مصر موتورز مجتمع السيارات - عايز تسأل عن التعديل.؟؟في حاجة محيراك في التعديل.؟؟ حط سؤالك هنا وهتوصلك الاجابة.

اقتباس:

المشاركة الأصلية كتبت بواسطة sir_ferary (المشاركة 289561)

طيب انا كنت عاوز اعرف هل الأبواب بمفصلات رفع زى اللامبرجينى كده ينفع تركب عندى ...وكنت برضو عاوز اسألك هل التعديل فى العربية وشكلها يعمل مشاكل بالنسبة للمرور ولا عادى ولا فى حاجات مسموح بيها و حاجات لأ...
وبالنسبة للميزانية ممكن نزودها شوية :)

"المفصلات" الفيرتكال بتاعة اللامبو تعمل من 200 جنيه الى 1000 جنيه ويمكن أكثر, الأختلاف بيبقى فى بلد المنشأ (ممكن تعملهم عمولة فى مصر على فكرة) والنوعية والمساعدين اللى هييجوا مع المفصلات علشان يخلوا الباب مرفوع.

أنا أسمع أنهم دلوقتى يعملوا 400 أو 500 جنيه, صينيييييى.

وهتضطر تقطع فى صاج الباب والرفرف علشان تركب المفصلات, وتلحم دعائم عند الباب والرفرف علشان الباب ميتنيش حاجة لأنه هيحمل طبعا على جنب العربية, ممكن متعملش الخطوة دى, بس برضه هتضطر تقطع فى الصاج علشان الباب لما يتفتح لفوق ميحكش فى الرفرف (تخيل الباب وهو بيفتح وهتفهم قصدى), وطبعا فى الأخر هترش, دى طريقة التركيب اللى أعرفها, وخلى بالك برضه المفصلات المختلفة بتختلف فى زاوية الفتح بتاعتها (فى 90 وفى 80 مثلا وهكذا) وطريقة فتح الباب.

http://carlambodoors.com/images/univ...8welded%29.jpg

دى الكيت بتاعة المفصلات, وبتبقى عبارة عن المفصلات الكبيرة اللى فوق دى, و2 مساعدين (أو أكثر) علشان لما ترفع الباب يترفع بسهولة ويفضل مرفوع وميقعش:).

وهتلاقى الحاجات دى عند جو Go أو TPS عادل وجدى أو Enzo طبعا, ولو عايز عناوينهم, جروباتهم على الفيس موجودة فى المنتدى, لو ملقيتش الجروبات قولى وأنا أجيبهملك.

بس الباب مش هيفيدك كتير, هتتعب فى التركيب, والفلوس, علشان الباب يفتح لفوق بس:)

ولو عايز تدور أكثر , جوجل, ثم lampo door kit, أو vertical door kit.

بص ياباشا, التعديل على شكل العربية أو موتورها بيضايق بس وقت الفحص (ماعدا الفاميه والشغل ده طبعا), لكن لو المهندس كوول هيعديك, لو مش كوول الحوار هيمشى ب 20 جنيه:), لو خنيق مش هيرضى يعديك (نادر جداااااا) ساعتها أبقى تعالى أفحص بعدين علشان المهندس يكون أتغير:)

والأختيارات أنا قلتها فى المشاركة اللى فاتت, لو حضرتك عندك أستفسار أو عايز تعديلات زيادة, أطلب ولو فى مقدرتى هساعدROSE4U.

اقتباس:

المشاركة الأصلية كتبت بواسطة ahmed naeem (المشاركة 289599)

انا عندي اسبرانزا A516
عايز اعدل نظام الفرامل والتعليق
ممكن اعرف ايه اللي ممكن يتعمل وهيكلف كام ؟
شكرا

نظام الفرامل تعديله مقرف وصعب, بس مبدأيا التعديل هيبقى فى الحدود دى, يا تجيب تيل فرامل نضيف زى ebc وده هيبقى فى رينج 500 جنيه بس هتحس بفرق كبير فى الفرملة, من غير فك وعك وتركيب فى دقائق.

http://www.gmparts.co.uk/images/pad_h2_green_front.jpg

الحل التانى تعديل شامل, هتغير الطنابير بطنابير تانية قطرها أكبر, وكاليبرات أقوى, وطبعا الماستر بتاع الفرامل هيتغير هو والخراطيم بتاعة النظام علشان تلائم التعديلات الجديدة.

ممكن تجيب المكونات أستيراد من عربية شبيهة لعربيتك, بس تكون طنابيرها أكبر من اللى عندك (وطالما طنابير أكبر كاليبرات أكبر:)), وبالمكونات الأستيراد الموضوع هيتكلف مش أقل من 1000 جنيه بالتركيب والزيوت, المشكلة أن الموضوع كله أفتكاس وخاصة أن العربية لسه جديدة ومالهاش موديلات كتير تاخد منها قطع غيار, هتقعد عند الميكانيكى فترة علشان هتقابلك مشاكل فى التركيب (تعديلات يعنى علشان النظام يركب) ده غير أنه صعب تلاقى عربية فراملها تركب على الأسبيرانزا, بس ربك بيسهل, وطبعا تعديل زى ده هيعمل فرق رهيب لو أتعمل صح.

