مصر موتورز مجتمع السيارات - فكرة جديدة و بسيطة و فعالة و رخيصة .... تبقي حلوه

مصر موتورز مجتمع السيارات (https://www.masrmotors.com/vb/index.php)

- مكافحة سرقة السيارات (https://www.masrmotors.com/vb/forumdisplay.php?f=193)

- - فكرة جديدة و بسيطة و فعالة و رخيصة .... تبقي حلوه (https://www.masrmotors.com/vb/showthread.php?t=70255)

رد: فكرة جديدة و بسيطة و فعالة و رخيصة .... تبقي حلوه

اقتباس:

المشاركة الأصلية كتبت بواسطة hossamhussein0 (المشاركة 535490)

بسم الله الرحمن الرحيم

الفكرة مقتبسة من كهربائي سيارات معرفة بس دماغه حلوة و نظيفة

المطلوب : وحدة سنتر لوك بالريموت و تكون نوع جيد يمتاز بالمدي الكبير قدر الامكان و دي في التوفيقية بـ 125 ج تقريبا مدي حقيقي 70 متر
(السنتر اللي هنشتريه مالهوش اي علاقة بالابواب اطلاقا)

الفكرة
تركيب وحدة السنتر في مكان ما مستخبي و توصيل قرب السنتر الامامية (العمومية الخمسة طرف ) لتعمل كسويتش لفصل كهرباء وحدة الكمبيوتر و طلمبة البنزين في وقت واحد عند استخدام ريموت السنتر عن بعد

التطبيق

وحدة كباس الباب بها 5 اطراف للسلك 2 كهرباء + و - و دول بيبقو متصلين بالوحدة نفسها و بيأخذوا امر باتجاه التيار علي حسب امر الريموت

و 3 سيجنال مثل الكتاوت 5 طرف تماما للسهولة هنشير الي اطراف السيجنال علي انها (1 و 2 و 3 ) بحيث اثناء الفتح مثلا يكون هناك تلامس بين طرفين منهم 1 و 2 مثلا و في حالة الغلق ينتقل التلامس ليصبح ما بين 2 و 3 مثلا .

و بالتالي هنشوف فين الفردة اللي رايحة للكنترول (كتغذية عمومية بالكهرباء) و نوصل السلك بتاعها ما بين 1 و 2 مثلا فبذلك يصبح عند امر الفتح بالريموت مثلا هذين الطرفين في تلامس و بالتالي يمر التيار الكهربائي الي الكنترول عادي خالص كان مافيش حاجة ، و عند امر الغلق تنقطع الدائرة و تفصل التيار و تقف السيارة و مش ممكن تدور تاني الا بأمر جديد بالفتح من الريموت.

و بنفس النظرية هنشغل الكباس الثاني علي سلك طلمبة البنزين و نتأكد ان التوصيل في الكباسين لنفس الامر واحد يعني مع الفتح الكهرباء رايحة للاثنين مثلا و مع الغلق تنقطع عن الاثنين معا

و ذلك للتأمين المزدوج مش اكثر ،،، يعني لو عملنا القصة دي علي احدهما فهو كافي تماما لايقاف السيارة .

مميزات الفكرة

انه حتي لو تعرض احد (لا قدر الله ) للاستيلاء علي سيارته بمفاتيحها (اتسبت في السكة يعني) فيمكنه ان يتجنب الاذي و المواجهة البدنية و يترك السيارة لهولاء الاوغاد و هو علي يقين انه سوف يتمكن من ايقافها عن بعد و همه مش هيعرفوا يدوروها و يمشو بيها بالرغم انهم وخدنها دايرة و بالمفاتيح كمان و ده يديله الفرصة ان ينجوا بنفسه و بالسيارة كمان و وقت كفايه يقدر فيه يعمل اي حاجة ( يزعق و لا يلم عليهم الناس او شئ من هذا القبيل)

ممكن استخدام الموضوع ده كتأمين للسيارة عقب كل استخدام يعني لما توصل مشوارك و تركن و تنزل تبقي تفصل الكهرباء بالريموت و لما تبقي ترجع بالسلامه بدوسة زرار يبقي كله تمام.

توصيات لضمان الاداء الامثل

علشان احنا هنخبي الكباسات في حته سرية (تحت شلته الشنطة مثلا لطلمبة البنزين) و تحت فبرة الدركسيون او تحت التابلوه من جوه لسلك الكنترول ، و علشان كمان معظم الاجهزة (السنتر بالريموت) الموجودة في السوق صيني او تايواني تعبان و لو علق كباس فيهم هتبقي مشكلة فمن الموصي به ان يتم فك الصباع المتحرك الخاص بالكباس حتي نضمن انه مش هيتزنق في حاجة اثناء العمل ، لاننا كمان مش محتاجينه في شئ احنا محتاجين المايكرو سويتش اللي بداخل الكباس فقط

احتفظ دائما بريموت السنتر في مكان بعيد عن المفاتيح ( في عروة من البنطلون مثلا او لو ماشي في حته قلق او اضطررت للسير في اماكن نائية ليلا ممكن تخليه في الشراب حتي ) و هوه كمان شكله غريب عامل زي حجر البطارية القلم و ده هيخلي محدش ياخذ باله من كونه ريموت اصلا .

