رد: الصيانه المطلوبه للسياره الجديده
 

الف الف مبروك و ربنا يديكي خيرها و يحميكي من شرها يا رب
بالنسبه للصيانات و العنايه فالباشمهندس سامح قام بالواجب(سام رام)
اما بالنسبه للغسيل افضل الغسيل بعد كل ما الدنيا تمطر علشان الطيب تحت الرفارف
اما في الاوقات العاديه يفضل تلميع السياره فقط
و عدم غسل السياره بأي مساحيق تنضيف ملابس او سوائل مواعين
يا اما الفوم في المشحمه او شامبو و تبقي تديه للبواب يغسلهالك
و خديها نصيحه
اكتر حاجه تبهدل اي عربيه هيا الميه و المطبات
لذلك كوني حذره في المطبات و منتبهه و ابعدي دائما عن اي منطقه بها ميه لكي لا تؤذي اسفل السياره

رد: الصيانه المطلوبه للسياره الجديده
 

أستاذ / سامح
الله يبارك فيك .. ألف شكر
أناس بس قلقى إنّى باسوق العربيه عدد كيلومترات قليله بسبب ظروف شغلى و هاخد وقت على ما أكمّل أول 1000 كيلومتر و مش عارفه هل دى طريقة معامله صحيه للعربيه و هل مفروض أعمل عدد الكيلومترات ده قبل وقت معيّن ولاّ حسب الظروف؟ فقلت يمكن يكون فى هذه الأثناء حاجات مطلوب عملها للعربيه كصيانه دوريه ..

أنا لاحظت حاجه وحيده ومش عارفه سببها إيه لأنّها مش بتحصل دايما ..
بعد ما باسخّن العربيه و آجى أطلع باكسر شمال على الآخر عشان العربيه اللىّ واقفه أمامى فأمّا تبدأ العربيه فى الحركه من الوضع ده بيبقى فيه صوت تكتكه خفيفه كده مش عارفه ده طبيعى ولاّ شئ غريب و بيختفى الصوت ده خالص بعد كده مش باسمعه غير الطلعه اللىّ بعدها ..

الصراحه من كُتر ما قريت فى المنتدى عن موضوع البارومه و الصدا ماكنتش عاوزه العربيه تتغسل قبل ما أشترى لها الشامبو اللىّ قريت عنه فى أكثر من موضوع بس للأسف لقيت البوّاب من نفسه قرر يغسل العربيه وكنت عاوزه أكتفى بتنظيف على الجاف خصوصا و هى متغطيه طول ما هى واقفه و مش بتحتاج غير تلميع بذمّه و بس .. فهل يا ترى فى محطّة البنزين فيه درجات أو أنواع من غسيل العربيه؟ يعنى ممكن أطلب منهم يغسلوا الموتور بس؟ و ده مفروض يتعمل كل أد إيه؟ و هل أقف أتابع و همّا بيغسلوا عشان أتأكّد من غسيل العجل ولاّ دى حاجه بتتعمل بشكل آلى

رد: الصيانه المطلوبه للسياره الجديده
 

أستاذ corsair

شكرا جزيلا .. يا ترى التشميع ده بيتعمل فى محطّات عاديه ولاّ مراكز الخدمه المعتمده؟ و بيتكلّف كام تقريبا و يحتاج وقت أد إيه

رد: الصيانه المطلوبه للسياره الجديده
 

أستاذ miam0502788391

الله يبارك فيك ألف شكر


أستاذ حازم

الله يبارك فيك شكرا جزيلا على التهنئه الجميله دى
هو الحمد لله من ساعة ما جبتها مفيش مطره خالص :) و بصراحه متخوّفه من موضوع غسلها ده عشان البوّاب طبعا مش متخصص و مش هيغسلها بشامبو و إن شاء الله أجيبهوله قبل موعد الغسيل اللىّ جاى ptmnlo123per1147

رد: الصيانه المطلوبه للسياره الجديده
 

العربيه لها شامبو مخصص ممكن تجبيه من كارفور او من اي محل اكسسوارات كبير
و بصراحه دا افضل من الغسيل في المشحمه دائما لان خرطوم المشحمه ضغطه عالي
و الضغط العالي للميه بيضعف الصاج

رد: الصيانه المطلوبه للسياره الجديده
 

ال 1000 كم الاولى مش مرتبطه بوقت خالص ...
هو صوت التكتكه دي جاي منين
عموما المفروض متكسريش الدريكسيون على الاخر ... عاده الدريكسيون بيلف 3.2 لفه من اقصى ناحيه للتانيه
علشان الواحد يحافظ على علبه الدريكسيون و نظام التوجيه عموما بيلف الدريكسيون لفه ونص يمين و لفه ونص شمال ويسيب الجزء الاخير اللي فاضل قبل ما الطاره تصد و مترضاش تلف ..
علشان تعرفي المفروض تسيبي اد ايه اعتبري ان الدريكسيون ساعه وكأنك بتلفي عقرب الساعه و تسيبي اخر 10 دقايق من نهايه اللفه قبل الدريكسيون ما يصد (الجزء اللي بتسيبيه ده كأنك سايبه 10 دقايق على ظبطه الساعه)
مش معنى لو عملنا كده ان الدريكسيون يبوظ ... لكن علشان تطولي عمر علبه الدريكسيون معاكي ... وبالمره الكبالن :)


الخوف من الغسيل ان المياه او الصابون يتسابو ينشفو على العربيه... طالما العربيه تتنشف على طول كويس يبقى مفيش مشاكل ...
ومتعتبريش ان الكلام ده قانون لو معملتيهوش العربيه تبوظ .. لكن واضح ان حضرتك العربيه عزيزه عليكي و حريصه انك تحافظي عليها ... لكن متقلقيش بزياده .. يعني لو سبتيها مره بالليل من غير ما تغطيها مش حتلقط برد .. دي عربيه برضو .. مش قطه

وربنا يباركلك فيها و تفضل دايما بحاله الزيرو