رد: ثورة ضدد بروتون
 

انا اسف لو زعلتك في حاجة يا فليكس
اولا انا مقلتش التوكيل ملاك نازل من السماء لكن هو من احسن التوكيلات في مصر ونطالبة بالمزيد
ثانيا حضرتك انا غيرت في التوكيل علبة دركسيون وانا في اول 1000 كم ومدفعتش ولا مليم
دلوقتي انا ماشي بالعربية مشاء الله 75 الف ايوة 75 الف كم في سنة والحمد لله عيب العلبة طلع في عدد محدود من السيارات وفي حالة تغيرة مبيظهرش تاني يبقي . دة من حقي علي التوكيل ولكن من حق التوكيل عليا اني اقول انة عمل دة ومدفعتش ولا مليم . بالمقارنة بتوكيل اخر مشهووووووووووور جدا غير موبينة لعميلة عندة ودفعها ثمنها وقال دة سوء استخدام
التوكيل دة مش بتاع ابويا انا عميل زيك بالضبط لو عمل حاجة غلط ابلغ حماية المستهلك ولو عمل حاجة مظبوطة ودة الطبيعي منة اشكرة انما احنا دلوقتي الناس في الشارع فاكر ان اسعار قطع الغيار الخاصة ببروتون حاجة فلكية ودة غير صحيح والدليل المقارنة بين اسعار الاسبارك والساجا
وانا معاك اطالب بالمزيد من التخفيض والمزيد تاني انما مقلش انها اغلي حاجة في السوق
الزجاج الامامي لجين تو 900 جنية والزجاج لاشهر ماركة كوري انت اكيد عارف قصدي اية ب3000جنية
استهلاك البنزين فعلاً مشكلة ومعك كل الحق ان سيارة 1300سي سي بتستهلك اكنها 1600 سي سي لكن عاوز حضرتك تقول حاجة بمنتهي الصراحة هل قال احد ملاك الساجا انهم يشعرون انهم يركبون سيارة 1300 ؟
كل الملاك وانا واحد منهم بنجمع علي انها اقوي من اي 1600 في مصر وحضرتك ادخل شوف الفيديوهات علي موقع ملاك الساجا حتزهل من اداء السيارة وتفوقها علي 1600 كتير جدا
ولو تسمح اضيف حاجة كمان
تعليق بعض الاعضاء اللذين لايملكون بروتون اصلاً
1-انا كنت ناوي بنسبة 90 % وانخفض حماسي وبقي لا يتعدي 30% الا في حالة انصلاح حال التوكيل / نقط مضيئة يعني الحال كله كويس والنقط المضيئة دي حاجة زياده/ الحل لتوكيل عز فعلا ودا عن تجربة لناس كتيرة مهندسين اعرفهم ان توكيل عز يجيب مدير لمركز الصيانة من ماليزيا بجد هايبقوا احسن بكتير وهايتحسن حالهم اكتر

2- و المصحف انا كنت ناوى اجيب جين 2 زيرو و بعدين قولت لما اجيبها استعمال نضيف حوفر 30 الف .. دلوقتى بقى مش عايز بروتون خالص

3- انا كنت ناوى اجبها بس عدلت على الفكرة علشان قطع الغيار وحجيب نيسان باذن الله
طيب لما هما ممعهمش بروتون بيبعتو شكاوي لماليزيا لية ؟
والناس الي فاكرة ان قطع غيار نيسان ارخص من البروتون فكرو يكلمو توكيل نيسان طبعاً لاء
الناس بتقارن اسعار التوكيل بأسعار المحلات في الشارع ودة مينفعش طبعاً عاوز تقارن قارن توكيل بتوكيل
واخيرا اتمني المزيد من عز العرب واتمني تحسن الخدمة اكثر واكثر وسرعة الانتهاء من السيارة
وحقول لحضرتك تاني بالخط الكبييير انا اسف لوزعلتك في حاجة لكن وجب الشرح
صلاح حكيم
<!-- / message --><!-- مواضيع العضو بوست بت -->

رد: ثورة ضدد بروتون
 

ازيك يااستاذ صلاح
اولا : بلاش كلمة حضرتك دي لاني انا اساسا اصغر منك وانا بعتبرك اخ كبير ليا
ثانيا : انا مش زعلان خالص ولا حاجة بل بالعكس ده طبيعي ان يبقى لكل واحد رايه خاص بيه وان التاني يحترمه

بص يااستاذ صلاح انا واحد زيي غير علبة دريكسيون مرتين ومستني تالت مرة كمان
بالنسبة لبداية التشخيص للمشكلة فهيا كلمة واحدة بس يتتقالي عن الاصوات اللي موجودة (طبيعي)
اي صوت طبيعي وموجود في كل العربيات كانو بيحسسوني اني اول مرة اركب عربية بل بالعكس انا ركبت عربيات اسوء من بروتون ومكنتش بسمع فيها اي حاجة
نيجي بقة لمكن الازاز واللي حصل كالاتي : غيرت اليمين مرة والشمال 3 مرات وطبعا الكلمة المعتادة دايما بسمعها وهيا (طبيعي) لولا اني نشفت دماغي واتكلمت بصوت عالي شوية وده مش من اخلاقي مكانوش غيروها
مشكلة استهلاك البنزين اللي في اغلب عربيات بروتون في مصر : عربيتي للاسف بتعمل حوالي 120 كيلو في الصفيحة وبدون تكييف ولا حرق جوة البلد .. قولي بقى هل ده يرضيك؟؟ مفيش مشكلة نعمل اختبار على الطريق السريع ونشوف النتيجة .. النتيجة طلعت 7 لتر لكل 50 كيلو متر بدون تكييف على سرعة 90 كيلو ... هل ده يرضيك برده ؟؟ كلمة من هنا وكلمة من هنا التوكيل يقولي الاستهلاك ده طبيعي .. طبيعي ازاي يعني وكنت هتجنن عليهم لما كنت بقارن الاستهلاك ده باستهلاك e46 2000 سي سي وان استهلاكها في البنزين اقل .. رد المهندس هناك قالي اصل موتور بروتون حامي ومعرفش ايه حسسني اني راكب فيراري بجد مش بروتون
دي شوية مشاكل واعتقد انها مش عندي انا لوحدي يااستاذ صلاح والباقية تاتي
نيجي بقى لموضوع الناس اللي كان نفسها تشتري بروتون بس محصلش نصيب والسبب في كدة هو التوكيل لان مينفعش الواحد يتجوز واحدة من غير مايسأل على اهلها .. نفس الكلام مع عز العرب حصل
الناس دي كان حلمها في العربية وعلشان كدة مخنوقة اوي ومستعدة تعمل اي حاجة علشان اللي ضيع حلمها ده ياخد جزاءه بس الموضوع موصلش ان الناس دي تبعت شكاوي على اساس انهم من الملاك لان الشكوى لازم تبقى موثوقة برقم الشاسيه والموتور الخ الخ

اسف لو برده ضايقتك في كلامي انا عارف انك هتتقبله كاني اخوك الصغير بالظبط وربنا يديم المعروف

تقبل تحياتي