مصر موتورز مجتمع السيارات - الناس اللي حاطة صورة شفيق في التوقيع، ممكن تقنعوني مأيدينه ليه؟؟؟؟؟

مصر موتورز مجتمع السيارات (https://www.masrmotors.com/vb/index.php)

- ثورة الحرية 25 يناير (https://www.masrmotors.com/vb/forumdisplay.php?f=177)

رد: الناس اللي حاطة صورة شفيق في التوقيع، ممكن تقنعوني مأيدينه ليه؟؟؟؟؟

للاسف قناة الفراعين و توفيق عكاشة لهم تأثير كبير على شريحة كبيرة منهم الجاهل والمتعلم وللاسف كثير منهم متخيل ان شفيق لو نجح هيحل ازمات البلد مش هتزيد المظاهرات والاعتصامات بسببه زى ما كان المجلس العسكرى وهم رجال مبارك المخلصين هم سبب كل المظاهرات بتعمد عدم الاستجابة لمطالب الشعب الا بالمليونيات

رد: الناس اللي حاطة صورة شفيق في التوقيع، ممكن تقنعوني مأيدينه ليه؟؟؟؟؟

والله فعلا مش عارف الناس ديه هتدى صوتها لشفيق لييه واولهم الحج ابويا
قعد يقولى انا هنتخب صباحى صباحى ورجع من الانتخابات لقيته بيقولى انا انتخبت شفيق :12422A~17::12422A~17:

وقلتله ليه عملت كده لقيته قعد يقولى علشان الاستقرار وهو الوحيد اللى فاهم وهو الوحيد اللى خبرة وبصراحه مش عارف ايه حكاية الخبرة ديه مع شفيق ولقيت كل واحد من مؤيدى شفيق بيفضل يقول الاسطوانه المشروخه هى هى
الناس للاسف مبقاش عندها حلم تغير حاجه كل واحد عاجبه حالة الشركات الكتير اللى اتخصخصت ديه مين اللى عملها كده نهر النيل والسياسة الخارجيه الفاشله والمعامله السيئة اللى بيلاقاها المصريين فى بلاد الخارج مين المسئول عنها اهمال المواطنين فى كل حقوقهم وعد احترام ادميتهم للاسف ده مشروع كان بيتنفذ على مدى سنين من مبارك واعوانه انه ينيم الناس ويسحب منهم ادميتهم ويشيل الاخلاق والكرامه من الناس و يعودهم على الذل والاهانه حضرتك الى يومنا هذا لو روحت تعمل محضر او دخلت قسم تلاقى ظابط لسه بنجمتين يبقى قاعد على الكرسى وحاطط رجل على رجل وبيلعب فى الموبايل بتاعه تيجى تكلمه يقولك اطلع فوق لو رفعت قضيه على اى حاجه او ليك حق عاوز تاخده تكون خلفت وعيال عيالك هيكون لسه هيتنطقوا الحكم فى زمنهم (لينا قضيه بقالها اكثر من 25 سنه اه والله و المضحك انها هتتعاد من اول وجديد يعنى 25 سنه كمان ) القضاء البطيىء الى فى البلد ده ضيع حقوق ناس كتيير ولو كان القضيه على مزاجهم كانت تخلص فجلستين

وفى الاخر يجى يقولك شفيق الخبرة لو كل حاجه كانت بالخبرة يبقى طالب بيسقط فى المدرسة بقاله 10 سنين كان افضل من مدرس لسه متعين جديد

ويقولك الاخوان وحشيين على الاقل مشفناش منهم حاجه وحشه لعمرهم قتلوا حد و لا سرقوا حد ولا جوعوا حد والبلد اللى مسكوا حكمها ادينا كلنا شايفنها دلوقت وهيا تركيا ياريت الكل يشوف بقيت عامله ازاى دلوقت
ومش هقول غير ان كل واحد هينتخب شفيق اتمنى لو عنده الشجاعه الكافيه يقول (اللهم احشرنى مع سيادة الفريق احمد شفيق ) وعلى فكره انا سألت اتنين السؤال ده منهم واحد بيحب حسنى مبارك واحمد شفيق قوى ولما قولتله قول كده راح قالى (اللهم احشرنا مع عبادك المؤمنين) ههههههههههه وواحد تانى وهو الحج والدى بصراحه ومرضيش يقولها وده معناه ان كل واحد عاوز ينتخب شفيق عارف انه مش كويس بس بيبقى فيه حد مغمى على عينه وعمال يقوله شفيق خبرة شفيق خبرة شفيق خبرة هههههههههههههههه
والله يهدى الجميع

رد: الناس اللي حاطة صورة شفيق في التوقيع، ممكن تقنعوني مأيدينه ليه؟؟؟؟؟

[SIZE="4"]يا عم فراعين ايه بس يا ريت الناس تنزل من البرج العاجى ال عايشه فيه عشان تعرف ليه الناس انتخبت شفيق.وللعلم فى ناس بتنتخب شفيق بالعند عشان الأخوة المبجلين ال فى الأعلام عمالين يقولوا فلول و جهلة....طب اهو بالعند حننتخب شفيق. والله فى ناس كتير اعرفهم كده

