مصر موتورز مجتمع السيارات - ارشيف الاستراحة 2011

اقتباس:

المشاركة الأصلية كتبت بواسطة memodina1 (المشاركة 539833)

فعلا هى حرب بس حرب نفسية الواحد بقى شغال عشان يدوب يصرف على نفسة ما معلش مكونش عندى 26 او 27 سنة واقول لابويا عايز فلوس وبالرغم من كدة بقولة والله وباخد منة واييييية دا انا بقولة لنفسى فما بالكم بقى لما اقولة عايز ااكل مراتى هات فلوس يا جماعة مش عشان انتوا اتجوزتوا يبقى الموضوع سهل لاة ايجار وهنقول ماشى ب 500 جنية واكتر هنقول ماشى طيب كمان تقولى بعد 3 سنين يا تطلع برة يا ازود الايجار يعنى اللى زدتة فى المرتب هدفعة تانى ايجار هه :thnkr: اعقلوها بالعقل ومعلش للناس اللى بتقول هتلاقى الدنيا اتفتحت معاك واتجوزت مش عارف ازاى معلش برضة الرسول ص قال اعقلها وتوكل مقلش انى معيش ااكل نفسى واقول اتجوز لاة اعقلها وتوكل لو غلطان صححولى وهفضل اقول شعارى يبقى انت اكيد فى مصر
وبعدين يا صديقى الناس مش مقطنعة لية انا حلفان احارب معاك لحد ما الناس تقطنع

خلينى اصححلك انا ..
كل انسان بيحسب اى امر مقبل عليه بعقله وبس عمره ما هاينجح , طب قولى .. فين التوكل على الله؟ فين تفويض الامر ليه؟ , طب بلاش دى ..
عايز تقولى انك لو حبيت تتقدم لواحدة بامكانياتك الضعيفة وأهلها رفضوا هاتفضل تدور الى ما لا نهاية مثلا؟ , ولا لو لقيتها مثلا مش هاتعرف تعيش باللى معاك؟ ..
طب ليه دايما لما بتحسبوها , تحسبوها بالقرش والمليم فقط؟ , ليه ماأضفتش حسابات ربنا؟ .. احنا دايما بنقول (أحنا متوكلين على الله) لكن الواقع غير كده .. (احنا عندنا يقين بالله) بس مش باين ..
إلى كل الشباب المكتئب , (تفائل خيرا تجده) .. دى مش مجرد عبارات رنانة وبس , فكر فيها بتمعن ..
ربنا سبحانه وتعالى لما قال (انا عند ظن عبدى بى) , يعنى بيقولك يا عبدى لو ظنيت فى خير هاتلاقى الخير جاى لك ولو ظنيت فى غير الخير بردو هاتلاقيه ..
عارف معنى ده ايه , ان الموضوع مش بس حسابات بالعقل , ده معتقد عن الله تعالى , يعنى لما تحسبها بعقلك وتقول مش هاعرف اتجوز بالوضع اللى انا عليه وخلاص على كده , يبقى ده اللى هايحصلك لأن هو ده ظنك بالله , لكن لو ظنيت ان حالك كله ربنا هاييسره لانه تعالى اعلم باللى جواك وانك فعلا تريد العفاف يبقى ربنا هايجوزك من عنده بمعنى الكلمة وهاتلاقى امورك كلها ميسرة تماما على عكس حساباتك تماما لدرجة انك ممكن تكلم نفسك وتقول انا مش عارف الموضوع مشى ازاى واتجوزت فعلا سبحان الله , ممكن تلاقى نفسك بتضرب كف على كف من الاستعجاب , كل ده يعتمد على الظن بالله واليقين به ..
شوف انت من جواك ايه اللى بتعتقده فى ربنا , هاتقولى ظنى بالله حسن طبعا , طب ظنك الحسن ده عن يقين؟ , لو عن يقين بالله تعالى وثقة فى كلام ربنا , مش هانشوف منكم - يا شباب يا مكتئب - الكلام التشاؤمى ده ولا هانشوف النظرة السوداوية دى للزواج ..
طب لما ربنا سبحانه وتعالى اقسم على نفسه انه هايساعد كل من يريد العفاف , واحنا طبعا عارفين ان كلام الله تعالى منزل , يعنى مافيهوش غلطة , يعنى حق , يعنى هايحصل هايحصل , فضلا عن كونه مؤكد من الله تعالى .. ليه ايها الشباب المكتئب لما حسبتوها ماحطيتوش الكلام ده فى بالكم؟
لو حطيتوه مش هاتفكروا بالاسلوب ده ..
طالما بتشتغل وبتاخد مرتب - حتى لو ضعيف ومايكفيش ايجار واكل وشرب - يبقى تقدر تتجوز ..
طبعا هاتقولى مستحيل .. هاقولك مافيش مستحيل على الله ده اولا ..
ثانيا : بحسابات العقل البشرى القاصر , عمرنا ماهانتجوز ولا هانشوف جواز , لو اضفنا ليها بس حسابات ربنا - اللى احنا عمرنا ما نعرفها ولا عقلنا يقدر يتوصل لها - , يبقى مؤكد الزواج ممكن وبامكانيات ضعيفة جدا ..
ولو فكرت فى يوم تتقدم لواحدة وأهلها رفضوك لضيق حالك , ألف من يرضى بك بظروفك , حتى لو فشلت خمسين مرة لازم مرة منهم تصيب , لانك مش بتتعامل مع الناس وبس , انت بتتعامل مع الناس ورب الناس اللى خلقهم وقدر المقادير وقسم ارزاقهم من عنده سبحانه ..
وبمناسبة الرزق عايزة اقولك قول النبى صلى الله عليه وسلم (ان العبد ليحرم الرزق بالذنب يصيبه)
, والزواج رزق , وممكن الرزق ده يكون متأخر عننا بسبب ذنوبنا , فلازم بردو الواحد يحط فى الاعتبار انه يتقرب لله تعالى ويتوب عن ذنوبه السابقة , عشان ربنا يرزقه ويكرمه .. ولا ايه يا جماعة ..