رد: ساعات بتدور على طول وسعات بتغلبني ولازم اكبسلها بنزين كورسا 97
 

متابع معاك

بأذن الله

رد: ساعات بتدور على طول وسعات بتغلبني ولازم اكبسلها بنزين كورسا 97
 

اخدت الميكانيكي بتاعي ورحنا عند العربية وقالي دور.....ويالاالعجب دارت من اول تكه من اول لفة للمارش راح قايلي ماهي سليمة وزي الفل اهه!!! غاظني بصراحة رحت مبطل ومدور تاني دارت برضو انا كنت هتهبل ....راح مطلع إفتكاسة كدة وقعد يئاوحني اني بدوس بنزين لما ادور قلتلو هو انا راكب 128 ولا اية ولا لادا قلي يمكن رجليك بتكون محمله على البنزين وانت بتدور عاوز يقنعني بأي طريقة !!
المهم فضلت دايرةكة شوية وراح راجع ورا عند الشكمان وقالي دوس بنزين على الأخر راحت مطلعة شبورة سودة من الشكمان من دوسة واحدة رحت دايس تاني عملت نفس السحابة السودة وريحت بنزين في الدخان الاسود دة
قالي دة بنزين نىء ولازم تشوف كهربة المتور ......انا مبقتش عارف العربية فيها اية؟؟؟؟ واللي هتقولهولي يا باشمهندس / سمير هعمله إن شاء الله

رد: ساعات بتدور على طول وسعات بتغلبني ولازم اكبسلها بنزين كورسا 97
 

أكشف على البوجيهات وشوفها مهببه ولا لا

حتلاقيها مهببه من أثر البنزين الزياده إللى بيروحلها من وحدة الحقن عندك

لأن على ما أفتكر الكورسا 97 ( حقن ألكترونى مركزى )

وهو ده إللى بيعمل السحابه السوداء مع كبس البنزين الزياده

المهم فعلا حاليا المفروض توضح الآتى

1- شكل حريق البوجيهات وياريت نشوف لها صوره ( الأربع بوجيهات بالترتيب

من جهة سير الكاتينه حتى البوبينا )

2- موقف العربيه من أسنهلاك البنزين ( عالى ولا معقول )

3- موقف المكنه من زيت التزييت ( بيقل ولا ثابت )

4- العربيه عامله كام ألف للآن

دول شوية أسئله بسيطه للتعرف أكثر وأكثر عن أبعاد الحاله الفنيه للمكنه

وبرضه مش عاوز أقولك دلوقتى

أن ممكن يكون حساس البوابه أو حساس حرارة مية التبريد فيه مشكله حاليا

على ماندرس الحاله بدقه أكثر

_________________

ولا تنسى

أن الصبر مطلوب وقت أعمال التشخيص

للوقوف على سبب فنى معقول وقريب من الدقه

رد: ساعات بتدور على طول وسعات بتغلبني ولازم اكبسلها بنزين كورسا 97
 

غبت عليك مش كدة....المهم بص ياسيدي انا عملا الآتي
1 - طلعت البوجيهات بس نسيت اصورهم لقتهم مهببين وكانوا نوع فرنساوي هجبلك اسمه بعدين لأني نسيت اخدهم من العربية
2- جبت طقم بوجيهات GM شمعتين وكانوا بمبلغ محترم
3- بالنسبة لإستهلاك البنزين .....عالي نوعا ما انا عادتا مش بفول بملا على قد المشوار بشرط المؤشر مينزلش عن آخر شرطة يعني بحط ب 30 جنية كل 5-6 ايام كدة
4- الزيت ......سليم ولسة مغيره من شهر
5- العربية عامله 117365 ,,,,,كتير مش كدة اصلي بطلع بيها الساحل كتيييييييروانا واخدها تاني يد من واحدة بنت كانت مربياها على الغالي بس لما زهقت منها رمتها في الجراج وقعدت مركونه حوالي 5 سنين
اة بالحق الميكانيكي طلع حساس حرارة المية وقالي سليم بس لحد الآن معرفتش هي العربية عملت كدة لية معايا المرتين دول حاجة غريبة جدا

بالحق بقول للميكانيكي عاوز اروح التوكيل اكشف كمبيوتر قعد يخوفني من التوكيل وغلو التوكيل ويقولي حرام عليك هتصرف ياما ....اية مدى صحة الكلام دة...؟؟؟ مع اني رحت توكيلات مع صحابي مكانوش بيدفعوا كتيير اوي على كلامه ده

رد: ساعات بتدور على طول وسعات بتغلبني ولازم اكبسلها بنزين كورسا 97
 

أنا متوقع أنك حتلاقيهم مهببين

روح ياباشا وأعمل أسكانر

وسيبك من كلام الميكانيكى ده

أى أسكانر مبيعديش 30 ج

رد: ساعات بتدور على طول وسعات بتغلبني ولازم اكبسلها بنزين كورسا 97
 

الف شكر على ردك تعبتك معايا
طب اية سبب هباب البوجيهات ؟؟؟ وهل الجداد هيهببوا برضوا ولا اية؟؟؟