طب حضرتك تعرف ان شفيق اسهمه نزلت بعد حكم المحكمه.لاكن بعد المظاهرات اسهمه طلعت تانى و كأنه بيقول نشكر حسن تعاونكم معانا و المقصودين هنا الاخوة بتوع المظاهرات[/SIZE]

رد: الناس اللي حاطة صورة شفيق في التوقيع، ممكن تقنعوني مأيدينه ليه؟؟؟؟؟

بكره كلنا نموت وربنا هيحسبنا على اختيارتنا بس انا عمرى مهختار واحد حرامى وسهل السرقة لاسياده من فلوس الناس الغلابة ولا واحد لسه دم اخواتنا الشهداء المصريين متعلق فى رقبته

رد: الناس اللي حاطة صورة شفيق في التوقيع، ممكن تقنعوني مأيدينه ليه؟؟؟؟؟

الرد الصريح نيابه عن مؤيدي الفريق احمد شفيق
:0832F7~168:
احبائي انا الضحية الوحيده اللي ممكن يتكلم او يدافع عن نفسه ...
اتركوني الاول اشرحلكم شخصية مؤيدي شفيق (وهنا انا بتكلم عن المؤيد مش اللي انتخبه وخلاص)
اولا اغلب مؤيدي شفيق ناس بتفكر اكثر ما بتتكلم مع الاخرين
يعني لما الموجه تبقى رايحه كلها لاتجاه وتلاقي شخص مضاد للتيار السائد ومقتنع براي مخالف لازم تعرف انه فكر وقرر وليه وجهة نظر على خلاف الموضات الجديده زي موضة حازمون لمتدينين او موضة حمدين للشباب وموضه ابو الفتوح للوسطيين والمنشقين عن الاخوان (مع احترامي للجميع)
ثانيا وده الاهم ... اصناف الناس دي وبتفكر في ايه ؟؟

1- رجال اعمال واصحاب شركات ومحلات وحرفيين (يعني اصحاب اعمال حره).. ودول يعشقو الاستقرار لدوام مصالحهم ورؤيتهم ان العهد السابق افضل الفترات اقتصاديا لاتصافها بالاستقرار .. ملاحظه هامه لا يجوز ان نطلق على هؤلاء منتفعين لان اغلبيتهم شرفاء اختارو العمل الخاص بالتدرج بعيدا عن القطاع الحكومي الملئ بالفساد وطبعا دول بيعشقو العسكر لانهم رمز الامان

2- اشخاص قريبين من بعض التيارات الاسلاميه ولهم تجارب سيئه معهم .. ودول عندهم فوبيا الاسلاميين ازاااي؟؟؟
يعني راجل بسيط كان معتقد ان اي حد من الاخوان او السلفيين هو ملاك لا ينطق عن الهوى وفجأه صدم فيه في موقف معين ينافي الصوره الورديه فقرر ان الناس دي منافقه (تعميم مرفوض لكن الجميع يستخدمه).. ويضم اليهم المرعبوبين على الدوله المدنيه وده موضوع كبير يستحق الشرح بالتفصيل ..

3- عائلات واقارب العسكريين او اقارب موظفي الطيران المدني .. العسكريين دا ولاء عقدي بالنسبه ليهم ان العسكري رجل شريف ويحترم كلمته ولا يخون وطنه ..
اما موظفو المطار فعلى خلاف ما يشيعه عصام سلطان وشلته فعن معرفه شخصيه موظفو المطارات والطيارين فخورين بما فعله شفيق ويتباهون بين اقرانهم من الطيارين العرب بما وصلت اليه المطارات من تقدم عمراني وتكنلوجي ...

4- كارهي الزخم الثوري ... دا الجزء الاعظم من حزب الكنبه كرهو بقية المرشحين من تصريحاتهم الثوريه في المليونيات وهجومهم الشديد على الجيش متناسين عشق المصريين -خاصة كبار السن - للجيش وقادة الجيش ودول بيعتبرو ان اللي يشتم عسكري او قائد في الجيش هو خائن وعميل ..

5 -محبي الكاريزما دي اهيف فئه ولكن لها احترامها ايضا .. الناس اللي شايفه فيه كرايزما وكراكتر الرئيس وانه رجل راقي سليل عائله عريقه ومظهر انيق ..

