مصر موتورز مجتمع السيارات - مكملين للناس اللى مش فاهمين

اقتباس:

المشاركة الأصلية كتبت بواسطة AboNoRa (المشاركة 588708)

http://www.youtube.com/watch?v=2TmnX0X0R28

للى مش فاهمين نزولنا .. .

للى معاشوش ظلمنا ولا قهرنا وحسوش نزولنا

للى مداقوش مر جوعنا .. اللى ماناموش فى الشوارع كالدبايح

كملوا ف الليل عشاهم م الصفايح ..

للى مش فاهمين مهانة الرجال
قهر الرجال ..
للى بيقولوا علينا اننـا حبة عيال ..
احنــا مش حبة عيال.

احنا شوفنا النيل بينشف فى البيوت
واما يجرى ...يتفرش حمام سباحة فى قصر باشا

مستكترين فيا الغضب .. مانا كنت غرقان فى البشاشه

كنت راضى ببوق مايه واقول دى هنا
كنت ببكى فى القصايد ..كنت بشتم فى القصايد..
تتقطع ايدى اما قولت حبيبتى ماتت

للى مش فهمين نزولنا فى الشوارع ..
احنا بندور على الحلم اللى ضايع ..
احنا جرينا النفس فى عروق عيالنــا
يكبروا فاهمين حاجات مافهمنهاش..
اقبل انى اعيش عشان حلم وقضيه
بس ماقبلشى انى عمرى يضيع بلاش
مااحنا سيبنلكوا البلد مانصفتوهاش

ماتلوموش على اللى اتعجبن فى المعجنه واللى اتظلم
واذا كنتوا فاكرينا غنمـ .. على رزقكم أنا جِدْى فاق
فاكرين زمان حذرتكم
مستنى ايه من طفل رَبُّوه بالزعاق غير المشاكل والخناق
لَذَا كنتوا فاكرينا غنم
على رزقكم أنا جِدْى فاق
أرزاق..

للى مش فاهمين نزولنا فى الشورع ..
الحكومة عودتنا على الشوارع
بيتتنا فى الشوارع
نيمتنا فى الشوارع
الحكومة سكرت على نفسها كل البيبان
خوفتنا من البيبان ..
فاترمينا كلنا فى حضن الشوارع
اكتر مكان لقيناه امان ..
للى خايفين على البلد لحسن تموت
ماتخافووووش
الموت سكوت ..
واحنا مش فى الخطه اصلا ان بكرة يكون سكوت ..

احنا شايلين حملنا ومكملين ..
بكرة بيشاور علينا واحنا مش مستعجلين
مااحنا لينا كام سنه متجندلين
صابحين فى طين .. نايمين فى طين
احنا بنأسس بلد تسمع شكاوى المظلومين
نشتغل نلقى عرقنا قصاد عنينا
مش فى جيب النصابين

نشتكى نلقى اللى يسمع شكوة الناس الغلابه الطيبين
احنا بنشكل بلد لاهى خايفة من صوت الاذان ولا خايفة من ان الكنائس تتبنى
احنا بنأسس وطن عافيان غنى
مش وطن يخدم 15 نفر ويبات جعان
احنا مش عاوزين وطن مهزوز مهان
"المصرى مش لايقة عليه كلمة مهان"

يقولك احنا عملنا فوضى
احنا بردوا عملنا فوضى !!
احنا كنا بنتجلد ونعيش ونرضى
واحنا كنا بنتسرق ونعيش ونرضى
كانت الاسعار بتغلى وكنت برضى
والشرطة بتفتشنى عااادى ،، فى اى وقت فى اى حته وبدون مناسبة
وكنت برضى
والانتخاب من سن كام لسن كام "معرفشى ليه"
وكنت برضى
جاى انهردة تقولى احنا عملنا فوضى؟؟
طب فوضى فوضى

ماسورة الغاز بتقفلها لصعيد بلدك ولتل ابيب بتفتحها
مسورة الغاز بتقفلها على ولادك وللاعداء بتفتحها
وناس شقيانه طول الليل عشان لقمه ..
وغالى ياخدها على الجاهز .. اللهى يارب يطفحهــا
وناس تسكن قصور بتدور .. وناس الجوع بيدبحها
وناس بتموت فى الميادين فدى الثوره ...
وناس خايفة على مشاعره لنجرحهاااا

احنا هانكمل وهانزق البيبان
يارب انت المستعان
واللى بيقولوا علينا مغيبين ومسطحين ومجوفين وبوابين ومعفنين ومنتنين وبلطجيه وماجورين
قولو براحتهم .. احنا بردوا مؤدبين
ومسالمين
بس احنا بردوا "مكملين"

هشام الجخ ,,,,

رائع يا ابو نورة
فعلآ مصر بقت منقسمة نصفين اغنياء وفقراء
والطبقي الوسطي اختفت
شوفت الفلل و القصور الي في القاهرة الجديدة و الرحاب و مرينا
وشرم الشيخ دي لوحدها مصيبة برغم كل التنمية الي موجودا فيها الا ان عدد الشباب الي راحوا اليها
طلبآ للعمل قليل جدآ وعملين يقولو احنا بلد سياحي ومش عارف اية طيب الشباب مش لاقي شغل لية؟؟؟؟؟؟؟

بس انشاء اللة البلد هتتعدل و الصورة تبقي احلي
علي يد هذة الجيل الحالي و القادم انشاء اللة