و اخيرا اؤكد لكم ان الموضوع ده متجرب يا جماعه و الله و كان الكهربائي مركبه في تاكسي فيرنا ابيض و تعرض سائقه لهذا الموقف و اشتغل و ربنا سترها مع الراجل و انحصرت الخسائر في محفظته و المحمول و كام بونيه علي الماشي كده.

وربنا يستر طريقنا جميعا و الله خير حافظ

اشكرك جداا اخى حسام على هذه الفكرة الرائعة... وياريت عنوان الكهربائى لو تعرفه

رد: فكرة جديدة و بسيطة و فعالة و رخيصة .... تبقي حلوه

هى فكره هايله بس انا اخاف اعملها لحسن حاجه تبوظ فى العربيه

رد: فكرة جديدة و بسيطة و فعالة و رخيصة .... تبقي حلوه

اقتباس:

المشاركة الأصلية كتبت بواسطة GoldMan (المشاركة 536045)

اشكرك جداا اخى حسام على هذه الفكرة الرائعة... وياريت عنوان الكهربائى لو تعرفه

الكهربائي اسمه الاسطي محسن و عنوانه تقاطع شارع 22 مع شارع منشية التحرير - عين شمس و هوه راجل كبير في السن و مخضرم و بيتقي الله في عمله و مصنعياته اقل من السوق بكثير - كل مشكلته انه بطئ شوية و بيفتح المحل مش قبل 12 ظهرا و بيشتغل يوم الاحد و بيرتاح يوم الجمعه روح عنده و قوله انا من طرف الحاج حسام و عاوز اعمل كذا كذا

بس ياريت تشتري جهاز السنتر قبل ما تروح علشان هوه معندهوش

رد: فكرة جديدة و بسيطة و فعالة و رخيصة .... تبقي حلوه

اقتباس:

المشاركة الأصلية كتبت بواسطة TheSantos128 (المشاركة 536095)

هى فكره هايله بس انا اخاف اعملها لحسن حاجه تبوظ فى العربيه

يا باشا تعالي نفكر فيها سوا

انت كل اللي هتعمله في ضفيرة العربية هو عمل كوبري علي سلك الكهرباء بتاع الكنترول و سلك الطلمبة بتاعت البنزين فقط لا غير ، يعني مافيش احتمال لبوظان اي حاجة ، ولو حبيت تلغي الكلام ده كله هتوصل السلك في بعضه تاني ، يعني الموضوع في اللذيذ

التكلفة
هتشتري وحدة سنتر بـ 120 - 150 ج مثلا و هتدفع مصنعيات كام يعني 30 - 40 ج بالكثير ،، يا سيدي لو ماعجبكش الموضوع اهي وحدة السنتر هتنفع في اي حاجة ثانية مش غرقة يعني

تعالي بقه نفكر في الايجابيات

هتنام و انت مطمن و هتركن في اي حته و انت مطمئن انك علي الاقل مش هتنزل ماتلاقيش العربية لا قدر الله

اذا ما تعرضت لموقف بايخ زي ما بنسمع حوالينا سطو مسلح و قطع طرق و نيلا و قرف (لا قدر الله) فانت تنقذ حياتك و كمان تنقذ سيارتك ....

يبقي نعمل القصة دي ولا لأ ؟؟؟؟

زملائي الاعزاء في المنتتدي الغالي ،،، أؤكد لسيادتكم ان هذا الموضوع هو عمل خاص لوجه الله تعالي عسي ان ينفع احدنا و ننال ثواب الدعاء و اكبر دليل علي ذلك ان الفكرة مشروحة بالتفصيل و ممكن تنفذها عند اي حد و ججهاز السنتر هتشتريه من اي حته يعني انا ماليش اي مصلحة علي الاطلاق الا ان افيد غيري كما استفيد من الاخرين

رد: فكرة جديدة و بسيطة و فعالة و رخيصة .... تبقي حلوه

جزاك الله كل الخير
فكرة رهييييييبة
تسلم ايدين و مخ الكهربائى
و تسلم ايديك الى كتبتلنا الخير

رد: فكرة جديدة و بسيطة و فعالة و رخيصة .... تبقي حلوه

فكرة رهييييييبة

رد: فكرة جديدة و بسيطة و فعالة و رخيصة .... تبقي حلوه

فكرة رائعة :danceW7::018A1D~146: