المشاركة الأصلية كتبت بواسطة sensitivets (المشاركة 747189)

بصوا أنا هجيبلكم من الآخر كده عشان متتعبيشوش نفسكم
الاخوان هم اللى حطوا سم فى الأكل للملك مينا موحد القطرين عشان كانوا عاوزين يكوشوا على السلطة
وهم الى بعتوا دعوة للرومان عشان يحتلوا مصر و يصاحبوا كيلوبترا.... عشان كيلوبترا أصل أمها من الأخوان برده
وهم اللى سهلوا دخول الصليبيين مصر عشان الصليبيين وعدوهم أنهم هيختاروا واحد منهم يكون من فرسان المعبد
وهم اللى حطوا ماء على حدوات الخيول بتاعة صلاح الدين عشان تصدى و ميعرفش يحارب كويس
والاخوان كمان كانت ليهم مخابرات و عيون بتنقل للتتار كل أخبار قطز ... عشان كده قطز معرفش يقضى ع التتار كويس
و هم السبب كمان فى أن محمد على باشا جه مصر
وهم اللى طمعوا الانجليز و اديلهم خريطة كل حته فى مصر
و كان الواحد منهم الصبح يروح يعمل نفسه أن الانجليز قتلوه و يصلوا عليه و يتدفن و بعدين يقوم من القبر زى الجن كده و يروح يسهر سهرة حلوة و يرجع تانى للقبر
وعلى فكرة كانوا أذكياء جدا و معاهم أسلحة متطورة من المستقبل قام واحد فيهم شجاع كده قاعد وسط كتيبة جيش و بلد بالكامل فى اسكندرية و ضرب رصاص على عبد الناصر 8 رصاصات .... و مساعدين عبد الناصر عشان ناس متربية و مؤدبة استنوا لما الراجل خلص و روح و قبضوا عليه بعدها عشان مينفعش يقبضوا عليه و هو وسطهم, الأدب فضلوه على العلم برده.
و هم السبب فى نكبة 67 عشان كانوا بيدعوا على عبد الناصر و هو بيعذبهم
وهم السبب أن الجيش انتصر من اول يوم فى حرب أكتوبر ... مع أن الجيش كان ممكن يخلص الموضوع فى 5 دقايق زى ما حصل فى العباسية على رأى شفيق
و هم اللى قتلوا السادات
وهم اللى أخدوا جنود أمن الدولة الأبرياء من زوجاتهم و أطفالهم فى أنصاص الليالى و عذبوهم عشان يأرروهم عن مكان مفك مبارك اللى كان بيفتح بيه عقول الناس المسكينة على حقيقة الاخوان المرعبين دول
وهم كمان أس البلاء اللى فى الأعلام اللى خلا كتير من شبابنا يتجه للمخدرات و الزنا و خلا كتير من أزواجنا للأسف بقت الخيانة فى دمهم.
وهم كمان اللى عملوا خرم فى السد العالى
و هم اللى هيأجروا قناة السويس لقطر
وهم الى باعوا الثورة و الشهداء رغم أن منهم شهداء كتير و مصابين عمرهم ما تاجروا بدمهم
وهم كمان السبب فى أن الجزمة بتاعتى طلعت ضيقة
و السبب فى أن الصراصير بتطلع فى الصيف
و السبب فى كل الناموس اللى مالى البلد اليومين دول
ولو حكموا مصر اسرائيل هتحاربنا ... و أمريكا هتحاربنا.... و السمك هيحاربنا و جميع الحيوانات اللى فى حديقة الحيوانات هتهيج علينا

وعلى فكرة فيه حاجات كتير تانية مش قادر أقولها ... بس أكيد كل المحطات و المذيعين الثوريين هيقولولنا عليها فى الأيام الجاية

ونسيت تقول اهم تلات حاجات ان عمرو اديب كان شعره اصفر ومسبسب وعامله لييس والاخوان قرعوه ومش هو بس لا اخوه كمان -وابراهيم عيسي كان رفيع ومدخلش الجيش بسبب انه كان رفيع اوي والاخوان تخنوه ولبسوه حمالات واخر حاجة الاخوان باعوا الغاز لاسرائيل علشان مصر تفتقر وبعدين لما تفتقر الناس تثور علي مبارك وبعدين يستولوا علي الحكم
اه يا شعب تروح وتيجي بالريموت اللي في ايدك(الا من رحم الله )
ريحوا أعصابكم بقى