رد: استفسار من خبراء مازدا 323
 

بص يا أستاذي أرجو ما أكونش متأخر في الرد، المسألة نسبة وتناسب واحتياج، لو إنت بتسافر كثير يبقى المازدا طبعا أفضل، وأنا بأتكلم عن ثقة لأني معايا مازدا 323 موديل 1982، وبصراحة أسهل ما يكون إني أجيب بيها 140، عربية ناعمة وثابتة وسحبها جميل واستهلاكها للبنزين حلو، وقطع غيارها مش غالية ولا حاجة هي متوسطة السعر، يعني على سبيل المثال، سير الكاتينة الياباني الجديد ب60 جنيه، الإكصدام الأمامي أو الخلفي الياباني الجديد ب200 جنيه الواحد، طقم الشانبر الياباني ب110 جنيه، طقم الصبابات الياباني 165 جنيه، البلية بتاعتها ب50 جنيه الياباني، طبعا هما بليتين مش بلية واحدة، بليتين لكل عجلة، يعني الأسعار في المتوسط أما بالنسبة للاستيراد فبرده سعره كويس، أنا سألت قريب على طقم بيبان فبريقه فقالوا ب650 جنيه، الدينامو جايبه استيراد ب135 جنيه، وكذا المارش، ماتور المساحات جايبه ب70 جنيه، وهكذا، أما بالنسبة للفيات 131 فأنا أعرف إنها جميلة وما حدش بيشتكي منها، لكن الفيات عموما أضعف من الياباني وبرده الياباني أنعم وسحبه أجمل، وليك الاختيار، ولو عربيتك مريحاك نصيحتي خليك فيها؛ لأنك ببساطة عرفت أولها وآخرها وبقت سهلة عليك، وشكرا وتقبل مروري

رد: استفسار من خبراء مازدا 323
 

فى العربيات القديمة العفريت اللى تعرفه احسن من اللى ما تعرفوش
انا معايا مازدا ٣٢٣ ومطلعا عينى و مش كتير يفهموا فيها خصوصا الكهربا

رد: استفسار من خبراء مازدا 323
 

لو سمحت كنت عاوز اعرف انت بتجيب حاجتها الاسيتراد منين؟؟
انا معايا مازدا برده وكنت عاوز اجيبلها شوية حاجات

رد: استفسار من خبراء مازدا 323
 

أخي العزيز، حاجة الاستيراد موجودة في أكثر من مكان، لكن أنا إلا أعرفه كويس عزبة شلبي، ودي موجودة على ترعة الإسماعيلية، حضرتك عارف إن ترعة الإسماعيلية بتفصل بين مسطرد، وبين إتجاه المطرية، في كوبري في المنطقة دي اسمه كوبري مسطرد منزل الكوبري ده وإنت رايح في إتجاه المطرية هو عزبة شلبي، أو وإنت جاي من اتجاه المطرية هيبقى مطلع الكوبري، ، أما لو هتروح من شارع بورسعيد فطبعا بعد ما تبقى الوايلي في ظهرك هيبقى كوبري السواح أمامك، ما تطلعش الكوبري، خش من جنبه ، يعني من يمينه ، وامشي على طول، نهاية الشارع ده هو عزبة شلبي، ولو هتروح من الدائري انزل نزلة مسطرد، هتبقى ترعة الإسماعيلية على شمالك، خليك ماشي لحد لما يقابلك كوبري مسطرد، اسأل على مطلع الكوبري وانزل الناحية الثانية هتلاقي عزبة شلبي، ده واحد، أما الثاني فطبعا الحرفيين إلا قبل مدينة السلام، ودي مشهورة جدا، وسمعت إن في برده في عين شمس، بس بصراحة ما رحتش، دول الثلاثة أماكن إلا أعرفهم، وأكيد في تاني، بس دي حدود علمي، وتقبل ردي

رد: استفسار من خبراء مازدا 323
 

سامحني أخي الكريم، لكن الكلام ده أول مرة أسمعه، الياباني كل الناس بتشتغل فيه، وأنا عمري ما رحت لصنايعي أيا كان وطلع مش فاهم في العربية، بل بالعكس أنا مرة سألت الميكانيكي إلا بأصلح عنده إنه يعمل عمرة لعربية فرنساوي قال لي: ما بأشتغلش فيهم لأن ماتورهم متعب وعمرتهم مرهقة شوية، لكن الياباني شغله سهل، ويمكن حضرتك بتصلح عند صنايعي تعبان شوية، نصيحة حاول تتعامل مع الصنايعي الكويس حتى لو كان غالي شوية؛ لأن المشكلة دي أنا واجهتها أول ما اشتريت العربية، كان اكثر حاجة مكرهاني فيها الصنايعية التعبانة إلي كنت بأتعامل معاهم، لكن لما لقيت صنايعية كويسين والله استريحت وجمال العربية ظهر، فحاول ما تتعاملش مع صنايعي واحد، لو العربية كل ما تتصلح تفسد بسرعة غير الصنايعي لحد لما ربنا ييسر ليك واحد كويس، وتقبل مروري

رد: استفسار من خبراء مازدا 323
 

ألف شكر على الافادة

رد: استفسار من خبراء مازدا 323
 

مساء الفل على المهندسين عندي مزدا 323 مو 90 بصراحه حاجة جمدة و حديثة جدا موتور 1300 16 v و حالتها جمده بس انا عندي استفسار عايز اعرف مقسات سير الكتينة والتروس و اجيبهم منين اصلى وهل الوكيل عنده الحاجة ولا لا
2- عملت تصليحات في حشو علبة الدركسيون وتسبب في تقله جدا مين ممكن يصلحها و هل اي حد بيفهم فيها ارجو الرد