مصر موتورز مجتمع السيارات - محتار بين اوبل فيكترا مو 96

اقتباس:

المشاركة الأصلية كتبت بواسطة mohamedwasel (المشاركة 711477)

اريت ياجماعة افادة كاملة للاهمية مع العلم ان ديه اول عربية انا اشتريها في حياتي

اتنين من اصحابي معاهم فيكترا بس موديلات قديمة شوية 95 96 يقولولي ماتجبش غير الالماني اي نعم قطع غيارغالية شوية بس مش زي زمان رخصت كتير دلوقتى انما عياشة و بباقي مميزات الاوبل اللي مافيش كلام عليها خالص

و جماعة تانية تقولي خليك في اللانوس والفيرنا والنيو اكسنت موديلات قريبة شوية علي الاقل مش عربية بقالها 12 و15 سنة متهانة و قطع غير عندي اي بقال و اي حد ممكن يصلحها .

ياريت يا اهل الخبرة الافادة الكاملة مع الاخذ في الاعتباااااااار الفرق الكبير بين الخياااااااارين

وشكرررررررررررررررررررررر ررررن

الاخ / محمد

تحية طيبة وبعد ...

انا اعتقد باذن الله انى هقدر افيدك فى حيرتك دى لانى كنت من ملاك اوبل فيكترا a موديل 95 وعلية فانا اعرف عيوبها ومميزاتها كويس جدا
الاول نبدا بالمميزات
1- العربية كويسة جدا كثبات وسرعة عالية وشد مع اتخن عربية وتسارع رهيب خصوصا لو 2000سى سى اتوماتيك
2- الاسبورت درايف فوق الوهمى بيخلى العربية تتجنن وطبعا بيجنن البنزين معاها
3- كصاج وخامات حلوة على تقفيل موديل من 15 سنة
4- ممكن يشتغل معاها اى بنزين 92 -90 -80 يعنى مش هتحس بالازمات لان كلة شغال معاك
5- طبعا غير سمعة الاوبل كعربية واعادة بيع كويسة وسريعة .وطبعا مش هتخسرك كتير

6 - قطع غيار متوفرة سواء استيراد او جديد وللعلم اسعار قطع الغيار مش غالية لانها ف الاول والاخر عربية موديل 95 يعنى كشاف امامى ديبوا يعمل 165 ج وغماز يعمل 30 ج وباقى قطع الغيار استيراد متوفرة وناس كتير بتشتغل فيها واغلبهم ف فيصل

نخش بقى على العيوب

1- اولا العربية لو 2000 اتوماتيك ومش مظبوطة هتاكل بنزين اكل التنين يعنى ممكن 50 لتر تعمل معاك حوالى 300 كم بالكتير ومن غير قرص على العربية
2- مشكلة maf بتاع الهواء هى مشكلتها الاصيلة والى لازم تاخد بالك منها وانت بتشترى لان هو سبب اكل البنزين ف العربية وكمان ظبطها غير انك مش هتلاقية استيراد غير لما تكون موصى حد علية وسعرة استيراد مش بيقل عن 1500 ج وانت ونصيبك وجديد ف التوكيل من 2500 لحد 3500 على حسب لما كنت بتصل كانوا كل شوية يقولولى سعر .
3- هتسمع صوت الموتور لان ف الغالب العزل بتاعة الصالون هيكون اتهالك غير ان صوت العربية عالى يعنى مش زى الكورى ولا اليابانى بس صوت تتمتع بية خصوصا ف القرص
4- التكييف ووووحش جدا مهما عملت مش هيديك الجودة الى انت عايزها .
5- صوت التزيق والرجه ف العربية فوق الطبيعى لعدة اسباب كدة كدة رجعة الماتور جامدة و ملهاش حل ( غيرت سيور وقواعد ماتور كلها وظبط الماتور وكلها يومين ويرجع زى ما كانت ) تزيق الطابلوة جامد خصوصا لو كان اتفك قبل كدة وعمرة الطويل من 95 لحد 2012 يعنى قول 17 سنة كتر خيرة
6- العربية متروحش لاى حد بيالف ومش بيشتغل فيها ( يعنى فيها حاجة ف الزجاج يبقى حد بيفهم ف الزجاج - حاجة ف الميكانيكا يبقى حد شغال ف الاوبل وف محسن بتاع فيصل كويس جدا - حاجة ف الكهرباء يبقى حد شغال ف الاوبل ومتخصص ) غير كدة هتلاقى نفسك بيضحك عليك واى حاجة بتبقى مسكنات للعربية مش حل صح
7- اعتقد ان فرامل العربية مش كويسة ( يعنى تجرى جرى لكن فرامل ضعيفة حبتين )
طبعا انا كنت بحب العربية جدا جدا وكنت بحس انى اقدر ادوس على اى حد ف الطريق غير ان محدش يقدر يلعب جنبك
انا قلت الى انا لقيتة من عشرة العربية زيادة عن سنتين وخلاصة الكلام
على راى واحد صحبى متاخدش عربية المانى من واحد شحات
يعنى حد يكون مهتم بالعربية وعارف كل كبيرة وصغيرة غير انو بيصرف عليها يستحسن لو العربية تكون من حد انت عارفة علشان يبقى قايلك على ال فيها كله
وطبعا رايك وقناعتك الشخصية هى الاساس ف موضوع الاختيار وبصراحة مش عايزك تقع تحت واقع كلام المصريين

يعنى العربية راشة برة - العربية سوقها تقيل - مشاكلها كتير- قطع غيارها غالية بس معمرة

يعنى من بوق تاجر والله قالى عربيتك الاوبل دى تعمل 3 عربيات فيرنا بس هنعمل اية الفيرنا لو عايز ابيعا بكرة الصبح امشيها لكن الاوبل تقيلة شوية

تقبل تحياتى