رد: ايه اسباب أستهلاك البطاريه وانتهاء عمرها الأفتراضى
 

لا شكر على واجب .. و ربنا يكرمك و تعثر على ميكانيكى كويس فى الاسكندرية يستطيع حل هذه المشكلة قريبا ان شاء الله
الميكانيكى الى حضرتك بتتعامل معاه شكله كويس .... بس ده ميمنعش انك ممكن تشوف ميكانيكى غيره يستطيع ان يفيدك اكتر ..ز
اما عن رايى المتواضع فى الحاجات الى حضرتك ذكرتها ....

1- طرمبة البنزين ... انا لا اعتقد انها المشكلة .... الطرمبة الى عند حضرتك يا اما ميكانيكية .. او كهربائية ... و المفروض ان الطرمبة يكون فيها خط راجع لتانك البنزين مرة اخرى ..... فلو حصل ان الطرمبة حصل فيها تلف ... سحب البنزين يقل و تشعر بيه فى الموتور ....
و لو حصل ان سحب طرمبة البنزين زاد عن الطبيعى ( و ده احتمال قليل جدا ) فالزيادة حترجع فى خط الراجع ..... و لو مرجعتش و دخلت على الموتور على طول ... العربية حتكون مش مظبوطة و ممكن تطلع دخان اسود و العربية تشرق و البوجيهات ترطب ... و حاجات من دى كتير ... فلا اعتقد انها طرمبة البنزين

2-التسريب .... احتمال يكون فيه تسريب .... و ده عاوز من حضرتك صبر ايوب .... تنزل و تمشى على المواسير من التانك و حتى الموتور .... و تراقبها بدقه .. و تراجع على الكوليهات الى رابطة الخراطيم الكاوتش
حضرتك كمان تاخد بالك من الوصلات ... و لو حد بياخد منها بنزين ... ممكن ياخد من فين ؟؟ و تخلى بالك من الوصلات دى

3- ثرمومتر الكوعة .... صعب كتير انها تكون المسئولة عن الاستهلاك العالى للبنزين ... هى ممكن تسبب فى زيادة طفيفة فى الاستهلاك .... بس الاستهلاك بالمنظر ده ؟!!!! اعتقد ان ثرموستات الكوعة برئ منه

4- التاكيهات و الصبابات و الاجزاء الميكانيكية الداخلية ... ليها اعراض تانية مميزة ليها ... غير الاستهلاك العالى للبنزين ... و من الممكن ان اى ميكانيكى يعرفها

فيه حاجة كمان حضرتك لم تذكرها .... الاير ماس فلو ميتر !!!! لو عربية حضرتك حقن اكيد حيكون فيها حاجة زى كدة .. او حساس الهوا

ان شاء الله مش حتطلع عمرة و لا حاجة كبيرة ... اهم حاجة ان انت متزهقش
معلش ... استحمل شوية :) هى العربيات كدة .... ممكن حضرتك تصبر لغاية لما يكون معاك فلوس تانى و تحاول مرة تانية

ربنا معاك

رد: ايه اسباب أستهلاك البطاريه وانتهاء عمرها الأفتراضى
 

ربنا يخليك يا باشا هوه انا اكيد هفضل ورا العيب بس بعد فتره بقى لانى صرفت كتير
بس ملحوظه : انا اكتشفت ان الأستهلاك بيزيد لما بنزل بالعربيه على مرات متقطعه وفى زحمه نسبيه
يعنى مثلا المره اللى فاتت لمبة البنزين نورت على 70 كيلو وكنت بحط بنزين والعداد عامل 81 كيلو واخدت 40 لتر ال81 كيلو دول كنت بنزل بالعربيه بمعدل تلات مرات فى الاسبوع مشوار حوالى 6 كيلو فى زحمه فى منطقه معينه وزحمه خفيفه يعنى مش زى زحمة القاهره عندكوا التلات مرات دول منهم مره كنت بعمل 15 كيلو

المره دى بقى بعد ما فولت للأخر مشيت يوميها 28 كيلو متصله والسكه الى حد ما فاضيه والنهارده الجمعه نزلت الصبح عملت 58 كيلو سواقه متصله والسكه فاضيه ورايقه جدااااااااا وكده العربيه دلوقتى عامله 86 كيلو ومؤشر البنزين لسه موصلش النص المره اللى فاتت كنت عامل 81 كيلو وبحط بنزين واحدت 40 لتر :(
نستنتج من ذلك ان السواقه المتصله فى سكه فاضيه الاستهلاك فيها بيقل جدا اما المشكله بتكمن فى السواقه المتقطعه جوه البلد :(

