مصر موتورز مجتمع السيارات - غيرت لعفشة لانسر بالكامل

اقتباس:

المشاركة الأصلية كتبت بواسطة fantom123 (المشاركة 830893)

فى ليلة راس السنة لبست أغبى حفرة شفتها فى حياتى على الدائرى و انا راجع من 6 اكتوبر الساعة 3 بليل و النتيجة جنط اتعوج و مساعد قدام و ورا حسبى الله و نعم الوكيل الحفرة عبارة عن حتة فاضية بين الطريق و الجزء الجديد اللى زودوه قبل ما تدخل على وصلة المعادى....
المهم انا اساسا كنت عايز اركب عفشة لانسر بعد ما اهلك العفشة المقرفة بتاعت العربية و اساسا انا كنت شاريها 5/2011 ب 65900 كاملة و كنت عامل حسابى انى كدة كدة بعد سنة او اتنين هزود 3000 لتغيير العفشة يبقى انا شارى عربية ب69 عفشتها يابانى و واسعة و فيها كل الكماليات بسم الله ما شاء الله
و على فكرة الناس اللى بتشتم فى العربية دى بيكونوا مش حاسبنها صح من الاول لو انت شاريها و حاسبها كدة و مقدر بردو ان فى شوية حاجات هايفة ممكن تعلق معاك عشان صناعة صينى هتركب العربية و انت مرتاح
المهم سعر العفشة:
مساعدين أمامى kyb made in japan ب 975 بتوع لانسر 1600 و متشتريهمش الا لما تشوف ختم صنع فى اليابان على المساعد نفسه تحت كلمة mitsubishi عشان فى مساعدين ميتسوبيشى مش عليهم الختم ده مع ان الكرتونة واحدة
مساعدين خلفى نفس النوع 725 بس بتوع لانسر 1300
مقصين أمامى 350 لانسر
مسمارين ميزان لانسر ب 150 و دول فى منهم كورى و تيوانى و يابانى ب50 بس انا جبت الاصلى عشان مسمار الميزان مهم جدا مكتوب عليه mitsubishi genuine parts ياعنى قطع غيار اصلية
و معملتش حاجة فى القطمة ولا قربت من علبة الدريكسيون ( قولت اجرب الاول )
المحل اسمه الهانى فى أخر شارع احمد زكى فى حدائق المعادى و عنده كل حاجة لليبانى و بأسعار كويسة ... انا عارف ان فى التوفيقية و الحرفيين ممكن تلاقى اسعار أفضل بس المحل ده موثوق فيه ان الحاجات بتاعته اصلية و مش مضروبة
الورشة بتاعت مهندس علاء الراجل ده شغال فى التوكيل ابو رواش الصبح و ورشته كل شغلها اسبيرانزا و لما بروحله بلاقى عنده بتاع اربع عربيات 516 مستنيين ... بصراحة الراجل حافظها و فاهم كل حاجة فيها
(( فى ارض البصرى ش احمد زكى ))
خدله شغل 3 ساعات كدة و تانى يوم خدله ساعتين كمان و خلص ... مصنعية 200 جنيه
ترصيص 40
زوايا 50
الترصيص و الزوايا عند واحد تانى على فكرة و كنت اشتكيت لعلاء من صوت خبط بسمعه من العجلة اللى ورا لما اخد حفرة أو عين القطة و قالى خلى بتاع الزوايا يربطلق الشدادات اللى ورا كويس و فعلا طلعت هى السبب لما روحت لبتاع الزوايا
كدة اجمالى 975 + 725+350+150+200+40+50 يبقى 2490
الانطباع الاول العربية عليت 2سم و العفشة بقت محكومة و مفيش اصوات بس مش حاسس بفرق كبير فى نشوفية العفشة
بعد كدة لما مشيت كام مشوار و حملت فى العربية هبطت 1سم و العفشة بقت ما شاء الله جميلة و انعم من الاول بكتير لما طبعت
و على فكرة انا جربت بالعربية اجرى على 140 و الاتزان و الثبات ممتاز و مش فارق العلو خالص ... لكن فعلا مش عشان انا غيرت و الفلوس تعبانى نفسيا شوية بقول الكلام ده العربية ديه لما بتعلا شوية شكلها بيبقى احسن و و قفتها بتتظبط مع انى انا كنت بحب أوطى العربيات اللى كانت معايا قبل كدة
اتمنى يكون الموضوع مفيد و لو فى أى سؤال انا موجود

اولا الف مبروووك على العفشه وربنا يباركلك فيها

ثانيا حضرتك كنت قريب جداااا جداااا من بيتى و المنطقه ديه تابعه للمعادى وليس حدائق المعادى والهانى فعلا من اكثر المحلات اللى تثق فى منتجاتهم و فعلا ليه شهرة كبيرة وقبله محمد رشاد ده يعتبر زى الهانى كدا بس فى الكورى وفعلا علاء اللى فى ارض البصرى ده هو عند كشرى لوكس وقبله محل حداديد وبويات و هو اليافطه بتاعته كاتب عليها انه بيصلح دايو واسبيرانزا بس وبعده بشوية فى نفس الشارع فى ورشة الاسطى باسم و اللى شغال معاه اسمه الاسطى محمد وده اكثر من ممتاز برضو وبيعرف بيشتغل فى جميع انواع العربيات وهو ده اللى انا بتعامل معاه حاليا مع العلم ان الاسطى محمد ده يبقى اخو الاسطى احمد الكهربائى اللى فى شارع الاتحاد عند مكتب صحة المعادى ده بقى ممكن حضرتك تكون عارفه ده كهربا وتكيف اكثر من ممتاز بمعنى الكلمه ومره تانيه الف مبروك يا باشا على العفشه الجديده وعقبال ما حال الشوارع ديه يتصلح بقى