مصر موتورز مجتمع السيارات - حكايتى مع السيارات-حكايه 10 سنوات

-30-
اشترى صديقى ولاول مرة فى حياته سيارة دوجان كانت موديل 94 على ما اذكر00
جاء لى على البيت وهو فى منتهى السعادة
كان لون السيارة فضى وبلا خدوش تقريبا وتبدو حالتها من الخارج ممتازة ومن الداخل كانت ممتازة ايضا00كانت السيارة مرشوشة من الخارج00
قلنا عادى 00هذا لايعيب
دعانى الى تجربة السيارة00
دوارة سلسة وممتازة
طلعة ممتازة
لكن عفشة مهلهلة تماما !
قلت:
-هيه مالها عماله كده ليه؟
-الراجل قالى العفشة عاوزة تتربط
وده العيب الوحيد فيها
-ياسلام00هيه فين العفشة يابنى؟
-هيه تعبانه للدرجة دى؟!
-من خلال خبرتى المتواضعة 00هيه ما فيهاش عفشة من أساسه
انت اشتريتها بكام؟
وعندما قال لى السعر
قلت:
-سعر ف الجون00مش مشكله بالفرق تظبط وتغير لها العفشة
-ما تيجى معايا بكرة 00نشوف عايزة ايه

وعندما ذهبنا فى اليوم التالى للفنى00
فحص السيارة وطال فحصه00
خرج من تحتها اخيرا وقال:
-انت اشتريت العربيه دى من امتى؟
قال صديقى:
-من اسبوع
-خلصت كل حاجة يعنى
رد صديقى باستغراب:
-أيوة
-ربنا يعوض عليك
-ليه فى ايهظ
-أنت متعرفش
-اعرف ايه00
هوه فيه حاجة غير العفشة؟
-ياعم العفشه أمرها سهل
معاك الرخصة
-ايوة
-هاتها
وعندما نظر فيها 00
اخذ يراجع ارقام الشاسيه والموتور وقال:
-الحمد لله مظبوطة
سألت:
-هوه فيه ايه؟
-العربيه يا أستاذ مركبه نص
قلت:
-مركبة نص!!!!!!!!
-العربيه دى كانت معجونه ف حادثة أكيد وراشه بره وجوه
-ياراجل؟!
ونزل الخبر على صديقى كالصاعقة
قال:
-ابن ال000غشنى
أنا لازم اتخلص منها
انا اتشاءمت منها
-تخسر كتير يابيه عما انت شارى 00العربيه اى حد ممكن يهرشها
انا مش عارف انت ولامؤاخذه خدتها على عيبها ازاى
وتركنا الرجل وصديقى فى حسره وانا حزين على حالته وحاولت ان اخفف من صدمته ولكن بلا جدوى
والاسى يسيطر عليه ويكاد يخنقه
ظلت السيارة مركونه فى جراج منزلهم لاكثر من شهر لم يركبها مرة واحدة00 حتى باعها وخسر فيها كثيرا لانه اصر على تعريف كل مشترى بعيبها قبل ان يبيعها وكان هذا طبعه ولا انسى كلمته التى كان يرددها00
مالا أحبه لنفسى لا أحبه لغيرى
وقد عوضه الله بعدها ان قام بشراء سيارة فى فترة كانت السيارات فيها فى انخفاض شديد جدا00
بعدها بشهر واحد سمع فيها سعرا يزيد بثمانية آلاف جنيه عما أشترى!
وكانت تقريبا نفس قيمة خسارته فى الاولى
ولكن الاهم انه فور بيعه للسيارة الاولى وخسارته فيها00
جاءت له وظيفة مرموقة كان قد تقدم لها على سبيل الدعابة لانه يعلم جيدا انها من الوظائف المحجوزة للصفوة واصحاب الوساطة00لكن تم قبوله وتعيينه فى حلم يخرج الى الواقع ولا يتكرر كثيرا!

تتبع ان شاء الله