مصر موتورز مجتمع السيارات - مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله

مصر موتورز مجتمع السيارات (https://www.masrmotors.com/vb/index.php)

- ثورة الحرية 25 يناير (https://www.masrmotors.com/vb/forumdisplay.php?f=177)

رد: مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله

اقتباس:

المشاركة الأصلية كتبت بواسطة محمد السيد 78 (المشاركة 726603)

بالنسبة لى قبل الثورة ماكنتش متابع اى برامج حوارية وانا بطبيعتى ماليش فى السياسة وطبيعة شغلى كانت بتخلينى معظم اليوم برة المهم مما سبق انا ماكانش عندى خبر بموضوع المظاهرات ده وبعد يوم التلات 25 بدات اسمع ان فى قلق فى القاهرة وانا اساسا من الاسكندرية المهم يوم الجمعة(جمعة الغضب) رحت الشغل عادى جدا ماكنتش اعرف ان فى جمعة الغضب اساسا وبطبيعة شغلى برضه كنت بروح فرع دمنهور للشركة التى اعمل بها يوم الجمعة لمتابعة سير العمل هناك المهم اخدت عربية الشركة(شاهين) وميكانيكى وكهربائى وسافرنا على دمنهور وصلنا قبل صلاة الجمعة صلينا وبدانا شغل وخلصنا حوالى الساعة 3 عصرا وبدانا رحلة العودة الى الاسكندرية (على فكرة ماكنش فى اى شئ فى دمنهور ) ولا كنا حاسين بالدنيا لان العربية مافيهاش راديو وماحدش خد باله ان خطوط الموبايل مش شغالة المهم بعد دمنهور بحوالى 20 كيلو لقيت العربيات الناحية التانية عمالة تقلب نور قت اكيد فى رادار وهديت السرعة وفضلت ماشى مهدى اكتر من ربع ساعة وانا عمال ادور على الرادار ومش لاقيه وفجاة لقيت كمية كبيرة من العربيات ماشية عكس وجايين فى وشى المهم وقفت وبسالهم فى ايه قالولى ان فى كفر الدوار المتظاهرين قافلين السكة وماحدش بيعدى ومن هنا بدات الماساة وقررنا التوجه الى المنصورة واتخاذ الطريق الدولى الى الاسكندرية ومجرد ماوصلنا المنصورة كان الجيش نزل وقفل مداخل المدينة فرجعنا تانى على الزراعى وقلت للى معايا انا هبات فى فرع دمنهور لحد الصبح وصلنا دمنهور وصليت المغرب والعشاء وبعد الصلاة فوجئت بان الفنيين اللى معايا قالولى احنا مش هنبات قلت لهم طب هنعمل ايه مانتم شايفين مش هنعرف نوصل اسكندرية قالولى لازم نروح . المهم طاوعتهم وبدانا الرحلة مرة اخرى الى الاسكندرية زراعى كان الطريق بدا يفضى ولكن بمجرد وصولنا كفر الدوار لقيت كمية من الشباب والصبية مولعين فى كاوتش وعربيات بوليس محروقة وماسكين سنج وشوم وسيوف وبيوقفوا كل عربية يبصو على الركاب فيها كل ده واحنا مذهولين مما يحدث ومش عارفين ايه اللى بيحصل وعدينا كفر الدوار بسلام ووصلنا الى اسكندرية وبمجرد اقترابنا من كوبرى التاريخ لقيت شوية اطفال بيوقفو العربيات وبيقولو ماحدش يعدى من هنا فى ضرب نار حى قدام ناحية مينا البصل انا ساعتها كل اللى شاغلنى انى اوصل العربية لحد الشركة وبعدها اللى يحصل يحصل لانها مش عربيتى ودخلت على المينا من ناحية باب 22 الىمقر الشركة والحمد لله واليوم ده ماعرفتش اروح ونمت فى الشركة والحمد لله ان التليفون الارضى كان شغال وطمنتهم فى البيت الساعة 2 ليلا وروحت يوم السبت الساعة 10 ص.

ينهار فل طايب والبنزين كان ايه اخباره ساعتاه واكيد طول ما انت سايق كنت فى رعب
الحمد لله ان الايام ديه عدت على خير

نورت الموضوع يا باشا

رد: مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله

اقتباس:

المشاركة الأصلية كتبت بواسطة mhamdy75 (المشاركة 726604)

ايه المواضيع الجامدة دى ياسيسو

الله أكبر عليك

انا متابع معاك

وهاكتب لما تخلص

ان شاء الله

ياباشا يا كبييير

الله يخليك يا باشا ده بعض ما عندكم طبعا

ومستنيك يا باشا واعتبرنى خلصت

وبجد الموضوع ده هيبقى اكثر من رائع لان كل واحد مر بتجربه و بمشاهد غير التانى خالص ونهائيا ففعلا بتبقى ممتعه جدا اننا نسمعها من بعض

