مصر موتورز مجتمع السيارات

اقتباس:

المشاركة الأصلية كتبت بواسطة حازم شاهين (المشاركة 351037)

المفروض إننا يبقى عندنا تقبل لحرية التعبير بعد كده
و وجود مظاهرة فى أى مكان فى مصر مش معناها توقف الحياة و ذهاب اﻷمن
المظاهرات بتحصل كل يوم أمام البيت اﻷبيض و فى كل بلدان العالم و ما بيحصلش مشاكل

لازم نبتدى نتعود على إن التظاهر حق زى كل الحقوق و طريقة من طرق التعبير عن الرأى
و المتظاهر مش مخرب و لا حرامى و لا عميل و لا خاين

و لازم نتوقع إن مصر لما يبقى فيها حرية و ديموقراطية حقيقية ممكن تحصل مظاهرات كتير
و كل إللى عنده مطلب ممكن يعمل مظاهرة

أصلا فى الفترة إللى فاتت كان كل شوية يطلع عمال من شركة أو هيئة يعملوا مظاهرة علشان يطالبوا بمطالب خاصة و ما كانش بيحصل أى مشاكل فى الحياة اليومية للناس العادية

المشكلة إللى حصلت لمصر كانت بسبب التعامل الأمنى فقط مع المظاهرات
محدش رضى يعبر الشباب دول بأى كلمة
لا و بالعكس يطلعوا بتصريحات تزود الغضب بين المتظاهرين "زى ما قال على الدين هلال إنهم ما بيمثلوش حد"

و أضيف على كده كمان إن مكانش فيه قدام الناس خلاص أى طريقة تانية علشان تعبر عن نفسها و تحاول تحسن حياتها حتى الكام عضو بتوع مجلس الشعب صفوهم ، و الناس المحترمة إللى كانت بتنفس عن الناس فى وسائل اﻹعلام طفشوهم و غيرها من الخطوات اﻷمنية الباطشة إللى كانت بتمهد للتوريث أو على اﻷقل التمديد

و المشكلة اﻷكبر كانت فى الخيانةإللى حصلت من الشرطة يوم الجمعة 28 يناير
إستخدمت القوة المفرطة مع المتظاهرين بدون سبب و كان الطبيعى إن إللى بيتظاهر لما يلاقى حد بيتعمد إذائه إنه يتمسك برأيه أكتر و يصمم أكتر على تحقيق هدفه و يتحول التظاهر لنضال و تتحول الإحتجاجات لثورة

و الخيانة اﻷكبر كانت فى إختفاء الشرطة و انسحابها من كل مكان

خلاصة كلامى إن فى المستقبل هتحصل مظاهرات كتير
لو فضلنا بس نتجاهلها و نتعامل معاها أمنيا فقط هيبقى فيه خطورة
لكن لو كانت المظاهرات و المسيرات بتم التعامل معاه سياسيا و سلميا
فمش هيحصل أى مشاكل خطيرة إن شاء الله
أما موضوع دفع فلوس فده ينفع فى مظاهرة فيها خمسين ستين واحد زى مظاهرات البلطجية بتوع الحزب الوطنى
لكن الآﻻف مش هتخرج إلا لو فيه مشكلة عامة و حقيقية تهم كل الناس

أخيرا لو كل واحد فينا حس إنه ممكن يوصل صوته للحكومة و المسئولين فيها يبقى هيتظاهر و ينزل الشارع ليه؟؟
لو كل واحد فينا حس إنه يقدر يغير عن طريق الإنتخابات هينزل الشارع يهبب إيه ؟

الحرية و الديموقراطية هى أكبر ضمان للأمان

انت جبت اخر الموضوع فعلا

لك جزيل الشكرGIFT4U