وممكن لو الميزانية عالية وعايز العربية تقف من لمسة فرامل, تجيب طنابير وكاليبرات أسبور زى Brembo أو Wilwood بس أعمل حسابك فى ميزانية متقلش عن 5000 جنيه, بس هتبقى طنابير مخرمة بقى وشغل عالى, بس غالبا هتضطر تغير الجنط كمان علشان الطنابير الجديدة من حجمها الجنط القديم مش هيركب عليها:).

http://chrisescars.com/wp-content/up...yota-Supra.jpg

نظام التعليق أختياراتك كالتالى من الأسهل للأصعب:-

ممكن تجيب جنط أكبر مقاس أو مقاسين عن الأصلى, بالمقاسات الصح طبعا,ومساحة سطح الأطار هتبقى أكبر وده هيخلى العربية أثبت بكتير وهينشف العفشة, والجنط الأكبر بالكاوتش معاك من 1500 الى 4000 جنيه, حسب الحجم, وهتجيب مستعمل ولا جديد, والشكل وبلد المنشأ طبعا..

ممكن تجيب أستابلايزر أو بار للمساعدين, ده هيربط المساعدين الأماميين ببعض, وهيخلى العربية مترجش أو تميل مع تغيير الحارات على السرعات العالية أو الغرز:), مشكلته أنه صعب تلاقى واحد لعربيتك علشان الأختلاف بين العربيات, بس لو لقيته هيبقى فى حدود 350 الى 400 جنيه وهيفرق معاك جامد.

ودى صورته, بيركب على البطاحات من فوق (وفيه واحد بيتركب من تحت لو عايز, وفيه بيتركب على المساعدين الورانيين وهكذا), وهتلاقيه عند المحلات السابق ذكرها أو ورش التعديل عامة:-

http://image.hondatuningmagazine.com...e_sway_bar.jpg

الحل الاخير وأكثر واحد مقرف, ممكن تغير السوست والمساعدين بتانية رياضية زى Koni أو eibach ألخ, بس طقم السوست لوحده هيكلفك جامد جدا غير المساعدين, حوالى 4 بواكى:), والعربية هتنشف جامد بس ثبات خيالى, عايز الحق مش هتوصل لسرعة تستفيد بيها من الثبات بتاعهم, عربيتك بتعدى ال 200؟.

الأفضل تستنى لما مساعدين العربية يهلكوا شوية, وتجيب مونرو جديد, ثمنه غالى تقريبا بحوالى 700 جنيه الجوز بس هيحسن الثبات جدا وهيبقى أنشف عن الأصلى, وده مع جنط أكبر, خيال (بس على حساب الراحة)

اقتباس:

المشاركة الأصلية كتبت بواسطة drmagola (المشاركة 289839)

سؤال سريع؟؟
معاى كورولا 99 عيون ايه التعديلات اللى ممكن اعملها فيها
و شكرا للمساعدة

معلش ياباشا لو مافيهاش رزالة راجع ردى السابق, علشان مقعدش أكتب وخلاص, كسل بقى:), بس أهم حاجة دى كورولا عيون, يعنى متنساش الرينجات:), واى أستفسار أنا فى الخدمةROSE4U.

اقتباس:

لو الميزانية فى حدود 1000 جنيه ككل مثلا:-

حضرتك ممكن تركب فاميه على الزجاج الأمامى, وتركب ستائر كبس على الزجاج الخلفى, علشان اللجان (تنزل الزجاج وتسحب الستائر بسرعة) وعلشان شكل العربية يبقى حلو, والشمس والخصوصية, والموضوع هيتكلف حوالى 150 جنيه.

وطبعا الزينون, عدة زينون صينى كويسة عالى وواطى هتبقى فى حدود 450 جنيه, ولو عالى بس فى حدود 350 جنيه. وطبعا مع تغيير اللمض الصغيرة بلمض زرقة أو بيضاء بحوالى 10 الى 20 جنيه, وممكن كمان تغير لمض الأشارات بلمض زرقة أو بيضاء بس منصحش بكده علشان الأمن العام (الناس مابتشوفهاش كويس زى الصفراء الأصلية).

وممكن تجنط جنوط أسبور نفس المقاس الموجود عند حضرتك وتركب الكاوتش القديم عليه, الجنوط موجود مستعمل أو جديد, وهيبدأ من 700 الى ممكن نقول 1000 جنيه حسب الشكل وبلد المنشأ وجديد ولا مستعمل.

ولو ليك فى الصوتيات ممكن تركب كاسيت بايونيير أو كينوود جديد بحوالى 500 الى 600 جنيه (تعددت الموديلات و رينج السعر واحد :)), وتجيب طقم سماعات 200 وات مثلا (المهم مايكونش محتاج جى أم) بحوالى 250, وده بيضاوى وأحتمال تضطر تقص فى الصاج أو تركب قواعد ليها (بس صوت خطير) , لو مش عايز وجع دماغ هتجيب مدور مقاس الفتحات اللى عندك والطقم هيعمل من 90 الى 140 لأغلب الماركات المتوافرة وهتجيب السماعات اللى ورا وللأبواب, وطبعا الكاسيت هيغير شكل العربية والسماعات هتعمل تحسن كبير فى الصوت.

وممكن كسوة كويسة برضه تغير شكل الصالون من جوه وهتبتدى من حوالى 200 جنيه فيما فوق وطبعا هتقلب شكل العربية تماما.

دى الحاجات اللى قدرت أفكر فيها بميزانية محدودة, ولحضرتك حرية الأختيار, ومعظم الأختيارات هتغير شكل العربية, خصوصا الكسوة وتغيير اللمض, بالتوفيق.