وفى انتظارك يا كبير:01FDAB~189:

رد: مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله

انا احب اشارك اخواتى فى المنتدى عن ذكريات اول اسبوع من الثورة

متابعتى بدات من بعد صلاة الجمعة .... الى كنت سمعته انه فيى شوية قلق فى وسط البلد ... فقلت عادى ... زى الى كان بيحصل قبل كدة ... شوية مظاهرات خفيفة امام مجلس الشعب

يوم الجمعة بعد الصلاة ... اخدت بالى ان مفيش سيجنال فى الموبايلات ... و لا فى التليفون الارضى ... و لا انترنت ... فتحت التليفزيون المصرى .... يحرق الدم كالعادة ... الجزيرة و العربية بيقولوا ان الدنيا والعة نار
اترزعت ادام التليفزيون لغاية باليل و لغاية لما قالو مفيش بوليس فى البلد ..... الرجالة جريوا و هربوا !!!!!

ببص فى الشارع لقيت الناس بتنادى على بعض انها تنزل تحمى البيوت .... فنزلت معاهم .. و رحت معرض عربيتى فى الشارع بتاعنا و قفلناه ... و عملنا 3 نقط تفتيش فى الشارع ..

المهم ... بدأنا نسمع اخابار ان فيه عصابة من 5 افراد بيسرقوا البيوت بالقوة فى الهرم
بعديها بساعة .... عصابة من 10 افراد بيسرقوا البيوت فى الشيخ زايد و معاهم مسدس
بعديها بساعة ..... عصابة بتسرق البيوت و واحدة بتصرخ فى التليفزيون و بتقول انهم بيحاولوا يكسروا باب بيتهم ..
انتى ساكنة فين يا ست ؟؟؟ انا ساكنة فى الحى الاول ( او التانى ) فى 6 اكتوبر !!!! يا صلاة النبى انا ساكن فى الحى التانى !!! فين الكلام ده ؟ نروح ندور فى كل الحى التانى ملقيناش اى حاجة مش طبيعية

فبلغت الناس الى معانا فى الشارع ..... كل الى بيتقال و بنسمعه .. دى اشاعات و ياريت محدش يرددها تانى ... لو فيه عصابات او ناس جاية تسرق , ادينا مستنيين .... بس شغل الكلام الفارغ ده ملهوش لازمة
و لسة مخلصتش كلامى ..... و جه واحد ( الله يسامحه ) يقولنا .... الحقوا خزنوا ميه , ليه ؟؟؟ علشان ضربوا خزان المياه الى فى اكتوبر ... انا اتغاظت منه جدا جدا و قلتله ...

اعقل الكلام قبل ما تقوله , مين الى حيفجر خزان المياه ؟؟ و مصلحتهم ايه ؟ دى عصابة جاية تسرق المياه ؟!!! و بعدين يا عم الحاج خزان ايه الى فى اكتوبر ؟؟!!!! الناس بطلت نظام خزانات المياه ده من زمان
و بعدين يعنى ايه ضربوه ؟؟؟ ضربوه بالمتفجرات يعنى و لا ضربوه على ايديه ؟!!!!

المهم انا اتاكدت من ساعتها ان مفيش الاشاعات و الكلام الجامد ده
الى استمر كمان يوم ...... عصابة بتسرق الناس فى الفردوس .... نتصل بزمايلنا الى فى حى الفردوس ... يقولوا مفيش حاجة ... ده احنا الى سمعنا ان فيس ضرب و دبح فى الحى السادس ..... نتصل بزمايلنا الى فى الحى السادس ... يقولوا مفيش حاجة ..... احنا سمعنا ان الناس بتتسرق فى الحى التانى .... احنا فى الحى التانى يا عم !!! مفيش حاجة و الله !!!!!

و تم تجنب نشر الشائعات بالشكل ده .... ده غير موضوع الهاربين الى اتحصنوا فى مدرسة فى الحى السادس و ده احنا كنا سامعين تراشق بالاسلحة النارية المتختلفة طول الليل و تم القاء القبض عليهم صباحا

المشكلة فى رايى ظهرت بعد 4 ايام من السهر و اللجان الشعبية , الا و هى الزهق ... الشباب زهقوا و بدأوا يغيروا كلامهم 180 درجة .... فبعد ما كان السباب متحمسين جدا للثورة و ان مبارك يمشى ... بداوا يقولوا ان من الافضل ان مبارك يكمل فترته ... اهو الراجل حلف انه مش حيترشح تانى و هو كبر و عاوز يروح يعمل عمرة و يعتزل .....

