رد: أين خرطوم الراجع فى هذه الصورة
 

شكرا على النصحية يا أستاذ أحمد.. الحقيقة حتى الزيت اللى جايبة مش بتاع الباور الزيت اللى جايبة بتاع فتيس أتوماتك ولكن قالوا لى أنه شغال مع الأثنين.

الحقيقة أنا فى كذا ميكانيكى قال لى الزيوت تتزود مش تتغير. ولكن اللى أعرفه أن الزيوت لها عمر إفتراضى ومن الإستخدام بيتغير خواصها. وكمان شفت على النت كذا واحد بيغير الزيت بتاع البور ويحتى بيغسلوا الخزان بتاع الزيت وبيكون فيه رواسب...

الحقيقة حضرتك هتخلينى أرجع خطوطين للوراء...

المهم دلوقتى عاوز أعرف حكاية الساخن والبارد دى بتاع البور.. أنا لما شفت الزيت بتاع البور كان قبل ما أدور السيارة وكان تحت علامة MIn ولكن مش شفته بعد ما رحت مشوارى... أعتقد أنه مفروض يكون بين min و علامة max

هو الدريكسيون مش تقيل قوى ولكن مش زى الأول الممانعة بتاعته زادت شوية على الرغم من إنها بنسبة بسيطة جدا ولكن لانى شفت مستوى الزيت قبل ما اطلع المشوار فعلقت فى دماغى الحكاية..

على العموم أشوف دليل المستخدم كدة علشان حكاية مستوى الزيت يكون فين وأفكر شوية... وطبعا الأعضاء المحترمين مش يبخلوا علينا برأيهم وخاصة أصحاب السيارات الجديدة. هل يتم تغير زيت البور فى أى من الصيانات التى تتم للسيارات الجديدة خلال فترة الضمان...

منتظر

رد: أين خرطوم الراجع فى هذه الصورة
 

انا اتاكدت من كتالوج اللانوس لقيت انه مبيتغيرش كاتبين فحص كل 10 الاف كم و اعد التعبئة اذا لزم الامر
ان شاء الله مش حيلزم الامر
ده غير ان بالتجربة العملية انا ماشى بيه 9 سنين و 235 الف كم بدون مشاكل
بنصحك تانى الزيت اللى فيها مش موجود زيه فى مصر
راجع ضغط العجل و ظبط الزوايا
و بعد الرجوع للكتالوج لو الزيت ناقص زوده بس بنفس المواصفة اللى فى الكتالوج

رد: أين خرطوم الراجع فى هذه الصورة
 

الكلام اللي قاللك عليه الباشمهندس أحمد صح 100 %

غالبا ضغط الهواء بتاع الكاوتش عندك قليل... ده حيأثر على الدركسيون طبعا وحيخلليه تقيل.

اللي أنا فاهمه إن حضرتك مش بتتحرك بالعربية كتير... وده حيخللي الكاوتش ينام ... بالذات في الكواتش التيوبلس.

خلي بالك ... اضبط الكاوتش على البارد حسب المكتوب في الكتالوج أو على قايم السيارة، ولو اتحركت أكتر من 1 كيلومتر ولسه ما كنتش ظبطه... ابقى زود الهوا عن المكتوب في الكتالوج بحوالي 2 - 3 psi.

غالبا الكاوتش بيضظبط على 30 psi على البارد... ولو على الساخن يبقى 32.

ماتخليش الواد بتاع البنزينة يظبطه من نفسه... قوله على المقاس اللي انت عايزه واتأكد إنه بيعرف يقرا العداد صح.


...

رد: أين خرطوم الراجع فى هذه الصورة
 

متشكرين لكل من قام بالرد ومنتظرين مزيد من الآراء.

الواحد مستخسر الزجاجة أم 25 جنية يفتحها علشان يحط شوية صغيرين منها ويسبها مفتوحة. أنا هزود شوية وخلاص لانه زى ما قلت لحضرتكم أقل من علامة Min والمفروض يكون بين min , max

اللى متأكد منه أن الزيت اللى هحطة مش نفس الزيت الموجود فى العربية ولكن قريب جدا منه. العربية موديل 2001 ماتركس يعنى تسير بقلها 11 سنة. الزيت لونه غامق شوية مش أحمر زى الجديد,....

الغريبة أن نفس الحيرة دى بين ضرورة تغير الزيت أم عدم تغيرة طوال عمر السيارة موجودة فى المواقع الأجنبية. فبينما يؤكد البعض ضرورة التغير يؤكد البعض الأخر عدم ضرورة التغير إلا لما يحدث سبب يجعلنا نغيره غصب عنا. موضوع محير فعلا..

متشكر للرد ومنتظر مزيد من المشاركات...

رد: أين خرطوم الراجع فى هذه الصورة
 

سؤال بعيد عن الموضوع شوية
هو الموتور بتاع حضرتك مش زى اللى عندنا ليه ؟
و هو كام سى سى و اخباره ايه معاك ؟
و اسف على الفضول ؟:fun_36_3_9[1]: