رد: مساعدة فى عربية عاملة حادثة يا اخوان
 

الف سلامه عليك الاول من الحادث و كويس انها فى الصاج
بالنسبه للتصليح او التغيير لو لقيت ابواب استيراد نفس اللون طبعا يكون احسن لانك لو اشتريت لون تانى لازم ترش دواخل الابواب نفس لون العربيه و ده للاسف هايقلل فى ثمن السياره عند البيع و هو ده عرف السوق المصرى
لو مش لاقى نفس اللون صلحهم احسن بس انا شايف ان 1000 جنيه كتير عليهم شويه و طبعا انا مش شايف العربيه و مش عارف حالتها ايه اذا مستحيل اعرف هل التصليح هايرجع العربيه كويسه ولا لازم تغير الابواب و نصيحه منى اذهب ل كذا سمكرى و شوف شغلهم و انت اكيد هاتستريح لواحد فى الاخر تعمل العربيه عنده و على فكره لو اشتريت ابواب استيراد نفس اللون و محتاجين دوكو من الخارج مش مشكله اهم حاجه دواخل نفس اللون و حالتها كويسه .

رد: مساعدة فى عربية عاملة حادثة يا اخوان
 

الف شكر لرد حضرتك الله يسلمك المشكلة ايلى مزعلنى انها مش غلطتى دى غلطة ايلى خبطنى علشان عربيتة فراملها هربانة عموما انا لسة بسئل وربنا يسهل انا برضوا خايف اغير الابواب الاقيهم باينين فى العربية انهم مش بتوعها وتبقا العربية خردة وحسئل عند كذا سمكرى واشوف الاخبار يا ريت لو حد يعرف يا جماعة سمكرى كويس وبتاع دوكو يقولى وشكرا ليكم

رد: مساعدة فى عربية عاملة حادثة يا اخوان
 

اعتقد الابواب الاستيراد افضل .. ورش دواخلهم مفهوش مشكلة لان العربية مش حديثة يعنى ..

وبعدين مهما كان باب سليم احسن من باب معمول فيه سمكره ...


بس معلش علشان نبقى بنتكلم كلام دقيق .. يا ريت تصورلنا الخبطة علشان نقدر نحدد ايه الاحسن بشكل ادق ...

رد: مساعدة فى عربية عاملة حادثة يا اخوان
 

الحمد لله..قدر الله وما شاء فعل...نا برده كنت عملت من فترة حادثة ميكروباص طاح بالشنطة من ورا خلااها لوز...هى تويوتا أفانزا باب الشنطة وصل للكنبة التالتة والزجاج الخلفى كله بقى تراب فى الارض..بس الحمد لله انا روحت وسألت على الشنطة قالى تعمل 700 جنيه...روحت أحسن وعملتلها سمركة على البارد عند واحد ايديه تتلف فى حرير مش باين أى حاجة خااالص وركبت الزجاج وكل ده ب400 جنيه بدل ما كنت هشترى الباب والزجاج ب1000 جنيه...أصل حاجات تويوات فى السما ولحد دلوقتى مش عارف أشترى فانوس خلفى جديد عشان بيقولى ب750 جنيه فى التوكيل!!!لييه مش عارف:fun_10_1_124[1]:

رد: مساعدة فى عربية عاملة حادثة يا اخوان
 

الحمد لله على كل شى طيب يا ريت حضرتك لو من القاهرة تقولى السمكرى ده فين
علشان انا عمال اسئل ايلى يقولى سمكرة للجنب كلوه حيبقا 700 وايلى يقولى 600
+ الرش عامل 450 انا ايلى مجننى اننا لسة اى اول الشهر والغلطة مش غلطتى وانا ايلى مدبس فيها ولازم اصلحها ربنا يسر الامور لو تقولى عنوانة اكون شاكر ليك جدا

رد: مساعدة فى عربية عاملة حادثة يا اخوان
 

والله يا باشا انا سئلت كذا سمكرى النهاردة والاسعار مولعة نار مش عارف ليه مع انها مش عربية حديثة اوى يعنى وسئلت واحد بيفهم فى قطع غيار الاستيراد خوفنى من حاجة قالى البابين حيبانوا انهم مش بتوعها حتى لو رشتهم والرش بتاعهم جواه وبراه حيتكلف 600 لوحده كده + ثمنهم يعنى نقول 1200 انا شايف انو كتير بصراحة
وعموما ححاول اصور الخبطة وانزلها واشوف رائيكم الواحد يعمل ايه وشكرا ليكم

رد: مساعدة فى عربية عاملة حادثة يا اخوان
 

هو السمكرى ده بعد الزهراء بشوية وانت داخل على دار السلام...فى والله سمكرية كتير ايديهم تتلف فى حرير...شارع الجسر كله مليان سمكرية كلهم 10/10...بس ايه اللى بيقولك 600 جنيه سمكرة...ده أكبر نصاب عالمى...ليييييه:12F099~16 :...طيب صورلنا الخبطة عشان ممكن نعرف لو هتتعمل على البارد ولا عاوزة نار وشغلانة...أحسنلك تنزل تسأل على باب جديد استيراد بنفس اللون بتاع العربية بدل بهدلة السمكرة..ومين قالك ان الباب مش هيبقى هو هو..ليه انت هتجيب باب لانسر..ده باب عربيتك...أحسنلك باب جديد لان التكلفة هى هى لكن الباب الجديد هيبقى أمتن وأصلى لسة مش زى اللى اتبهدل واتعدل من تانى...انزل اتفرج على الابواب ولو حتى فى التوكيل