مصر موتورز مجتمع السيارات

ربنا يمسيكوا بالخير يارجالة, الراديتير كان بيسرب من أسبوع, وبما أنى من الناس اللى بتحب تفتكس فى كل حاجة, رحت أشتريت أنبوبة سليكون حرارى ب7 جنيه وأيبوكسى (لحام الحديد) ب7 برضه.

قعدت فكيت فى الراديتير, وخرجته وفكيت المراوح وكل حاجة, لحمت الخرم وأتضع أن الراديتير مركب جنب والجنب كله بيصدى, قمت عايد على الجنب كله بالسيليكون والأيبوكسى وسبت حتة صغيرة كنت فاكرها متينة.

وفى اليوم التالى لقيت الراديتير بيسرب برضه بس من تحت (كان بيسرب من فوق فى الأول) فذهبت حزينا للراجل بتاع الراديتيرات, خلعه وعمل الحتة اللى أنا معملتهاش بأيبوكسى, وركب الراديتير وحط بودرة أصلاح وخد 20 جنيه.

الدروس المستفادة هى, الخبرة مش ببلاش, الخبرة ب3 ساعات ضاعوا على الفاضى وهدوم خروج أتبهدلت, وأيدين ولا أيد أجدعها سباك.

من الأخر, أدى العيش لخبازه, ممكن حضرتك تروح تلحمه مش هياخد نص ساعة, وهياخد 15 الى 20 جنيه, وخلص الموضوع, وممكن بعد كده حضرتك تغيره لو حصل أى حاجة, بس مش هيحصل :)