و لما كلمت الشباب دى لمدة اكتر من ساعة .... واحد قالى ... بصراحة انا زهقت .. و انا عاوز اروح اقعد على الكوفى شوب مع اصحابى .. ده انا بقالى اسبوع مشربتش شيشة !!!! :sd:

انا مرضتش اعلق عليه و لا اتكلم معاع اكتر من كدة ... اصابنى نوع من الاحباط

رد: مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله

اقتباس:

المشاركة الأصلية كتبت بواسطة ahmed_eng2001 (المشاركة 726719)

احنا بارضوا كان نفس الاشاعات اللى كانت بتحصل عندنا وبينى وبينك ساعتها كنت انا كمان بدات ازهق من الثورة وكدا بس بعد ما فهمت ان كل ده معمول علشان يكرهونا فيها

غيرت راى تماما

رد: مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله

اقتباس:

المشاركة الأصلية كتبت بواسطة sayed2077 (المشاركة 726649)

هههههههههههههه ينهار ابيض

مسدس مره واحده

نورت الموضوع يا باشا

ده المسدس ده اهم حاجه
و انا نايم بيبقى معايا
و انا نازل بيبقى معايا
فى العربيه بيبقى معايا

يعنى مش بيفارقنى لحظه

لانى حالف اللى هيتعرضلى هفرغ المسدس كله فى دماغه و مش هيهمنى حد

:01FDAB~189::01FDAB~189:: 01FDAB~189::01FDAB~189::0 1FDAB~189:

رد: مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله

والله ذكريات لا يمكن الواحد ينساها
بدأت معايا يوم الثلاثاء 25 يناير 2011 لما سمعنا إنه فى مظاهرات فى القاهرة قلنا شوية شباب بيعملوا مظاهرات وبعد شوية الأمور هاتهدأ وترجع زى الأول وشويه شويه الأمور بدأت تتطور وبدأت شبكات المحمول تقطع وما فيش نت ومابقاش قدامنا غير التليفزيون
يوم الجمعه 28يناير2011 كنا معزومين على الغدا أنا وأخويا وزوجتينا والأولاد عند ابنتى فى منطقة السيوف وكانت عروسه جديدة وحضرت لنا مالذ وطاب من أصناف الطعام ، ونحن جالسين أمام التليفزيون نتابع ما يحدث بالقاهرة وبعض المحافظات ، ثم جاء بيان ببدء حظر التجول من الساعة السادسة ولن يسمح لأحد بالسير بعد هذا الميعاد ، تركنا الطعام على السفرة وأمامنا ربع ساعة للوصول لسكننا فى سموحه ، وحاولنا العوده عن طريق شارع جميله بو حريد ثم الزراعى وحتى سموحه ولكن تم إبلاغنا بقفل كوبرى العوايد وإضطررنا للعوده عن طريق رافد ميامى من الطريق الدولى ,اثناء سيرنا شاهدنا كل ما يمت للشرطه بصلة وقد إحترق عن آخره سيارات وموتوسيكلات الشرطة ومبانيها ونقاط المرور ووصلنا منزلنا بعد لأى شديد
فى الأيام التالية شكلنا لجان شعبية من شباب المنطقة ورجالها وأطفالها وكل قد حمل أى شيئ يدافع به عن منزله ، وقد قمنا بغلق جميع التقاطعات ومنع أى مركبة من السير ومر علينا سيارات تابعة للشرطة العسكرية وأعطونا أرقام تليفوناتهم للإبلاغ عن أى شيئ وسمعنا بإشاعات قطع المياه وقمنا بإخراج جهاز تليفزيون وضعناه أمام باب العمارة لمتابعة مايبث من أخبار ، ومن ضمن سكان عمارتنا أحد ضباط الشرطة الذى سألنا عنه زوجته فأفادت أنه بخير ولكن عنده أوامر بالبقاء فى مديرية الأمن القريبة من عمارتنا للدفاع عنها وكنا نسمع دوى الطلقات ونشم رائحة الغازات المسيلة
خلال هذه الفترة أغلقت معظم المحلات وكنا نبحث عن أماكن لبيع الخضروات والخبز فكنا نجدها بأسعار مبالغ فيه
ذكريات كثيرة مررنا بها وندعو الله أن تستقر حال بلدنا وننعم بالهدوء والطمأنينة

رد: مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله

اقتباس:

المشاركة الأصلية كتبت بواسطة yahiaashraf (المشاركة 727031)

لعلم حضرتك انا عاشق للاسلحه الناريه وخصوصا
الكلاشنكوف يمكن كان نفسى يجيبوا ليا اخ علشان ادخل الجيش علشان بس استخدم السلاح الاكثر من رائع ده
ومن كتر الفديوهات اللى بتفرج فيها عن السلاح ده
بقى عندى المعرفه الكامله بكل اجزاء السلاح ويمكنى فكه الى اجزاء وتركيبه مره اخرى بجد سلاح اعتمادى درجة اولى
وفعلا لو سمحت الفرصه فان شاء الله هجيب سلاح اكيد
وربنا ميجبش مواقف يخلينا نضطر نستخدمه فيها

وربنا يستر

تحياتى لك