المشاركة الأصلية كتبت بواسطة fourseasons (المشاركة 689236)

يا باشا مفيش الكلام ده انا الحمد لله بيت العيله فى العطارين بقالى حوالى 150-200 سنة الحمد لله مفيش حاجه.لاكن ده ميمنعش ان البيوت القريبة قوى من البحر بتعانى شوية من موضوع اليود و مياة البحر حتلاقى العمارة مصدية و حالتها كرب شوية كده و الحلل و اى حاجة معدن فى الشقى بتجنزر و تصدى بسرعه لاكن غير كده مفيش الكلام ال حضرتك بتقولوا.وبالنسبة للغسيل حتلاقييك جيت فى يوم الرطوبه فى عاليه قوى عشان كده الهواء متشبع بالمياه و مش مستحمل اى تبخير.لاكن خلى بالك دلوقتى ومن ساعة الثورة فى مقاولين بالهبل هدوا بيوت و فلل و طلعوا بيها ابراج فى زمن قياسى يعنى من الأخر انتحار.قلة ضمير بقى+قلة رقابه.فخلى بالك لو حتاخد شقه خدها فى عماره قديمه شوية........واى سؤال تانى انا تحت امرك

المشاركة الأصلية كتبت بواسطة borio1704 (المشاركة 689920)

أهلا بيك وبالناس اللي بتحب اسكندرية

أنا بس عايز أعرفك شوية حاجات عن اسكندرية عشان ما تتخضش

أول حاجة:
البيطاش ما تعتبرش في اسكندرية قوي.... البيطاش دي في العجمي، ودي أحد ضواحي اسكندرية... لو عايز تروح اسكندرية حتحتاج تمشي حوالي 15 -20 كيلو

تاني حاجة:
اسكندرية مدينة ساحلية لها طبيعة خاصة إن البحر من أمامها وبحيرة مريوط من ورائها، فتلاقيها عبارة عن شريط ما يزيدش عرضه عن 5 كيلومتر في أعرض مكان، وده بيعمل حاجتين مهمين جدا:

1- الرطوبة في اسكندرية عالية جدا في الصيف، وأعراض الرطوبة العالية إنك لما تعرق عرقك ما ينشفش لإن الهواء مليان ميه أساسا، ده غير الصدأ والأكل اللي بيرطب بسرعة، وبعض حشرات مختلفة عن اللي بتشوفها في الجو الجاف

2- مساحة الأراضي في اسكندرية محدودة جدا ، وده مخلي أسعار العقارات عموما أعلى من أي مكان تاني في مصر، وبعد الثورة.. كمية العمارات العالية اللي اتبنت في اسكندرية أكتر من اللي اتعملت في خمسين سنة فاتو (بالمخالفة طبعا)، ودول اوعى تفكر تشتري فيهم

تالت حاجة:
اسكندرية مدينة حيوية فيها كل أنشطة الحياة... من تجارة وسياحة وصناعة وزراعة ، وبنعاني من نفس المشاكل الموجودة في القاهرة من زحام وخنقة.. بس للأسف مازلنا بنتعامل على إننا أقاليم... ولو اتعمل في اسكندرية ربع اللي بيتعمل في القاهرة ... اسكندرية دي حتبقى أحلى مكان في مصر

رابع حاجة:
طبيعة الجو في اسكندرية في الشتا إن المدينة بتتعرض لنوات (والنوة معناها جو متقلب وغالبا عاصف وممطر)... لو ما عملتش حسابك وانت سايب شقتك ... ممكن تلاقي تلفيات بسبب الهوا الشديد والمطر... ده غير إنك لو مشيت في شوارع مش متسفلتة كويس حترجع كل يوم عايز تلبس جزمة جديدة لإن القديمة باظت من الطين

خامس حاجة:
العجمي بشكل عام ما فيهوش صرف صحي... وكل عمارة تحتها بيارة بتصرف فيها وبعدين تيجي عربيات الصرف الصحي تشيل الصرف ده كل فترة (بناء على طلبك)، بس دلوقتي المحافظة بتمد خطوط الصرف الصحي في العجمي، ومعرفش المشروع ده حيخلص إمتى... يمكن الناس اللي ساكنة في العجمي تفيدنا

سادس حاجة:
المباني في العجمي والساحل الشمالي عموما بتتبني بالطوب الجيري، يعني طوب متقطع من جبال جيرية، وده طوب قوي جدا وتقيل كمان (ولونه أبيض .. بيصْفَر بعد شوية) وحتلاقي شكله مش منتطم لإنه بيتقطع يدوي في المحاجر
إنما الطوب الأبيض الخفاف بيبقى لونه أبيض ناصع وأبعاده منتظمة، وده حتلاقيه في العمارات الجديدة عشان يخف الوزن على الأساسات

انا مش قصدي أقفلك من اسكندرية... بس لو عايز تاخد خطوة الحياة في اسكندرية لازم تعرف المشاكل زي ما شدتك المزايا


...