مصر موتورز مجتمع السيارات - طريقة تركيب أرضية جلد للسيارة و عوازل الصوت بنفسك

اقتباس:

المشاركة الأصلية كتبت بواسطة adham.com (المشاركة 860254)

السلام عليكم و رحمة الله و بركاته
الإخوة الكرام أعضاء منتدي مصر موتورز

الكثير مننا يعاني من صعوبة تنظيف ارضية السيارة الموكيت و القليل قد يستطيع تنظيف الموكيت و لم يعاني من شيء
بالنسبة لي أعاني من هذه المشكلة و كذلك اعاني من الصوت العالي سواء من الموتور أو من صوت الإحتكاك الناتج من الكاوتش بالأسفلت

ملحوظة : قمت بعمل هذا الموضوع وقت الثورة قبل التنحي ووقت الجان الشعبية و انقطاع الأنترنت و الأتصالات
فطبعا كنت فاضي و أجازة و مش لاقي حاجة أعملها

فقررت ان اغير ارضية السيارة بالجلد بدل الموكيت

نزلت التوفيقية و عملت جولة لشراء مسلتزمات الأرضية الجلد و لم اتمكن من شراء ما ارغب فيه نظرا لسوء الخامات اللي شوفتها و كمان لعدم توافر الألوان و بعض المستلزمات الأخري

المهم نزلت منطقة المناصرة في شارع محمد علي بالعتبة و لقيت محلات متخصصة في الحاجات دي

فقمت بشراء الأتي مع العلم ان سيارتي 127 فيورا 127

3 متر جلد أرضيات (العرض بيبقي 138 سم ) وش جلد و الضهر شبيه بالموكيت سعر المتر 25 جنيه

2 متر (عرض متر واحد) فوم مغطي بطبقة سيلفر سعر المتر 13 جنيه

1 متر (عرض 2 متر) لباد شبيه ببطاطين الجيش سعر المتر 15 جنيه

متر و نص (عرض متر) جلد أو كاوتش إستعملته في عمل دواسات امام كل كرسي و الكنبة إللي ورا سعر المتر 65 جنيه هو غالي شوية لأن الخامة مستوردة

متر (عرض 140 سم) جلد خفيف يستخدم أصلا في فرش الأبواب سعر المتر 14 جنيه

نص كيلو كولا لأستعمالها في اللصق ب 12 جنيه

و دي صور لما قمت بشراؤه

دة الجلد بتاع الأرضيات

http://farm6.static.flickr.com/5262/...81d2ff91_z.jpg

و دة الفوم المغطي بالسيلفر و أيضا اللباد اللي عامل زي بطاطين الجيش ههههههههههه

http://farm6.static.flickr.com/5304/...72fe6a28_z.jpg

و دة الكاوتش أو الجلد إللي هيستخدم في دواسات أمام كل كرسي

http://farm6.static.flickr.com/5183/...60900297_z.jpg

و طبعا اول شيء عملته اني قصيت الجلد دة و عملت الدواسات بما ان دي أسهل عملية في الموضوع كله

http://farm6.static.flickr.com/5293/...651468d0_z.jpg

ابتديت أولا بفك الكراسي و الكنبة و الموكيت القديم من السيارة و فك اللباد القديم و غسله في الغسالة و تنظيف الأرضية الصاج جيدا بالمكنسة الكهربائية لشفط الأتربة و الرمل الموجود في الأرضية

بدأت بعد كدة بتقطيع الفوم العازل للحرارة علي شكل مستطيلات بمقاسات مختلفة كما في الصورة و طبعا موضوع التقطيع علي شكل مستطيلات دي حاجة شخصية مش أساسي
انا عملت كدة لسهولة وضع الكولا عليها و سهولة لصقها في الزوايا و المنحنيات جنب بعضها

http://farm6.static.flickr.com/5175/...07777eb7_z.jpg

بعد كدة وضعت الكولا علي الفوم بفرشة دهان لتوزيع الكولا جيدا و تسيبها دقيقتان تنشف و تقوم لاصقها في مكانها كما في الصورة

http://farm6.static.flickr.com/5098/...20ce8b8a_z.jpg

طبعا هتسألوني و تقولولي إيه فائدة الفوم
من خلال تجربتي الشخصية الفوم بيمنع دخول أي حرارة أو دخان أو صهد بجانب ان اي عربية بيكون فيها فتحات في الأرضية معرفش ليه و دي كل ما أغسل العربية من تحت في أي بنزينة لازم ألاقي الأرضية غرقانة مياه و بتاخد مدة عقبال ما تنشف و يا سلام لو الموضوع قلب بريحة عفانة أو غيره

بعد كدة حطيت اللباد القديم بتاع السيارة أصلا بعد ما غسلته في الغسالة و سبته لغاية ما خد وقته و نشف
و رجعت ركبته مكانه فوق الفوم مع العلم ان اللباد مش لازم يتلصق بالكولا زي الفوم

و بدأت بعد كدة بتقطيع اللباد الجديد و اهم شيء في الموضوع كله طبقة الفوم و طبقة اللباد إللي بيبقي علي صدر العربية من الداخل عشان لما تكون قاعد و سايق ماتسمعش صوت الموتور و ماتحسش بصهد أو حرارة جاية من الموتور

دي صورة لطبقة اللباد إللي حطيتها عند الصدر

http://farm6.static.flickr.com/5092/...8540aa20_z.jpg

اللباد يا جماعة بيمنع الصوت العالي و دة من خلال تجربتي الشخصية

و دي صورة تانية للباد في الأرضية

http://farm6.static.flickr.com/5056/...eee0d8fd_z.jpg

و دي صورة كمان للباد

http://farm6.static.flickr.com/5017/...1de75a66_z.jpg

بعد الخطوات اللي فاتت دي إبدأ خد مقاساتك عشان لو خدتها قبل الخطوات دي هتلاقي الدنيا خربت و دة إللي حصل معايا ههههههه لأن طبعا طبقة الفوم و طبقتين إللباد بيفرقوا في 2 سم

