رد: تقرير شامل عن جيلى باندا(GEELY PANDA)
 

انا سألت عليها دلوقتي لقيت سعرها 60.000 حد يعرف ازاي

رد: تقرير شامل عن جيلى باندا(GEELY PANDA)
 

شكرا ليك يااستاذ هانى

بالظبط هو هو توب جير

رد: تقرير شامل عن جيلى باندا(GEELY PANDA)
 

:crazyW14:بصراحه هى عربيه حلوه بس فيها مشكله انها ديقه شويه يعنى ماتنفعش سواق مليان شويه والكنبه اللى ورا اخرها اتنين بس ويكونو رفيعين كمان بس مواصفاتها وشكلها خطير وسعرها 52000 جنيه

رد: تقرير شامل عن جيلى باندا(GEELY PANDA)
 

العربية معايا لسه جديده يادوب عامله 1300 كيلو .. بجد العربيه كويسه .. شكلها مميز والسحب معقول جدالاني لسه ما عملتش 5000 ك
والموتور ناعم وتسارعه كويس
والعزل كويس لدرجة انك متسمعش العربيات اللى حواليك وصوت الموتور جوه الصالون يادوب تسمعه
والعفشة ناعمه وثابته على الطريق لحد 130 انا بصراحه لسه يادوب بفتح الموتور
والتقفيل والخامات معقوله قوي كنت خايف جدا من التقفيل بس ربنا ستر والعريه محترمة معايا لحد دلوقتي مافيش اللى بنسمعه ان ماعرفش ايه بيخبط ولا ماعرفش ايه بيسخن ولا رعشه ولا مش عارف ايه بيعلق لاخالص.. بجد بحمدربنا على اختياري وطبعا الفضل يرجع لتقارير مصر موتورز.
كان فيه تركات بسيطه لما استلمتها زي صوت فى الشنطه وتم تغير مساعد الشنطة ودبه فى العفشه اليمين مع المطبات واتصلحت كلها فى صيانة الالف مع التربيط.
مركز الخدمه ممتاز ومنظم ومافيهوش ضغط كبير طبعا لان جيلي وجاك مبيعاتهم مش كبيره بس انا دخلت الساعه 10 وخلصت حوالي واحده .. قطع الغيار متوفرة واسعارها نص اسعار الاسبرانزا
بالنسبة العيوب فهي مش المساحه لانها اكبر من البيكانتو والاي تن وشنطتها اكبر لكن العيب الوحيد فى انها واطيه على الارض والحل انك تركب صدادات جولف للاربع مساعدين حتظبطلك الارتفاع من غير ما تعلي العربية او تعومها .. طبعا الحكاية دي تخرجك من ضمان العفشة .
العيب التاني الخطير ان فيه دفعه فى الاول نزلت باور كهرباء وده بيشتغل على موتور وبيعمل رجرشة فى طارة الدريكسيون ويحسسك ان علبة الدريكسيون بايظة لكن هوه تصميمه كده وبعدين اتغيرت الدفعات الجديده كلها بباور عادي ..
الكاسيت برده عيبه انه مافيهوش سي دي .. والسماعات عادية هوه مافيهوش عيب بس كاسيت عادي ماينفعش الناس اللى بتحب العدد والصابات والحركات دي . انا شخصيا مش غاوي بس مضطر اجيب موديوليتر.
هي دي العيوب من وجهة نظري .. غير كده العربية دي قيمتها الحقيقية اكتر بكتير من سعرها
ادعولي ربنا يسلم طريقي
اللى عاوز اي نصيحه انا تحت امركم

رد: تقرير شامل عن جيلى باندا(GEELY PANDA)
 

لو ممكن تفهمونى ايه موضوع الصدادات الجولف دى؟
انا عندى الباندا وهى ممتازة بصراحة بالنسبة لواحد زيى مش خبرة فى العربيات وأول مرة اركب عربية.
بس مشكلتها بالنسبالى هى المطبات العالية قوى اللى لازم بعدى عليها كل فترة.
فاضطريت انى اركب حاجة اسمها علاية ورا ولقيت ان علاية سوزوكى هى اللى مناسبة ليها فى المقاس يعنى.
وبصراحة الفرق بقى واضح جدا حتى اما بيركب معايا اربعة مش بتحك فى المطبات العادية ولا العالية, لكن العالية قوى مصيبة بالنسبالى.
ومرة تانية اقول انها عاجبانى جدااااا ولو قدامى فرصة اختار تانى هاختارها هى:fun_36_3_3[1]: