رد: ارجوا المساعدة عملت حادثة قبل العيد والجنب اليمبن كله اتبهدل
 

ربنا يجعله فى ميزان حسناتك الحمد لله مفيش حاجة فى الحوض تستدعى زراجين كبيرة
بالنسبة للجنط ممكن يتلحم وفيه متخصصين فى تجديد الجنوط استعدال ولحام ودهان كمان بس لو لقيت واحد زية يبقى احسن طبعا
وعامة حاجتها متوفره ان شاء الله مش هتتعبك جامد فى التدوير تركيزك بس يبقى فى مصنعية السمكرة والدكو ولو هتعمل تعديلات فى الشكل او احسبلها من دلوقتى فمثلا لو هتعمل حاجة فى الاكصدام شغل فايبر مثلا هتركب عتب هتعدل فى الفوانيس او الشبكة شوف هتعمل ايه علشان يترش كله مع بعض وان شاء الله ترجع احسن من الاول

رد: ارجوا المساعدة عملت حادثة قبل العيد والجنب اليمبن كله اتبهدل
 

شكرا ابو نوار على اهتمامك وردودك المفيدة .
انا النهارده روحت لبتاع زبط زوايا بيص على العربيه وقالى انا محتاج اغير الركبة كاملة بس قبل ماغيرها اخلى السمكرى يقيس الركبيتين ولو طلعت المسافة بتاعتهم شركة اغير الركبة ولو غير كده يعمل الزراجين المطلوبة الاول .
بس انا مشفاهم اقول للسمكرى ايه علشان يفهم قصد بتاع الزوايا على العموم ادينى هعمل اجازة من الشغل ان شاء الله وانزل اشوف القصة دى ايه وربنا يقدم الخير من عنده ان شاء الله .

رد: ارجوا المساعدة عملت حادثة قبل العيد والجنب اليمبن كله اتبهدل
 

ان شاء الله خير .. انت قصتك دلوقتى بين العفشجى وبتاع الزوايا .. والعفشجى وبتاع الزوايا يعرف يعمل الزراجين اللى من النوع ده لو حد محترف
فيه بتاع زوايا محترف ومحترم جدا اسمة درش ليه فروع فى المطرية وفى جسر السويس وفى الحرفيين مشهور باسم درش بتاع الزوايا ده ممكن يكشف ويعمل الزاجين ويظبط لكن معتقدش السمكرى هيعرف يقيس ولا يظبط زرجينة عفشه

رد: ارجوا المساعدة عملت حادثة قبل العيد والجنب اليمبن كله اتبهدل
 

الحمد الله عملت العربية وبعتزر على التاخير بس بجد كانت فترة صعبة ربنا لا يوعدها ولا يكتبها عل. حد .
اشتريت الكبوت والرفرف والكشاف والشنب بتاع الاكصدام استيراد اما الاكصدام نفسه جبته جديد .
القايم تم استعداله بدون قطع فيه وتم تركيب الحاجات التانية ورش العربية .
وكان عندى شويه شغل عفشة وميكانيكا عملتهم بالمره وركبت زجاج جريش ولسه فاضل اغسل العربية من جوة علشان الوقت مسمحش استنا البوهيجى يبعت العربية تتغسل من جوة مكان الشغل بتاعه .
واهو الدنيا بتمشى والحمد الله على كل شىظ” وشكرا على الاهتمام .
وعلى فكرة الركبة مكنتش معوجعه ولا حاجه الحوض كان فيه زرجينه والتعملت والدنيا اتظبطت .

رد: ارجوا المساعدة عملت حادثة قبل العيد والجنب اليمبن كله اتبهدل
 

الله ينور وربنا يباركلك فيها يارب وان شاء الله هترجع احسن من الاول انت بس ركز مع البوهيجي وخليه يظبط فينيش البوية ويسحقها بضمير مرة واتنين وانت استلم منه بايدك وبعينك علشان متسيبش اثار تهين العربية لو جيت تبيعها بعد كدة وان شاء الله خير