مصر موتورز مجتمع السيارات - ارشيف الاستراحة 2011

طريقة جديدة ومبتكرة للشحاتة والنصب على اصحاب السيارات

تلاقى راجل واقف ع الدائرى جنب عربيته القديمة وفاتح الكابوت وبيشارولك تقف

طبعاً هو متأكد ان اللى هيقف إنسان كويس وشهم وطيب وجدع

نص الحوار:

الشحات أو النصاب: معلش يا أستاذ فى سير فى العربية أتقطع ومحتاج فلوس أشتريه ونسيت فلوسى فى البيت (أو مش عامل حسابى)
وخد الموبايل أو البطاقة معلش يابنى والله غصب عنى خد أى حاجة بس معلش أدينى أجيب السير علشان أعرف أروح

الراجل الشهم الجدع اللى وقف له: لا يا حاج ماتقولش كده عيب بكام السير ده؟؟؟

الشحات أو النصاب: بـ 85 جنيه (طبعاً أنت هتديله 100 جنيه ومش هتاخد الـ 15 جنيه الباقى)
-------------
الراجل الجدع فكر شوية فى سعر السير لأنه كتير على عربية قديمة وقاله: طب تعالى نقفل عربيتك ونروح بعربيتى نجيبه سوا

الشحات أو النصاب: لأ لأ أصل أخاف أسيب العربية لوحدها

الراجل الشهم الجدع اللى وقف له: لا أقفلها كويس وتعالى وهى كده كده بايظة

الشحات أو النصاب: طيب معاك حبل تقطرنى

الراجل الشهم الجدع اللى وقف له: لأ مش معايا حبل ياعم أركنها وتعالى نجيبه وهارجعك تانى للعربية

الشحات أو النصاب: لأ أصل أنا أصلاً ميكانيكى وهخلى أى عربية معدية تقطرنى وتوصلنى لأقرب محل قطع غيار

أخر ما الراجل الجدع زهق وحس أنه بيتنصب عليه قاله: طب بص هاروح أجيبلك السير وأجـــــــــــــــــــى سلاااااااااااااااااااااام

وبكده خلى الراجل الجدع والشهم عمره ما هيقف يساعد حد تانى لأنه أكيد هيبقى نصاااااااااب

وربنا ينتقم من كل واحد بينصب ويحرم اللى محتاجين فعلاً من المساعدة

--