاداء ولا العفشه و دى هم اهم حاجه

رد: عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

اقتباس:

المشاركة الأصلية كتبت بواسطة Injection (المشاركة 292812)

هيا بنا نلعب:)

مبدأيا لكل الرجالة اللى بتستفسر عن الجنوط, المشكلة الوحيدة اللأساسية فى تغيير الجنوط أنك لو جبت جنط أكبر من الأصلى فى القطر, عداد السرعة هيهيس ومش هيقرأ السرعة صح, علشان كده بتجيب جنط قطره الكلى (يعنى قطر الجنط بالكاوتش) نفس قطر الجنط والكاوتش القديم.

بمعنى لو بصيت على الجنط بتاعك, ولنفترض أنه 13, هتلاقى الكاوتش لوحده أرتفاعه عن الجنط عالى, أنت بتحاول تجيب جنط يركب عليه كاوتش يبقوا الأثنين فى حدود الأرتفاع القديم للعجلة (الجنط والكاوتش).

وغير القطر, مساحة سطح الأطار بتأثر على أحساسك بالطريق, يعنى الجنط الأكبر هيبقى الكاوتش بتاعه ملامس للأرض أكثر, وهيحسسك بالطريق وتفاصيله أكثر وخاصة أن أرتفاع الكاوتش (البروفايل بتاعه) قل عن الأول, وده بينقل تفاصيل الطريق أكثر.

ممكن تعلى مقاس أو مقاسين عن الجنط الأصلى, أكثر من كده غير مرحب بيه علشان مع أى حفرة الجنط ممكن يتكسر بسبب أرتفاع الكاوتش القليل, وطبعا الطرق عندنا زبالة وهتبقى قاعد فى خلاط لو المقاس كبير زيادة عن اللزوم.

يعنى من الأخر مع تكبير الجنوط أرتفاع الكاوتش الراكب عليه بيقل, علشان يكون ككل زى حجم العجلة الأصلية بالظبط.

اللى عايز يجرب, ده موقع بيحسب قطر الأطار القديم ويقارنه بقطر الأطار الجديد اللى أنت هتديهوله, وبالشكل كمان, وشوية حبشتكانات تانية.

http://www.kouki.co.uk/utilities/vis...ize-calculator

بـأستخدام الموقع أعلاه

ينفع ياباشا, بس هيبقى فى فرق 0.3% عن سرعة العربية الأصلية فى العداد, وده فرق صغير جدا مافيش منه مشكلة.

بالنسبة للعرض ياباشا فأنت ممكن تزوده مع تقليل البروفايل بتاع الجنط أو تصغير حجم الجنط نفسه, فاممكن تركب عليه حتى 220/45/16

وممكن جنط 17, هيبقى 215/40/17, أوجنط 18 كالتالى 210/35/18

بتزود حاجة وتقلل حاجة.

والموقع موجود لو حضراتكوا تحبوا تجربوا, هتدخلوا المقاسات القديمة والمقاسات الجديدة وهو هيحسب كل حاجة, والفرق فى القطر وقراءة السرعة هيبقى مكتوب تحت صورة الأطار, الموقع هيفيدكوا أكثر منى.

أهم حاجة أن قراءة عداد السرعة متتأثرش كتير عن الأول, والموقع بيحسبلك الفرق بين الجديد والقديم, حاول ماتزودش عن 1% علشان الفرق فى السرعة يبقى غير ملحوظ.

ولو حد عنده صعوبة فى أستخدام الموقع, يقولى مقاس الأطارات بتاعته و أنا أحسبله اللى ينفع يركب, وأنا قلت الكلام الكتير اللى فوق ده علشان محدش أدانى مقاس الكاوتش بتاعه غير الراجل الطيب ده, اللى معاه المقاس يتفضل.

بص ياباشا, قص السوست أصلا غلط, وبيتعب بعد كده.

السوست بتتقص علشان تهبط العربية وتخليها ثابتة أكثر, وبتضحى بالراحة فى المقابل, وللأسف طالما السوست أتقصت يبقى لازم تجيب سوست جديدة لو عايز الراحة, بس ده هيعلى العربية عن الأول ويقلل من ثابتها.

فى سبيل الشكل والثبات بتضحى بالراحة, وفى سبيل الراحة بتضحى بالشكل والأداء.

الحلول اللى قدامك كالتالى, ياترجع السوست لأصلها بأنك تشترى سوست جديدة, وبكده تبقى رجعت العربية لحالتها الأصلية, ياتسيبها زى ماهى كده وتضحى بالراحة.