6- طبعا لا نتناسى او نتاجهل جزء لا بئس به معترض على الثوره من الاساس وشايفها مخطط صهيوني وان الاخوان تعاونو مع حماس في اقتحام السجون وقتل الثوار و ...وكلام من ده ( نحترمهم برضه لاننا لا نعلم كل الحقائق حتى الان )

7- الاقباط والصوفيون يشتركو حسب التصنيفات السابقة اضافة الى خوفهم من الاسلاموفوبيا ..(محقين بعد التصيحات الاخيره)
الصفه المشتركه التى يراها كل اولئك في الفريق انه شخص محترم لم تثبت عليه جريمه واحده في حين ان اغلب زملاءه من الوزراء في السجون بتهم متعدده .. وانه رجل ناجح في عمله وصريح وغير متلون
والاهم من كل ذلك صدقة وتلقائيته (ودي اللي بتخلى منافسيه يستغلو تصريحات قاتله ليست في مصلحته لتشويه سمعته )

رد: الناس اللي حاطة صورة شفيق في التوقيع، ممكن تقنعوني مأيدينه ليه؟؟؟؟؟

اقتباس:

المشاركة الأصلية كتبت بواسطة frdnwr (المشاركة 688119)

السلام عليكم،
أنا لفت نظري ان أكتر من واحد حاطط صورة أحمد شفيق في التوقيع، ونفسي افهم ايه الحكاية... انتو مأيدينه؟ مقتنعين بيه؟ أنا شايف انو لو فاز مش هيجيب جديد، هترجع مصر زي ما هي الله اعلم كمان كام 30 سنة...

اتمنى الاقي آراء مقنعة فعلا ....

اقتباس:

المشاركة الأصلية كتبت بواسطة fourseasons (المشاركة 688148)

من اعطى لشفيق صوته ؟

اعطاه كل صاحب مصنع او شركه اغلقت بسبب الاعتصامات وقطع الطرق !
اعطاه كل مريض اوطالب لم يتمكن من الذهاب او تعثر في الرجوع بسبب المليونات الغير مبررة !
اعطاه كل صاحب محل اغلق لمجرد ان حظه سئ وكان يقطن بوسط البلد !
اعطاه كل ام لم تتمكن من زياره اهلها او قضاء طلباتها لان الاعتصامات لم تراعى حرمه شوارع او بيوت
اعطاه كل من ازعجه حوار الشباب وتهكمهم على الكبار واستخفافهم و سبابهم باقذر الالفاظ لمن يخالفهم الرأي !
اعطاه كل من فقد الثقه في الشخصيات العامه من الاعلامين الذين كانوا يتقاضوا الملايين بسبب متاجرتهم بالام البسطاء !
اعطاه كل شاب كان امله في فرصه عمل وتعثرت بسبب خوف صاحب العمل مما ستؤل اليه الامور !
اعطاه كل من يعرف جيدا تاريخ الاخوان الدموي وحاضرهم الكاذب في مجلسي الشعب والشورى !
اعطاه كل من يعرف ان الخبرة والدراما السياسيه والوقوف في المظاهرات ربما تصنع زعيما ولكن لا تصنع رئيسا !
اعطاه كل من يفرق بين القادر على تحقيق البرنامج وبين من يتفوه بالاحلام دون سابق انجاز !
اعطاه كل اب وكل ام يريدون الاستقرار للبلد !
اعطاه كل من ايقن ان الرئيس القادم يجب ان يشبه الكثيرين من الوسطيين في الدين دون مغالاه !
اعطاه الاقباط الذين احبو الحياه المدنيه ويسعون للديموقراطيه بعدما هرعو من الفكر المتطرف ومن احلو دمائهم وسرقه محلاتهم وممن يريدونهم دافعين جزيه !
أعطاه كل من اهينوا لعدم مشاركتهم في التحرير لا نشغالهم بايام اللجان الشعبيه وبعدها اصبح يتساوى الشهيد بالبلطجي !
اعطاه كل من لم يهين الجيش والمؤسسه العسكريه التى ظهرت في ايام الثورة وانتشرت لتطمئن الناس على بيوتهم وارواحهم !
اعطاه من لم يجدوا مبرر للهجوم على الداخليه وحرق امن الدوله والتعدي على رجال الشرطه والاقسام !
اعطاه من وجدوا الاستهتار بهيبه الدوله الى ان وصل الهجوم على وزارة الدفاع !
اعطاه كل من عرف من سيحقق له ما يطمح من استقرار وعمل وحياه !

انا واحد من ال فاتوا دول و فى بند واحد او بندين وللعلم انا عمرى ما كان ليا فى السياسة ولا غيروا ولا كان حد بيعبى و يديلى فى جيبى.انا الحمد لله شقيت من اول ما اتخرجت لحد دلوقتى و شيلت زبالة و اشتغلت كل حاجه شريفة و مقولتش لا.مع انى بحكم شهادتى مهندس والحمد لله شغال بشهادتى دلوقتى بس بعد تعب سنين.مش لازم تلاقى حد ياخد بأيدك لاكن ادعى ربنا وربنا ان شاء الله حيكرمك

برافو سبقتوني..

رد: الناس اللي حاطة صورة شفيق في التوقيع، ممكن تقنعوني مأيدينه ليه؟؟؟؟؟

اقتباس:

المشاركة الأصلية كتبت بواسطة sayed2077 (المشاركة 688156)

ويقولك الاخوان وحشيين على الاقل مشفناش منهم حاجه وحشه لعمرهم قتلوا حد

أشك فى الجملة دى مع احترامى لكلام حضرتك