بعد كدة بدأت في تقطيع الجلد بمقاسات معينة و خد بالك لازم تسيب زيادة واحد سنتيمتر عشان الخياطة

http://farm6.static.flickr.com/5104/...a69ab52e_z.jpg

طبعا إحترت شوية أبدا التقطيع منين أو أبدأ الخياطة منين المهم بدأت بعمل حرف T إللي هو علبة الشاسية إللي تحت الكنبة و علبة الشاسية إللي فيها الفرامل اليد و الفتيس بما ان دة أصعب جزء و فيه منحنيات و تانيات كتير كما بالصورة
و طبعا قعدت أفنن في قطعة الجلد الخفيف بتاع فرش الأبواب و عملت منها غطاء لفرامل اليد

http://farm6.static.flickr.com/5179/...bf4d9b81_z.jpg

و المشكلة اللي كانت مضايقاني و مكرهاني في عشتي هههههه ان للأسف ماكينة الخياطة صغيرة لكن كتر ألف خيرها (علي قد لحافك مد رجليك) صح برده و لا انا غلطان هههههههههه

http://farm6.static.flickr.com/5227/...7fb1c77a_z.jpg

بعد ما إنتهيت من حرف إلــ T عملت الجزء الشمال كما بالصورة

http://farm6.static.flickr.com/5221/...de64c790_z.jpg

لاحظوا ان في أجزاء صعبة علي ماكينة الخياطة فقمت بخياطتها يدويا بخيط أبيض لأني ماكنتش لاقي لون رمادي بس عملت حركة صايعة بعدها و لونت الخيط الأبيض بقلم فلوماستر رمادي ههههههههههههههه

بعد كدة عملت الجزء اليمين زي ما حضراتكوا شايفين طبعا و قصيت مكان دوران الكارتيرات أو الرفارف الأمامية

http://farm6.static.flickr.com/5296/...766b9de2_z.jpg

بعد كدة و دي كان اكتر حاجة صعبة بالنسبة لي و هي جزء الكارتيرات إني آخد مقاساتها صح و دورانها ودي خدت مني وقت طويل شوية بس الحمد لله جت معايا مضبوطة تماما و عملتها زي ما بالصورة

http://farm6.static.flickr.com/5270/...dba7b683_z.jpg

شوية و قعدت أتسلي و عملت غطاء لعصاية الفتيس و طبعا خدت مني شوية وقت عشان تطلع بالشكل الجميل دة زي إللي في الصورة

http://farm6.static.flickr.com/5252/...da847ca4_z.jpg

في النهاية بدأت تركيب الأرضية في العربية و الحد لله طلعت المقاسات مضبوطة بنسبة 99% و دة شي جميل

http://farm6.static.flickr.com/5255/...2384f393_z.jpg

و طبعا تم تثبيت بعد كدة المجري بتاعت الكراسي و العتب بتاع الأبواب و عصاية الفتيس مع العلم إني كنت خالعها خالص

http://farm6.static.flickr.com/5306/...3bd2b6b2_z.jpg

لاحظوا عند صدر العربية أو تحت التابلوه

http://farm6.static.flickr.com/5307/...a0156b91_z.jpg

لاحظوا أيضا خلف دواسات البنزين و الفرامل و الدبرياش بس ممكن ماتكونش الصورة باينة شوية عشان عصاية الفتيس لسة ما ثبتهاش من تحت كويس

http://farm6.static.flickr.com/5224/...e0dd4b24_z.jpg

بحمد لله و بفضله أشكره علي إني قدرت أوصل للشكل دة

معلش هطول عليكم شوية و أقولكوا نصائح و نتائج

أولا النتائج

بالنسبة للتنظيف لاحظت سهولة جامدة فيها
بالنسبة لصوت الموتور اثناء السير لاحظت إنعدام صوت الموتور بنسبة 80 % من الصوت قبل تغيير الموكيت القديم
بالنسبة للحرارة و الدخان و الصهد و الهواء لاحظت انعدامه تماما بنسبة 100%

ثانيا النصائح

لما تيجي تشتري الجلد بتاع الأرضية هات خامة طرية و بلاش الخامات الناشفة لصعوبة ثنيها أو إنحنائها و دة مع الأسف إللي وقعت فيه و عملت فيها ناصح علي البائع و اخترت الخامة الناشفة مع العلم انه قاللي خد الخامة الطرية

الموضوع دة بصراحة يا جماعة متعب شوية و محتاج كام يوم متواصل ( مش هتصدقوني لو قولتلكوا ان الموضوع دة خد مني خمس أيام متواصل ) كنت بشتغل حوالي 8 ساعات في كل يوم لأني اول مرة اقعد علي ماكينة خياطة و اشتغل بإيدي و اقصفص و ألصق

إللي ساعدني إني عندي جراج قي البيت قدرت إن افك براحتي و أركب براحتي بدون ما حد يكون كاشفني أو جارحني
انا بحمد الله كل دة عملته لوحدي محدش ساعدني فيه

ربنا يقويكوا و تقدروا تعملو بنفسكوا أفكار أحسن من كدة و نستفيد من بعضنا

أتمني من إدارة المنتدي تثبيت الموضوع

شكرااا

بسم الله ما شاء الله
بارك الله لك فى عملك ومجهودك وسيارتك
:fun_36_3_16[1]::fun_36_3_16[1]::fun_36_3_16[1]::fun_36_3_16[1]::fun_36_3_16[1]: