رد: يوميات سيترونتى........ الـ AX
 

يوم جديد من يوميات سيتروينتى
نظرا لضائقة مالية(ربنا يسد ماعلينا ويكفينا شر الدين والالتزامات)
قررت بيع سيتروينتى الغالية عليا جدا واللى ماحيلتيش اغلى منها (زى حصان مدبولى فى فيلم مولد يا دنيا....هههههه)
ولله الحمد حالتها فوق الممتاز من كله
الظاهر انها حست ان ممكن حد يركبها غيرى .... فا بدئت تتدلع وتعمل حركات عشان اصرف نظر عن البيع
اولها صوت تصفير خفيف(مايسمعهوش غير صاحب العربية عشان ودنة خدت على صوت المكنة) بيروح وييجى مع دوسة الدبرياج وبالصدفة كنت عند الكهربائى قولت اعرض علية الامر واخد رأية(وكنت عملت موضوع فى قسم الميكانيكا عشان الصوت ده) وبعد تدقيق شديد اخد باله من الصوت وقالى ده يا زيت فتيس ناقص او بلية الدبرياج عايزة تتغير
ماكدبتش خبر وروحت للميكانيكى وبعد محاولات اصدر قرار بأن السبب هو بلية الدبرياج
وفى هذه الاثناء العربية حست انى فى طريقى لحل المشكله فا بقت تلاعبنى من وقت للتانى بطقة خفيفة احيانا فى الكبالن(على الرغم انى لسه مغيرهم من كام شهر ومصينهم ومشيك عليهم من شهرين) بس قالت تلخمنى فى حاجه تانية الكبالن
خلينا فى البلية الاول الميكانيكى قالى هات بلية ونغيرها والعربية هاتقعد طول اليوم عشان حل الفتيس وتركيبة ... قولت وماله اخذ اجازة من الشغل وطلعت علية .... فك الفتيس اخد حوالى 2:30 وروحت جبت البلية وعرفت ان البلية القديمة كانت خشنة وبتعمل صوت التصفير ده والراجل ركب البلية وغشل الفتيس وعمل كل اللازم وقفل كل حاجه تمام(فى هذه الاثناء كان فك الكبالن طبعا فأخدتم وروحت لبتاع الكبالن وخليته يشوف مالهم قالى واحد كويس والتانى فيه سنة بوش عشان كده بيطقطق احيانا مش على طول) طب والعمل يا عم قالى نظبه قولت له ظبط واخدتهم وروحت للمياكنيكى عشان يقفل والحمد لله الامور تمام لكن المارش اخد منه شوية وقت فى تركيبة لغاسة ما ظبطه والحمد لله اتظبط
طلعت اجرب حاسس بحاجه غريبة فى الدواسة -مجرد ما ارفع رجلى سنة من على الدبرياج ومن غير ما ازود الاقى العربية تبطل- من هنا لهنا عرفت ان الدبرياج واطى ولأول مره اقدر احكم على الدبرياج اذا كان عالى او واطى (هيه هيه هيه اتعلمت حاجه جديدة)
قولت الف لفة واجرب وانا ماشى والطريق واقف فجأه لقيت العربية سخنت والمؤشر رايح على 100 بطلت فى نص الطريق وفتحت الشنطة ووقفت واحد صاحبى بدل المثلث العاكس هههههه) واستنيت لما العربية هديت كده وفتحت لقيت الميه كويسة الله امال سخن ليه؟؟؟؟

حد يقولى سخنت ليه ؟؟؟؟ اتارى الميكانيكة وهو بيفك او يركب وقع فيشة المروحة ههههههههه الحمد لله ان السبب بسيط كده ولحسن الحظ ان عندى مفتاح احتياطى للمروحة عشان الطوارىء دى شغلت المروحة العربية بردت مشيت بأمان لغاية حته حدوء وفحصت تانى وركبت الفيشة وكل شىء رجع تمام
باقى حاجتين الدبرياج عالى وصوت كركرة بدل صوت التصفير اللى كان موجود
رجعت له قيته قاااااااااااااافل؟؟؟؟؟؟ اصله كان شغال فى عربيتى يوم الاحد وطبعا خلص وماسهرش عشان يروح يرتاح روحت له تانى يوم يوم قالى الصوت بسبب ان زيت الفتيس ناقص يعنى عايز يتزود وده صوت التروس بدليل انى لما بدوس دبرياج التروس بتفك والصوت يختفى قولت تمام ازود زيت الفتيس طيب والدبرياج قالى اعليهولك وعلاه من تحت كده واعتقد انه موضوع بسيط هادور على قراره واقولكم ازاى بيتعمل ومنين بالظبط بعد ما علا الدبرياج حسيت انه الاول كان احسن وسألت واحد صاحبى قديم ايهما افضل الدبرياج عالى ولا واطى ؟؟؟؟؟ قالى الواطى افضل لانه مبيحمل على الاسطوانة ومابيجهدهاش بسبب قصر مشوار الدواسة والعكس وبالعكس اقتنعت بكلامه وقولت اروح للمياكنيكى يوطية واشوفه واقولكم وكمان اغير زيت الفتيس خالص لانى حطيت كيلو واحد زيت تقيل 140 بس برضه الصوت موجود وسألت ميكانيكى مخضرم فى الستروين قالى الفتيس بياخد 2 كيلو وزيت خفيف 90 مش 140 لان التقيل غلط على التروس برضه هو ادرى فانا دلوقتى مستنى افضى واروح اغير زيت واوطى الدبرياج وده كان يوم من يوميات سيترونتى:funny25:

رد: يوميات سيترونتى........ الـ AX
 

يوم جديد مع سيتروينتى:
الاول اقول بس على اخر التطورات
غيرت زيت الفتيس نوع موبيل 90 والفتيس اخد علبتين 1ك+1ك = 2ك والصوت بقى ناعم وتمام ووطيت الدبرياج شوية (وجبتلكم قراره) تحت خرطوم الرادياتير اللى راجع من الموتور كده فيه مسمار طويل علية صامولتين ومفصل (حاجه كده زى االمفصل داخل فيها المسمار ده) والصامولة هى اللى بتعلى (لما تربط) وتوطى لما (تفك) هاتحتاج مفتاحين تقريبا 13 عشان تمسك الصامولة بواحد وتهوى الصامولة التانية بالمفتاح التانى ولو ما امكنش تتعامل من الحوض يبقى ممكن تتعامل بسهولة من تحت العربية وكل شى هايكون باين وبسيط وسهل ونظرا لدقة المكان وصعوبة تصويرة ما قدرتش اوضح الموضوع بالصور اعذرونى بقى

