مصر موتورز مجتمع السيارات - مهزله ما بين مصر للتامين و عيسي وسلام يا صاحبي

اقتباس:

المشاركة الأصلية كتبت بواسطة aboelesaad (المشاركة 241851)

بسم الله الرحمن الرحيم

بجد و الله الي حصل معايا ده مهزله بجد بكل المقاييس

كنت حكتلكو ان عربيتي الاسبرانزا m11 عملت بيها حادث ولله الحمد نوجت منه برعايه الله ثم العربيه

انا عامل وثيقه تامين شامله علي العربيه
روحت لعيسي فرع طنطا قالي طب تمام روح لشركه التامين الي انت موثق عندها و قولهم عربيتي عملت حادث و هتعمل وثيقه حادثه و هتجيبلي العربيه المهندس يجي يعاينها و تتصلح و هما هيحاسبوها بس لازم تستلم وثيقه التامين
روحت المصريه استلمت وثيقه التامين لان كانت عندهم قالي استاذ شريف تعالا يوم الحد 11 ص المهندس هيجي هنا يعاين و كل حاجه تمام ودي خدمات من عندنا قولت طب تمام
روحت لعيسي عملت مقايسه بالاسعار قالي المهندس المحترم العربيه هتكلف 6000 جنيه والشركه هتدفع متقلقفش

استنيت الحد و روحت المصريه قعت للساعه 1 الظهر مستني دوري ولا اكني في طابونه عيش
ماعلينا
المهم جه المهندس المحترم يعاين
شال بمزاجه 3 حاجات مش عاجبينه
اولهم شبكه الكبوت مكسوره يقولي هتتصلح
ياعمنا دي مكسوره و ملهاش تصليح دي بلستك يقولي مش هكتبها بعد خناق وقرف برضو مكتبهاش
يجي للفبر الي مغطي الباب الشمال من تحت مش موجود اساسا يقولي مليش فيه اتصرف و هاته
ياعمنا هجيبه منين يقولي وانا مالي دي مسؤليتك ياعم ده مكسور و ضاع و مش موجود ومن اثر الحادث و مكتوب في المقايسه يقولي لا مش هكتبه
نيجي بقي للمساعدين
فضل يهز في ام العربيه والعربيه تقيله و هوا راجل كبير يقولي مهم سلام اهم اقوله يا عم الحج المهندس هوا الي ساقها و شاف المساعدين و قال لازم يتغيرو يقولي و انا اي بتاع روبابيكيا منا مهندس
بعد خناق و زعيق و لميت الناس يكتب يقول في الورقه بالنسبه للمساعدين بعد الفك و الفحص الدقيق يتم النظر في استبدالهم

الاغرب بقي علي الي حصل
يكتب تكلفه الاصلاح 1350 جنيه ويشطب علي 6000 جنيه
بقوله اي ده يقولي دي اسعارنا و راح مسعر كل حاجه علي مزاجه
كل حاجه يسعرها اقل من الربع
بقوله اي ده الي كتبته ده دي تكلفتها 6000 جنيه يقولي دي اسعارنا و ان كان عاجب وعيسي عارف كده
دخلت لمدير الفرع في المصريه اتخانق علي اسلوب المندوب والسعر العجيب ده
يقولي روح عيسي بس و شوف هيقولك اي

