رد: اية رايك فى سواقة السيدات
 

انا بنت اهو و بتخنق مووووووت من سواقة الستات و بالذات لو واحدة كبيرة فى السن ماشية
بيمشوا ببطئ فظييييع مع ان الطريق سريع جدا

يعنى فى مرة كنت رايحة اكتوبر و ماشية على سرعه 100 و لجل الحظ الاسود اتزنقت فى الحارة اللى فى النص و لقيت قدامى واحدة ست ماشية بسرعه لا تزيد عن 60 احاول اجى يمين الاقى فى حد جى اسرع نتى احاول اجى شمال الاقى فى حد اسرع منى قلت مبدهاش بقى رحت قرصت لغاية قبل ما اوصل على الاكصدام بتاعها و رحت كاسرة و تخلصت منها الحمدلله .. والا كنت وصلت الجامعة بعدها ب 3 ساعات ولا حاجة
اللى ينرفز انها ماشية فى الحارة اللى فى النص يعنى ولا واخدة يمنها ولا شمالها كانها بتتمشى فى صالة بتهم :D
بس انا كابنت عندى مشكلة واحدة بس هى المرايات مبحبهمش ابدااا
لازم اقفل للناس كلها مرياتها وانا ماشية بس ده فى الزحمة بس و بعتذر منهم او بهذر معاهم لاحسن اضرب
يعنى مرة طيرت مراية لتاكسى فبيقولى ينفع كدا قلتله اعمل ايه ماهى اللى خارجة برا العربية
كانى شتمته بمامتو لقيته بيقولى : ماهو الحق مش عليكى الحق على الركبهالك و نازل شتيمة انا طبعا مش هنزل لمستواه رحت قافلة الازاز و سبته يولع :@

رد: اية رايك فى سواقة السيدات
 

بيتهيائلى تتلموا بقى شوية و تبطلوا تريقة
واستاذة سلوى جابت من الاخر

رد: اية رايك فى سواقة السيدات
 

هو للأسف المتعارف عليه ان اغلب السيدات مشروع حادثه إلا أن تختفي من امامك و من مراياتك :D , بس الصراحه فيه منهم ما شاء الله جامدين جدا في السواقه و شغل غرز بس برضو بحسهم بيترسمو مش اكتر عاوزين يثبتو انهم احسن من الرجالة بس بتهور زياده

رد: اية رايك فى سواقة السيدات
 

انا اتعلمت السواقه ومشيت بالعربيه شويه الحمد لله وسط الزحمه

لولا بس اني وقعت على رجلي كان زماني رحت امتحنت وطلعت الرخصه

كلامكم كله فيه نسبه من الصح


انا عن نفسي بحب امشي بهدوء مش عشاني بس عشان مخبطش اي حد سواء عربيه او انسان

خوفي على اللي قدامي بيكون اكتر من على العربيه

من خلال مشيي بالعربيه لاحظت ان نسبه كبيره من الرجاله لما بتشوف ست سايقه بيتنرفزوا مش عارفه ليه ومن غير سبب

حصل موقف معايا

انا بحب دايما يكون في مسافه بيني وبين اللي قدامي معقوله والمفروض اللي ورايا يكون كده

وانا ماشيه لقيت فجأه توكتوك قدامي مكنش قدامي حل غير اني امسك فرامل عشان مخبطهوش لاني كنت متأكده اني لو معملتش كده هيتفرم تحتي

المهم لقيت ميكروباص خبط في العربيه من ورا

وسبحان الله انا رد فعلي اني مبصتش حتى على الميكروباص كان كل همي ان التوكتوك عدى


الحمد لله كانت المدربه معايا ونزلت اديت لسواق الميكروباص كلام في جنابه زي ما بيقولوا لانه كان لازق عربيته بعربيتي

مواقف كتير تانيه حصلت بس اغلبها غلاسه من الرجاله عليا وانا بسوق

بس انا خلاص اتعودت اكون بارده وطالما ماشيه صح خلاص مش بيهمني

ادعولي بقى اخف وامتحن واطلع الرخصه

رد: اية رايك فى سواقة السيدات
 

انا عارفه ان الموضوع قديم بس فكرته حلوة
كلام الرجال اغلبه صح
بس اسمحولى قبل ما تحكموا على سواقه الستات اسالوا نفسكم هما بيسوقوا ليه ؟؟؟؟؟؟؟؟؟؟
فى ستات بيسوقوا رفاهيه بابا او ماما او جوزهاجايبلها عربيه وفرحانه بيها رايحه جايه تسوق وبالمرة تطلع رخصه وهى فى بيتها مش هايفرق معاها تدفع الف عشان تطلع رخصه
النوع التانى من الستات اللى بيسوقوا مجبرين على السواقه
هاتكلم عن نفسى عمرى مافكرت فى السواقه ولما حاولت اتعلم فشلت على ايد بابا
لما ربنا كرمنى وبنتى خلت المدرسه شفتها طفله ما كملتشى 5 سنين متبهدله فى الباص من الحر والزحمه وترجعلى متاخر مش عارفه اقولها نامى ولا كلى بسرعه عشان تذاكرى ولا ذاكرى عشان تنامى بقيت علاقتى بيها طول الدراسه زعيق ونرفزة قررت انا وزوجى ما نركبهاش الباص طيب والحل انى اتمرمط بيها فى المواصلات وياريت فى مواصله لغايه مدرستها لا دى بعيد كمان ونكمل مشى يمكن ربع ساعه بهدله يعنى
استخرت ربنا وقلت هاتعلم السواقه بما انى انا اللى هاوديها واجيبها وانا رايحه وراجعه من شغلى واتعلمت الحمد لله يعنى مجبرة وبيبقى نفسى وانا ماشيه اقول للرجاله اللى متنرفزة منى فى الطريق اصبروا عليا انا لسه بتعلم وغصب عنى لازم اتعلم
رحت طلعت رخصه بمجهودى ومادفعتشى قرش رشوة التحقت بمدرسه المرور الاول اتدربت على الامتحان وامتحنت عملى ونظرى وبفضل ربنا وحدة نجحت وطلعت الرخصه فى نفس اليوم وانا ببكى وبدعى ربنا انى اطلعها عشان اوصل بنتى وانا مطمنه
رجاء اخير للرجاله اللى بيسوقوا لما تشوف ست سايقه راعى انها وراها ميت حاجه وانها مجبرة تنزل فى الحر ووسط الزحمه تسوق وتسمع شتيمتها بودانها وتسكت عشان مجبرة وعايزة تروح تعمل اكل وتذاكر للعيال وتنظف يعنى مش مجرد رايحه شغلها وهاترجع تاكل وتنام
اسفه انى طولت عليكم