المهم نيجى لليوم اللى قصدى عليه:
الجمعة 18/11 وبعد ما جيت من الصلاه نزلت عشان اروح لوالدى ووالدتى كالمعتاد
بشيل الغطاء لقيت ................ ايه..؟؟؟؟؟؟؟؟ تخيلوا
الازاز الامامى واخد طوبة بنت حلال شكلها من عيل ابن........ حلال برضه وربنا يسامحة
طبعا الازاز اتكسر وسرطن على طول بحجم ثلث الواجه من ناحيتى (الشمال) ولان الازاز اللى راكب نوعة تريبلكس فا الحمد لله ما نزلش والكلام ده حصل والعربية متغطية ومركونة فى امان الله فى المكان اللى باركن فيه باستمرار
حمدت ربنا ونويت اغيرة فى اسرع وقت
طيب ادور بقى عشان اتوكل على الله .......(مارش مارش مارش مارش.....) ومافيش دوارة على غير المعتاد
انا متعود مرتين تلاته وبتلقط وتبقى زى الفل
المره دى بقى ولا 20 مره (وقبلها الازاز مكسور) شوف احساسك انت بقى
ناديت على عمال فى ورشة تحت البيت واللى يحب النبى(ص)يزُق
دارت ومشيت اول واحد عديت عليه بتاع ازاز سألته وكان الرد كالاتى
زجاج استيراد تريبلكس 260
زجاج مصرى تريبلكس 240
زجاج سيكوريت طبقة واحد 150
طبعا ماينفعش غير التريبلكس زى اللى كان فيه قولت وانا راجع اعدى عليه واشوف الكهربائى الاول
عديت على الكهربائى بص وشاف وعاين قالى سير الدينامو كان مرخّى سنه وماشحنش كويس
والسبب التانى البوجيهات عايزة تتغير فا شد لى سير الدينامو ونظفلى سن الاسبراتير والغريب ان بعد ما العربية دارت بالزق والله اعلم على حسب كلام الكهربائى ان البطارية شحنت كويس وبقت تدور من سنه واحده وكمان العربية سخنت
نصحنى بالميكانيكى يطلع البوجيهات وبالمره فلتر البنزين ويروقهم (ينظفهم) او يغيرهم
كنت مغيرهم اخر مره فى شهر يناير اللى فات وكنت جايبهم 3 شمعة فرنساوى بـ 65 ج
وعدى عليهم لغاية ماغيرتهم المره دى 10 شهور و6000 كم
فا الميكانيكى قال غيرهم وقال كمان مالوش لازمة 3 شمعة وواحد شمعة نوع كويس كفاية
جبت نوع فرنساوى واحد شمعة بـ 40ج وفلتر 5ج
ركبهم والحمد لله كله تمام
اليوم خلص وكنت عايز اروح اغير الازاز بالنهار فى النور افضل
روحت تانى يوم شوفت الازاز خامتة كويسة وعلى حسب كلام الصنايعى ان المستورد دلوقتى افضل من جريش(اللى سمعتة بتنزل بسبب الاهمال فى التصنيع) ومابيلبيش كل الطلبات بالنسبة للعملاء المهم عجينى الستورد لونه بيدى على اخضر خفيييييف خالص كده ماشى مع ازاز الابواب ولون العربية وطبعا قبل ما يركب الازاز ركب لى الجوان اللى حوالين الازاز (الجوان ده حاولت بكل الطرق اركبة قبل كده والازاز راكب لكن استحااااااااااااااااااالة ) لان الجوان له شِفة بتركب على الناحية الداخلية لوضع الازاز على الحلق بتاعة فى العربية وطبعا كويس انى احتفظت فيه(كاوتش الازاز ده) عشان يوم زى ده
بصراحة التركيب عجبنى وكان فى اهتمام ملحوظ من الصنايعى وقفّل الكاوتش تمام وسلتبه (لزق سوليتيب) على الحواف عشان يلزق فى مكان مظبوط وقالى بلاش مه لمده يومين
انا قوات اسيبها 3 او 4 ايام لغاية مايشد خالص المهم يا يجيش عيل تانى ابن حلال يحتفل بيه ويكسره تانى..ههههههههههههه لانى لسه ما استمتعتش بيه)
خلصنا الشغل ورزعتة 250 ج واكن مرضى وزى الفل
وكده عدى يوم جديد من يوميات سيتروينتى وانا مبسوط جدا انى غيرتلها الازاز

للعلم نسيت اقول انى ببيع سيتروينتى والاعلان فى التوقيع
وانتظرونى فى يوم جديد من يوميات سيتروينتىFLASHCar

رد: يوميات سيترونتى........ الـ AX
 

بعد الشغل ده كله مضطر للبيع والسعر نهائى 21000 ورخصة سنة بأسمى

رد: يوميات سيترونتى........ الـ AX
 

اين الاستاذ ايمن ؟؟
لم نره منذ فترة

رد: يوميات سيترونتى........ الـ AX
 

رد: يوميات سيترونتى........ الـ AX
 

انا هنا يا باشا ..... معلش مشاغل بقى
تسلم على الاهتمام والسؤال
الف شكر استاذ طارق على المشاركة المبدعة دى

رد: يوميات سيترونتى........ الـ AX
 

السلام عليكم ورحمة الله وبركاته
انا بس حبيت احط اخر يوم فى يوميات سيتروينتى " بعد مابعتها"
طبعا اليوم كان صعب جدا جدا جدا وحاسس انى سيبت بنتى فى الشارع مع واحد غريب ومشيت
بجد حاجه صعبة على نفسى جدا لانى ارتبطت بالعربية جدا وكنت مهتم بيها لكن قدر الله انى ابيعها لظروف "اضطراراً"
ملخص الفترة من 8-2010 الى 1-2012 كانت احلى فترة عدت عليا فى حياتى لاقتنائى العربية دى
وتحت امر اى حد عايز يسأل على اى حاجه فى الـ AX وان شاء الله يوفقنى فى انى اقدر افيده على قدر استطاعتى
SLAMSLAMSLAM