وهيا دى الخدعه اللى وقعت فيها لما قولت للميكانيكى المشكله وغيرلى حساس الميه وطلعنا بليل جربنا لقيناها اخدت فى 56 كيلو 10 لتر بس وانا فرحت وقولت المشكله اتحلت اتاري ده عشان السكه كانت فاضيه بس :(

على فكره انا لاحظت ان مؤشر الحراره بيبقى واطى اووووووى هل ده برده ملوش علاقه بين ترموثتات الكوع بالاستهلاك انا صورته لحضرتك والصوره دى المفروض كنت ماشى نص ساعه والمفروض تكون العربيه سخنت لكن زى ما حضرتك شايف المؤشر فى الأول خالص
دى صورة مؤشر الحراره
http://im34.gulfup.com/sOAsE.jpg

سؤال اخير هوه ايه ال الاير ماس فلو ميتر ده ؟

رد: ايه اسباب أستهلاك البطاريه وانتهاء عمرها الأفتراضى
 

ربنا يعينك على المشكلة دى ....

المشى على الزحمة و الطريق السريع بيفرق فى استهلاك البنزين ... بس مش اوى
و برودة العربية بردوا بتاثر فى استهلاك البنزين ... بس مش كتير

الاير ماس فلوميتر ..... حساس بيقيس نسبة الهوا الى داخل الموتور ... و بالتالى كومبيوتر المحرك بيحدد نسبة البنزين الى بيديها للرشاشات ... وجود خلل فى الحساس ده ... بيخلى الموتور يستهلك بنزين كتير

ان شاء الله انا حسال عن المشكلة دى ... و ربنا يبعد عننا الزهايمر :)

رد: ايه اسباب أستهلاك البطاريه وانتهاء عمرها الأفتراضى
 

انا سألت عم حمدى ... قال فى الغالب حيكون خرطوم الادفنز ... و ده خرطوم من الموتور لعمة الفرامل

رد: ايه اسباب أستهلاك البطاريه وانتهاء عمرها الأفتراضى
 

بعد اذنك يا استاذ احمد هتطفل على الموضوع بسؤالين كدا

انا معايا بطارية النسر كنت جايبها في 7 2012 و من اول شهر واحد السنة دي و فلسعت مرة واحدة بدون مقدمات بالاضافة لاني مش بشغلها كتير اليومين دول .. المهم وديتها لكهربائي و قالي انها ناقصة مية و زودها مية من الحنفية ؟؟؟ و قاللي انه عادي ؟؟ و خدتها مشوار ساعتين و حرقت كتير بس تاني يوم نفس المشكلة ما دراتش؟؟ هل البطارية كدا عمرها الافتراضي خلص ؟؟ انا استخدامي للعربية بسيط جدا و مافهاش لا سنتر ولا ازا كهربا بس انا مع دخلت الشتا ما كنتش بشغلها غير و اشغل الدفاية ... على حد علمي الدفاية بتاخد حرارتها من موتور العربية و العادم

انا ناوي اغيرها كدا كدا واجيب بطارية جافة لان البطارية ده ضيعت لون الحوض للاسف .. تنصحوني اجيب نوع ايه و مواصفات ايه؟

رد: ايه اسباب أستهلاك البطاريه وانتهاء عمرها الأفتراضى
 

لو البطارية ميتها نقصت ... يعنى الالواح اتعرضت للهواء ... التركيب الكيميائى بتاع الالواح دى بيتغير ... و بالتالى لا تصبح قادرة على انتاج و تخزين الكهرباء
فانا اعتقد ان عمرها افتراضى خلص فعلا

الحكم على البطارية بيكون بسيط جدا ... ممكن حضرتك تكشف على البطارية عند كهربائى او عند اى حد بيبيع بطاريات .... و هو بيحدد ازا كان الدينامو بيشحن كويس و لا لأ ... و كمان ممكن يحدد ازا كانت البطارية باظت و لا لأ

اما بالنسبة للبطارية الجافة ... فهناك انواع كثيرة كويسة فى السوق .... من فترة فاتت كنت اسمع ان ايه سى ديلكو كويسة جدا .... احتمال تكون مش كويسة الان
ربنا يوفقك

رد: ايه اسباب أستهلاك البطاريه وانتهاء عمرها الأفتراضى
 

متشكر جدا على ردك واهتمامك :)