مصر موتورز مجتمع السيارات - سؤال للخبراء...ليه محركين 1600 بيطلعوا قوي وعزم مختلفه....

والله العظيم الموضوع دة بحاول اعملة منفصل من فترة ....لكن الكسل بقى تقول اية
بس انا هاتكلم دلوقتى باختصار عشان وقت الشغل

اولا المواتير بدون وش السلندر لا تختلف مع بعضها البعض سوا فى حاجة بسيطة جدا هاقولها اما نيجى للتورك او للعزم

بمعنى اخر مكونات الموتور من بلوك وبساتم وبيلات لا تختلف من محرك الى محرك
لو شلت وش السلندر من مكنة نوبيرا وشلت وش السلندر من مكنة فيرنا وبصيت على البلوك هتلاقى الاتينن زى بعض بالظبط
دة كمان فى حاجة مهمة اوى
السعة اللترية
لو بنتكلم عن موتورين مختلفين فى القدرة الحصانية بس لما نيجى نقيس قطر وطول مشوار البستم هنلاقيهم واحد عشان يحققو الـ 400 سم3
يبقى 400 سم3× 4 يدينا الـ 1600 سم3

الله
اومال اية الحكاية

الحكاية كلها فى وش السلندر
وانا كنت بفكر اعمل موضوع اسمية

وش السلندر ذلك العقل المفكر للموتور

او كنت لسة هاسمى الموضوع حاجة تانى تلفت النظر لانى مش بعمل مواضيع كتير

نرجع لموضوعنا وهو وش السلندر لكن خلينا نستغنى او نستبعد المحركات الجديدة بنظام الـ VVT او CVVT وهى اختصار الى الكامة المتغيرة التوقيت

السعة اللترية بتحسب بحجم الاسطوانة × طول مشوار البستم
يعنى ط نق2 × ل
وبكدة الكلام بيتاكد ان السعة اللترية هى اللى بتحدد قطر وطول مشوار البستم
لكن فى عرف الصناعة جرى التوافق على مقاسات ستاندرد
يعنى مثلا جوان وش السلندر اللى بيركب فى موتور لادا 1300 سى سي هو نفسة اللى بيركب فى الموتور الـ 1600 سي سي
معنى كدة انهم ثبتو قطر البستم والاختلاف بيكون فى طول مشوار البستم
الله يعنى معنى كدة ان حجم البلوك مختلفظ؟؟؟؟
دعنى اؤلك ان حتى حجم البلوك مش مختلف
طيب نجيب منين فرق الطول عشان البستم ينزل اكتر وبالتالى يدينا طول مشوار اكتر وبالتالى يدينى سعة لترية اعلى

جاءت الاجابة فى طول الذراع المرفق او البيل
فى المكنة الـ 1600 تلاقى طول البيل اقصر من من المكنة الـ 1300 وبالتالى البستم بينزل مسافة اكبر وبيدينى طول الشوط المطلوب

نرجع بقى لختلاف القدرة الحصانية مع ثبات السعة اللترية
وهنا هانقول الاجابة صريحة ومباشرة وهى

نسبة الانضفاط
تعالى نعرف نسبة الانضفاط ونقول انها

الحجم المزاح+ حجم غرفة الحريق / حجم غرفة الحريق

وهنا لازم انوة ان فى منتديات تانية ذاكرين ان نسبة الانضغاط هى ناتج قسمة
الحجم المزاح / حجم غرفة الحريق ودة غلط لانة تجاهل الحجم المحصور بين النقطة الميتة العليا وجسم وش السلندر

ندى مثال عملى

لو ان الحجم المزاح هو 400 سم3 على اساس ان الموتور 1600 سي سي
وحجم غرفة الحريق هو 42 سم3
يبقى نسبة الانضغاط = 400+42/42 = 10.5
اى ان نسبة انضغاط المحرك هى 1 : 10.5
والموتور دة كدة يخرج 105 حصان

لو ان نفس المكنة الـ 1600 سي سي لكن حجم غرفة الاحتراق هى 50 سم3
يبقى نسبة الانضغاط = 400+50/50= 1 : 9
وبكدة الموتور دة هايخرج 97 حصان على سبيل المثال

طيب لية ما ريحوناش من القصة دى وعملو غرف حريق اصغر وبالتالى قدرة حصانية اعلى

الاجاية ان كلما زادت نسبة انضغاط المحرك ...... ذات ضغط الانفجار المولد على سطح البستم وبالتالى الشحنة ( بنزين+ هواء) تنفجر قبل الوقت المحدد لها

ومن هنا جاءت طلبات الشركات المصنعة للمحركات بتوفير وقود ( بنزين ) قادر على تحمل الضغوط الكبرى ومقاومتة اعلى للانفجار المبكر اى ذو معامل اوكتان اكبر

اما التورك او العزم فهو حاصل ضرب القوة × الذراع
لو ان القوة ثابتة يبقى كلما زاد ذراع التوصيل كلما كبر العزم

ذراع التوصيل

اللى هو البيل وعشان كدة لو فكيت موتور ممكن تلاقى البيل شكلة من عند محور الدوران واخد شكل ثلثين دايرة مش نصف دايرة ودة عشان يدو البيل طول اكثر ..... مش عارف متخيل شكلة ولا لا

هنا هاسال سؤال
لية اللانوس تقبل بنزين 80 وماتحسش باى مشكلة
الاجابة لان نسبة انضغاطها وعلى ما اتذكر كانت 1 : 9 ودى نسبة تعتبر قليلة ويمشى معاها بنزين 80 اللى بيشتعل اسرع من الـ 90

القصة كلها يا صديقى فى نسبة انضغاط المحرك

عارف حضرتك نسب انضغاط محركات الديزل تصل لكام؟؟
تصل الى 1 : 17
تخيل
لان بمنتهى البساطة وش السلندر فى محركات الديزل مفهوش غرف حريق وانما غرفة الحريق فى البستم نفسة
ومحركات الديزل مشهورة ان عزمها قوى جدا لان طول مشوار البستم كبير بشكل غريب

يا رب اكون قدرت اوصلك الموضوع
ومتابع مع حضرتك بامر الله