ممكن الصوت اللى بتسمعه يبقى جاى من أن المساعد مع المطبات بيتضغط لأخره فابيخبط, ممكن تجرب تركب صدادات عند عفشجى ممكن تحل المشكلة وهتخلى العربية تنزل لحد معين فقط, بس خلى بالك هتنشف العفشة أكثر.

وممكن تبقى تاخد المطبات بالورب علشان العربية مترزعش:)

بالنسبة لموضوع الصب, للأسف معرفش حد, أعذرنى.

وربنا يباركلك فيها, ومتزعلش أنت معاك عربية ممتازة4BY4, شدة وهتعدى.

الف شكر يبااااشا اللة يبارك فيك بجد انت افدتيني كتير ربنا يخليك
انا بس كنت عايز استفسر ان مش انا لو عرضت الكاوتش ل220 زي محضرتك بتقول الرفرف هيحك في العجل لو حملت العربية او ونا بعدي مطب

رد: عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

اقتباس:

المشاركة الأصلية كتبت بواسطة drift (المشاركة 293967)

الف شكر يبااااشا اللة يبارك فيك بجد انت افدتيني كتير ربنا يخليك
انا بس كنت عايز استفسر ان مش انا لو عرضت الكاوتش ل220 زي محضرتك بتقول الرفرف هيحك في العجل لو حملت العربية او ونا بعدي مطب

العفو ياباشا ربنا يخليك, وكويس أن حضرتك قلت النقطة دى.

الكاوتش لو عرضه زاد عن حد معين ممكن فعلا يخرج بره ال Wheel well أو يخرج عن حد الرفرف, وبالتالى ممكن لو العربية نزلت جامد الكاوتش يقوم خابط فى رفرف العربية.

الموضوع ده ليه حلين, الأول أنك تركب صدادات علشان المساعد مينضغطش للأخر وبالتالى الكاوتش ميخبطش فى الرفرف, وده حل لا أنصح بيه الأ فى أضيق الحدود علشان مش كويس للعربية.

الحل التانى, الناس بره بتتنى حرف الرفرف لجوه لو هتجنط جنط عريض, بحيث الرفرف يبقى بعيد عن الجنط وميخبطش فيه, وده حل مثالى الصراحة, وكل اللى أنت محتاجه شاكوش مطاطى و heat gun

بص على الفيديو ده ياباشا.

http://www.youtube.com/watch?v=aXF4ZcpVufU

وبما أن الوقاية خير من العلاج, ممكن حضرتك تتجنب ده بطريقة بسيطة.

أنا قلت فى المشاركة اللى فاتت شرح للأرقام بتاعة الأطار وماهيتها, فهختصر للحل راجيا أن حضرتك تكون قريت المشاركة.

حضرتك هتنزل للعربية, وتقيس المسافة بين الكاوتش والرفرف, بالعرض, يعنى المسافة اللى بتفصل الكاوتش عن خروجه لبره عن الرفرف, ويفضل فى العجلات الأربعة.

لو المسافة طلعت مختلفة لعجلة أو عجلتين معينيين, حضرتك هتاخد أقل مسافة, ولنفترض أنها هتكون مثلا 20 ملى( بعد أستبعاد 3 ملى مثلا لضمان عدم حك الرفرف فى الكاوتش).

دلوقتى حضرتك ممكن تكبر الكاوتش عن الأصلى فى حدود 20 ملى بدون المشكلة السابقة, وعلشان حضرتك تجيب مساحة سطح الكاوتش اللى أحنا محتاجنها, هتضرب عرض الكاوتش الجديد فى البروفايل وتقسم على 100, ونفس الشئ للكاوتش القديم.

وبعدين تطرح كل رقم من العرض الكلى بتاع الكاوتش بتاعه, هيديك مساحة سطح الكاوتش, اللى هى عرض الجنط.

وتطرح الرقمين, عرض الجنط الجديد -القديم, لو الفرق طلع أقل من 20 يبقى الكاوتش ده مظبوط, لو طلع أكبر يبقى هيحك.

مثال 1:-

كاوتش قديم 14/60/185, كاوتش جديد 15/50/200

بروفايل الكاوتش القديم = 185*60%= 111
مساحة سطح الكاوتش القديم = 185 -111 =74

بروفايل الكاوتش الجديد = 200*50% = 100
مساحة سطح الكاوتش القديم = 200 - 100 = 100

الفرق بين المساحتين = 100 - 74 = 26 يبقى الكاوتش ده ---نظريا--- مش هينفع للعربية علشان موضوع الرفرف, وهكذا.

فيا تثنى الرفارف ياتجرب الطريقة اللى فوق, ده لو حصل والعجلة خرجت لبره.

وال 195 كويس ومافيش فرق كبير بينه وبين الأصلى, وممكن 200/50/16 بفرق 0.6% فى السرعة.

أو 215/45/16 بفرق 0.5% فى السرعة.

وممكن ياباشا لو تحب كمان 280/35/16, وكده تبقى راكب جيب مش جيلى.

وأنا حاطط الموقع علشان تجربوا براحتكوا, ولو عند حضرتك أسئلة وفى مقدورى الأجابة عليها أتفضل, وأسف فى الأطالة عليك

اقتباس:

المشاركة الأصلية كتبت بواسطة ahmed-casper (المشاركة 293965)

يا باشا اذا كان على اللى عاوزه انا عاوز راحه و ثبات و كله بس أكيد دى معاله صعبه بس انا نفسى فى ثبات و شكل و الراحه هى كده كده معدومه تقريبا فى شوارعنا ..بس انا اللى يهمنى يا باشا انى احط حاجه توفرلى كل ده و الاهم انها ولا تأثر على الاداء ولا العفشه و دى هم اهم حاجه

دلوقتى أنت لو عايز شكل بتكبر قطر الجنط وتصغر البروفايل, واللى هيديك شكل حلو التالى.

190/45/16, وده أحسن حاجة 16 ممكن تركبها, لأنه مش هيفرق فى قراءة السرعة خالص ولأن البروفايل بتاعه صغير وبالتالى أرتفاع الكاوتش قليل والجنط هيبان كبير, ده غير أن مساحة سطحه حلوة وهيديك ثبات كويس.

وعندك ياباشا 17/40/185, ده جنط 17 كويس, البروفايل قليل فشكله كبير, وبما أن البروفايل أقل من الأصلى فمساحة سطح الأطار هتبقى أكبر, وبالتالى ثبات أفضل, بس فرق فى قراءة السرعة 0.4 %

وفيه ال 210/35/17, ده 17 برده, بروفايل قليل, شكله جامد جدا, ثبات خيالى, بس هيأثر على العفشة والراحة لأن الجنط كده أكبر من الأصلى فى القطر جامد وفى عرضه, ده غير مشكلة الرفرف المحتملة اللى العضو الفاضل أتكلم عليها مشكورا

ال15 أنا متكلمتش عنه علشان مهما عملنا البروفايل هيفضل كبير, بالتالى الجنط هيبان جنب الكاوتش اللى راكب عليه صغير وشكله مش هيبان, بالاضافة الى أنه مش هيديك أداء ملحوظ.

ال 16 المذكور فى رأيى هو أحسن واحد, شكله كويس جدا عن القديم والبروفايل بتاعه مش قليل لدرجة فقدان الراحة, بس مش كبير لدرجة أفساد شكل الجنط, ومش هيفرق فى قراءة السرعة, وفرق 30 ملى عن الجنط القديم فى مساحة السطح, فأتأكد أن فى بين الجنط القديم عندك والرفارف 3 سم علشان الجديد ميحكش.

ياجدعان اللى عايز يجرب أن جايب الموقع علشان كده, وأنا أصلا بستخدم الموقع, وهيوضحلك الفرق بالشكل بين الجنط الجديد والقديم ( جربه يا أحمد باشا وقارن بين الجنط القديم والجديد ال 16 وقول لى أيه رأيك فى فرق الشكل)

وفيه على فكرة 215/40/16, بس ده عريض قوى عن الأصلى, وهيضيع الراحة والثبات هيبقى دبابة, وأحتمال كبير تضطر تشيل الرفرف خالص علشان تركبه, ومش هيفرق فى الشكل عن ال 16 المذكور.

وياجماعة الكلام ده كله نصايح وتبادل خبرات, أنا شخص عادى زيكم تماما, محدش يعتمد على كلامى اعتماد تام, لازم تسأل واحد مختص, وياريت أكثر من واحد كمان, وربنا يكرمكمROSE4U.

وأهم حاجة يارجالة, لما تيجى تشترى الجنط حاول على قد الأمكان أنه يكون قد وزن الجنط الأصلى أو أقل منه, علشان متتعبش الموتور والكبالن والعفشة عامة.

وحاول على قد ماتقدر تجيب كاوتش لين وطرى, علشان يمتص صدمات الطريق ومرتفعاته ومنخفضاته, وميحسسكش بيه مع الجنط, ودائما أشترى الكاوتش من تاجر الشغل عليه كتير, علشان الكاوتش بينشف مع التخزين وليه فترة صلاحية معينة.

أرجو أنى أكون أفدتكم ومعكيتش فى الكلام كتير.