المشاركة الأصلية كتبت بواسطة queen (المشاركة 737127)

السلام عليكم
يا جماعه عايزة اسافر من الصحراوى لاسكندريه فى العيد
انا هكون جايه من زايد للصحراوى وهاعدى كارفور والبوابات وبعدين مش فاهمه هامشى ازاى والطريق ده هيدخلنى اسكندريه منين؟؟؟:shyy:
لانى عايزه اروح اى شاطىء هادى فى الأول يعنى عشان ما ابعدش اوى وارجع ان شاء الله فى نفس اليوم فهل حد يقدر يوصفلى لانى بلاطه بصراحه

المشاركة الأصلية كتبت بواسطة احمد على 1999 (المشاركة 737177)

فعلا على طول لغاية الوصول لبوابات الاسكندرية
و بعد البوابات على طول حتعدى كوبرى العامرية
بعدها على الشمال فى ماكدونلدز و فى يو تيرن على ايدك الشمال دى بتاعة برج العرب
خليكى على طول بعدها فى يو تيرن تانية حتخديها دى بتاعة دخلة العجمى
اول ما حتاخدى اليو تيرن ديى فحتبقى كانك راجعة اتجاه القاهرة بس على طول يا دوب حتة صغيرة و حتخدى اول طريق يمين على طول ده طريق سريع اخره العجمى ال 21
مش حتوصلى للعجمى ال 21
فى نص الطريق ده فى معدى من فوقه محور اسمه محور التعمير ( مجازا اسمه الطريق الدولى الساحلى )
حتدخلى المحور ده من دخلته قبل ما تعدى من تحت المحور
فالدخلة ديى حتدخلك المحور يمين لاتجاه الاسكندرية
لما تدخلى محور التعمير مش حتسبيه لحد ما يخلص و يتفرع فرعين ( تقريبا 18 كم )
فرع يمين و فرع شمال
خدى الفرع الشمال الفرع الشمال حيلف بيكى يمين تانى لطريق الموقف الجديد
اخره مطلع كوبرى محرم بك الجديد
تطلعى الكوبرى و تنزلى منه نزلته الشمال
اول ما تنزلى شمال تحاولى تخدى اقصى الشمال عشان تطلعى كوبرى محرم بك القديم
و امتداده هو شارع قناة السويس ( وهو عامودى على البحر )
اخره الكورنيش


سبب ان وصفتلك وصفة غير امتداد الصحراوى لان لو كملتى فى الصحراوى بعد البوابات و معملتيش اليو تيرن بتاعة العجمى
حتقابلك حتة مدغدغة و فيها بركة مياه و ممكن تبقى عطلة جامدة

المشاركة الأصلية كتبت بواسطة screamseko (المشاركة 737191)

انت كده لففتها جامد ياباش مهندس احمد
اسهلها تطول صحراوي علي طول لغاية متوصل لكارفور وتخش شمال طوالي حتلاقي نفسها في الشاطبي!!
واعتقد حوار البركه ده مفيش دلوقتي :Wkiss5:

المشاركة الأصلية كتبت بواسطة Al Ghareeb (المشاركة 737680)

الأخوة ما شاء الله وصفولك السكة تمام

بس السؤال المهم حضرتك عايزة تروحى شاطىء هادى لمجرد الجلوس على الشاطىء و الاستمتاع بمنظر البحر و الهوا
و لا حد هينزل المية
علشان العيد بيبقى زحمة جدا فى اسكندرية لأن كتير من الاخوة من كل مصر بيفكروا نفس تفكير حضرتك و خصوصا ان العيد جاى فى الصيف
فأنا بأسأل حضرتك علشان متروحيش مكان وبعدين ترجعى تشتمى فى اسكندرية و اليوم اللى روحتى فيه اسكندرية