بعد حرقه دم روحت لعيسي المهندس المحترم يقولي سيب العربيه لحد ما المهندس يجي يعاينها
بقوله منا عاينت خلاص
يقولي عاينت اي ده لازم مهندس يجي من مصر يعاينها هنا يا عمنا انا عاينت و صلحو بقي يقولي لا مش هتتصلح دلوقتي
رجعت للمصريه تاني اسال مين المهندس الي هيجي يقولولي مهندس اي امال ده اي يلا يا بشمهندس روح صلح عربيتك ولو رفض اتصل بيا و انا هكلمه
روحت لعيسي للمهندس يقولي في اي تاني بقوله انا عاينت و المهندس بيقولي صلحو علي طول يقولي ازاي يعني فوريته الاسعار بتاعت المهندس راح رامي الورقه في الارض ويقولي" اي ده احنا هندفع من جيوبنا والا اي اي الاسعار الزفت دي " وبالحرف و الواحد
اتخانقت خناقه لرب السما وزعيق و قرف و حرق دم علي الاسلوب الغبي الي بيحصل مع العملا
قعدوني و هدوني واتصلت بالمهندس الي عاين يقوله المهندس بتاع عيسي ايوه يا باشا ازاي عاينت يقوله صلح العربيه فيرد بتاع عيسي يقوله و فين الاسعار انا ماخدتش ورق انا سمعت كده زعقت و كان صوتي جايب اخر البلد
فين و فين مهندس عيسي يقولي روح لمهندس التامين تاني هيسعرلك الورق تاني
تخيلو الخناقه علي اي
300 جنيه مصنعيات العمال في الرش و الدوكو

رجعت للمهندس بتاع التامين يقولي هوا بيتخانق علي اي دول 300 جنيه وانا مش هدفع اكتر من كده دي اسعار ابوالفتوح وانا مع ابوالفتوح
اقوله ياعم دي العربيه غربيه وانا من طنطا و عيسي من طنطا اروح 6 اكتور اصلح العربيه يقولي وانا مالي دي مشكلتك ياعم في طولك في عرضك خلص ام الورقه و مشي اسعاره يقولي ابدا و حلف ميت يمين يرفع في عيسي مذكره لابوالفتوح بيتهم فيها عيسي بان بيتغالي في الاسعار و بيستغل وجوده الاوحد في الدلتا للاسبرانزا

طب انا هكسب اي يعني اما عيسي يقف عن الشغل ؟؟؟؟؟؟؟
يا عم خلص الورقه يقولي ابدا ياعم هوا انا هحط حاجه في جيبي دي اسعارهم يقولي ودي اسعاري
عايز تصلح عربيتك ادفع انت الباقي علي حسابك
طب ياعم انا بدفع 1750 سنويا دول اي يعني شكليات ده سعرك محصلش الي بدفعه يقولي دي حاجه و دي حاجه
وقالي علي خبرين انيل من بعض
الخبرا لاول
ان نسبه التامين زادت الي 3.5% بدل من 2.25%
الخبر التاني
ان النسبه علي سعر العربيه الاصلي الي اشتريت بيه وليست سعر العربيه الحالي
طب اي السبب يا هندسه
يقولي عشان الشركه كانت هتفلس و هيحصل مشكله فزودو الاسعار
وسلام يا صاحبي وكل سنه و انت طيب
تدفع دم قلبك في شركه تامين و بالاخر تدفع من جيبك فلوس تصليح حادث
طب ازاي نفسي افهمها

واضحكو علي الباقي
بعد كل الخناق ده
اتفقنا ان هدفع 200 جنيه من جيبي عشان اصلح العربيه فرق الاسعار
اروح اصلح بقي العربيه عند عيسي
يقولي
اولا هتاخد 15 يوم
ثانيا مش هنبدا فيها الا يوم الاتنين بعد العيد
لي يا عم الحاج يقولي اصل عمال السمكره واخدين اجازة العيد
والله ضحكني وانا في عز نرفزتي
بقوله اجازة عيد من دلوقتي
يقولي مفيش شغل سمركه ولا دوكو دلوقتي خالص الا بعد العيد
طب صلحلي المساعدين يقولي مبشتغلش قطاعي

واخيرا
العربيه واقفه تحت البيت
لا عارف امشي بيها لان المساعدين مخوفني و مش مطمنني
ولا عارف حتي اصلحها و انجز من اليله دي
يعني موت و خراب ديار

وكل سنه و انتم طيبين باجازة العيد
ومعلش طولت عليكو

GIFT4U:THUMBS~220::fun_36 _3_16[1]::GROWIN~12::GROWIN~12::f un_36_3_3[1]::140109~347::fun_36_3_3[1]::140109~347::140109~347: :140109~347::140109~347:: 140109~347::fun_36_3_3[1]: