انتبااااااااااااااااااااا ااااااااه ...
كله يجهز مج النسكافية او حمص الشام بقه ويطرطق ودانه ويسمع حكايتى مع الكهرباء

كان يا مكان ..
حسيت برفه فى الكردان ..

الله والله تنفع مطلع قصيدة ..
كنت على موعد مع اخويا هشام انى اعدى عليه ونروح سوا الى كمال بتاع الكرادين اللى فى الضاهر صحيت الصبح بدرى ورحت الاول لبتاع الفرامل عشان عربيتى كانت بتوقف بالدعوات مش بالفرامل.
الراجل غيرلى التيل الامامى والجلب الكاوتش اللى فة الطنابير الخلفية عشان كانت ضاربة زيت بسبب واحد صاحبى كان ماشى والهاند بريك مرفوعه وهو ولا على باله خالص.
المهم التيل والجلب اتغيروا وخد هوا ومليت الزيت وبقت زى الفل العربية بس تحس انى عايز اقف تفرمل لوحدها الحال والحمد لله اتغير 180 درجة.
وانا رايح لهشام المطار بقه حصل اللى خلانى الف حوالين نفسى 3 ايااااام حد يقولى ايه اللى حصل ؟
احب اقولة انا سعيد انك سألت السؤال ده ..
وانا ماشى فى السكة لمبة الدينامو كانت منورة والنور ضعف والكلاكس وكل حاجة عقبال ما رحتله العربية بركت ومرضيتش تدور والبطارية فضيت حطينا عربية هشام عندى قومنا العربية وبعدين فكينا بطارية هشام وحطيت بطاريتى انا وهى دايرة اه والله سبحان الله
المهم برده لمبة الدينامو منورة قلنا نروح للكهربائى قبل مانروح هشام جس العجلة الخلفية لاقاها سخنه رفعنا العربية وحلينا العجل وفتحنا الطنابير ورجلشنا الفرامل شوية وانا بنعمل الموضوع ده بقه حصل ايه ؟؟ هشام لاحظ حاجة مش مظبوطة فى العربية من تحت حد بقه هيجى يسألنى ويقولى لاحظ ايه ؟
مش هقوله هاهاها لاحظ ياسيدى ان الكردان اصلا مفكوك اه والله مفكوك المهم جاب سجادة ونمت تحت العربية وادناى مفتاحين 13 وقالى انت اللى هتغنى يا منعم ونزلت تحت العربية وربطت الكردان بنفسى والله كانت ممتعه خالص وربطنا العجل ورحنا للكهربائى والصوت بتاع الكردان اختفى والعربية الحمد لله بقت حلوه اوى.
وصلنا للكهربائى كانت اللمبة اتفظ لوحدها ودى كانت او خطوات الجنان بقه.
غيرنا الترملتين بتوع البطارية وكتاوت وركبت كلاكس جديد وفضلت مدور العربية نص ساعة عشان الدينامو يشحن البطارية ومشيت عشان اوصل هشام لعربيتة اللى راكنها فى المطار وصلنا بالسلامة وخد بطاريتة ركبها فى عربيته والله انا بقول كلام جامد (بطاريته - عربيتة ) سجع جامد اخر حاجه.
بعد ماركب البطارية اجى ادور انا بقه مابتدورش احييييه بقه قلنا نزوق ولا حياة لمن تنادى المهم وصله بين البطاريتين ودارت الايام قصدى ودارت العربية وروحت وطبعا طافى كل الانوار وبعد ما ركنت استنيت ساعة وجيت ادور دارت زى الفل اتروشت وطلعت نمت الصبح بقه نزلت قولت لو مادرتش من اول مرة هروح الشغل مواصلات نزلت دارت من اول لمسة وانا فى نص المشوار كده وخلاص طالع كوبرى اكتوبر من غمرة والقطه بطلت لوحدها ودون سابق انذار قولت ارميلها برده ولا الهوا ركنتها ورحت ادور على كهربائى الساعه 9 صباحا وطبعا ملقتش حد فاتح ولا حتى غامق ..

اكمل بعدين بقه ايدى وجعتنى سلام مؤقت