مصر موتورز مجتمع السيارات - ممكن شرح لمبتدئ لفكرة عمل مواتير السولار عشان الواحد اتلخبط بصراحه

اقتباس:

او اديني لنك لموضوع فيه شرح مناسب وبسيط وانا اقراه

بصراحة انا ما بعملش كدة وكولة اجتهاد منى نابع من احتكاك عملى بالموضوع انما الكلام النظرى انقل من جوجل واجبلك موضوع واغير فى الكلام دة مش بحبة
ندخل فى الموضوع
مواتير السولار بتعتمد بشكل اساسى فى الاحتراق على خاصية الاشعال الذاتى لزيت الديزل .....تعالى ارجعك بالذاكرة للماضى كدة وافتكر وابور الجاز اللى كان فى كل بيت اية اللى كان بيحصل وانا هافكرك لانة مهم جدا فى موضوعنا والله وتخيل نفس الفكرة بالظبط

كنا بنجيب الوابور وعن طريق الكباس بنطلع جاز على العدة عن طريق الفونية والجاز كان بيخرج فى صورة سائلة صح؟؟؟؟ وبعود كبريت نشعل الجاز المسكوب على العدة لغاية اما تسخن وبعدين بالكباس نضغط جاز تلاقى الوابور شعلتة بقت قوية .....وتيجى تبص للفونية مطلعة اية تلاقيها مطلعة بخاز جاز او هبو لا يرقى انة يكون فى صورة رزاز وانما بالفعل هو بخار
كدة خلصنا الوابور وتعالى نردد بعض الكلمات فى الفقرة السابقة

الفونية
كباس
بخار جاز
تسخين
ضغط
اشعال زاتى
=========================
تركيب موتور السولار لا يختلف عن موتور البنزين ومشترك فى غالبية التصميم مع محركات البنزين يمكن بس مشوار البستم بيكون اطول فى محركات السولار حتى ولو تساوت السعة اللترية مع البنزين فاللى بيخدوة فى القطر بيعوضوة فى طول مشوار المكبس
عاوز بس الفت نظرك ان زيت الديزل ( السولار ) هو عبارة عن جاز ابيض + زيت وكلنا فاكرين فى حرب اكتوبر وما قبلها كانو بيضيفو الجاز على الزيت ويمشو بية العربيات

ايضا بيختلف شكل سطح البستم فى السولا عنة فى البنزين فسطح البست فى السولار بيكون فية غرفة الاحتراق وايضا بيكون على السطح سن مدبب ووظيفتة انة جزء صغير ومدبب بيحتفظ بالاحمرار بعد شوط الحريق عشان يكون مهيا لشوط حريق اخر فالسن دة تملى بيكون لونة احمر متوهج حتى فى اشواط الطرد والسحب
محرك البنزين الكربراتير كان بيعتمد فى التغذية بالوقود على قوة شفط او سحب البستم ولما اتطورت محركات البنزين سرقو فكرة ضغط الوقود من محركات الديزل فبقت انجكشن
محركات الديزل بتعتمد بشكل اساسى على حقن الوقود على سطح البستم وقبلها كان الوقود بيتحقن فى المانيفولد وكان اسمة حقن غير مباشر انما كل مواتير الديزل الان هى دايركت انجكشن وكانو بيتباهو اوى بالكلمة دى وتلاقيها مكتوبة على جنب العربية بجوار السعة اللترية
والوقود المحقون دة لة سكة واحدة فقط وهى طلمبة حقن الوقود ( طلمبة الجاز ) ودى مختلفة عن مواتير البنزين لانها بتستمد حركتها من ترس مناول راكب على عامود الكرنك
كمان هى مختلفة فى طريقة ضغطها للوقود وبتعتمد على الحركة الترددية عشان تضغط الوقود بضغط عالى جدااااااا يعنى طلمبة الجاز فيها من جوة بساتم وكرنك طبعا صغيرين والبستم بتاع طلمبة الجاز بيكون فية شق حلزونى كل لما بتدوس جاز زيادة البستم بيلف فى اتجاة الشق الحلزونى فابيسمح بكمية سولار زيادة
طريقة توصيل السولار المضغوط من طلمبة الجاز الى الرشاش فى وش السلندر هى مواسير نحاس كا المستعملة فى مواسير الفرامل
قديما عشان تشغل موتور جاز فى الصباح الباكر لازم تفتح كونتاكت لتوصيل كهرباء لسخانات راكبة على مواسير الجاز بتسهل عملية الاحتراق ( افتكر الوابور ) لازم الاول يسخن
انما الدنيا اتطورت اوى وبقى اول احتراق بيتم بسلاسة وسعرة اكتر من الاول كتير ومعظم مواتير الديزل حاليا فيها تيربو لتحسن اداء المحرك ككل
اقصى عزم لمحركات الديزل عند 1500 لفة / دقيقة او مش اقصى عزم وانما القدرة الحصانية للمحرك بتقاس عند سرعة 1500 لفة بعكس مواتير البنزين القدرة الحصانية بتقاس عند 6000 لفة او 5000 لفة على الدقيقة
بيعيب مواتير الجاز ان استجابتها بطيئة عن البنزين
معرفش انا ناسي حاجة ولا لا لكن اخونا الفاضل CARS ADMIRE اما يشوف الموضوع اكيد هاينقحة ويدعمهولك بفديوهات والصورة ممكن توضح اكتر من كدة بكتير فهو افضل منى بكثير جداااااااااااااااا