المشاركة الأصلية كتبت بواسطة aala20042003 (المشاركة 577236)

ربنا يكفيك شرها ممكن تقول على المكان و رقم التليفون عشان الكل يستفيد ويكون حد يجرب تانى ويقول وكمان فيها موضوع ثابت فى المنتدى به ارقام وعناوين مراكز صيانة كتير و كمان ياريت كل واحد جرب فى مركز يقول سواء كويس او لا عشان الكل يستفاد من بعض وياريت محدش يستغل الموضوع للدعاية لمركز معين
وشكرا لكل من اراد الفاءدة للجميع

المشاركة الأصلية كتبت بواسطة hhhesham (المشاركة 577254)

ممكن اعرف السعر كان كام علشان انا بضور على وحده بس مش لاقى اتوماتيك ؟؟؟؟؟؟؟؟؟

المشاركة الأصلية كتبت بواسطة Sameh Ragih (المشاركة 576623)

بعد مرمطة و رحلة شقاء مع الكوري و الصيني (الزيرو) هداني الله إلى التفكير في الأوروبي يعني ألماني ماشي فرنساوي أوكي و حتى فكرت في الأمريكاني المهم أدخل في زمرة أصحاب السيارات اللي نقدر و بكل ثقه نقول عليها *محترمة*
المهم.. فضلت أدور على أوروبي أوتوماتيك محترم و أفضل حاجة لقيتها في حدود إمكانياتي هي السيتروين C3.. و بعد بحث مكثف كانت النتيجة التي توصلت إليها هي أنها سيارة محترمة و صعب أركب بتمنها حاجة في نفس إمكانياتها و أداءها بس بشرط ماتستخسرش فيها الصيانة الدورية و قطع الغيار الأصلية.
و من هنا إستطعت عمل مقارنة شاملة و الوصول إلى مركز صيانة في جسر السويس القائمين عليه ناس في منتهى الإحترام و الأمانة.. أنا مش هاذكر تفاصيل كتير عن المكان علشان الإداروة ماتعتبرش ده إعلان لكن أقدر ألخص تجرتي في زيارتين...
الأولى: كانت لعمل الصيانة الأساسية لأي سيارة مستعملة.. يعني سيور (كاتينة و مجموعة) و فلاتر (هواء و بنزين) و check كامل على العفشة و الكنترول بالكمبيوتر, الزيارة إستغرقت يوم كامل (من 9:30ص حتى 6:00م) و كان يوم جمعة.
الثانية: و كانت يوم الجمعة أيضاً و كان الهدف منها الكشف على مجموعة من الملحوظات التي سجلتها بناءاً على طلب صاحب المركز ليكون بمثابة أمر شغل.. و كان عندي أمل إني أخلص في نفس اليوم و لكني فوجئت بأن المهندس يطلب مني ترك السيارة لمدة لا تقل عن ثلاثة أيام و يوم للتجربة و لما سألت ليه كانت إجابته مقنعه... ممكن أخلصلك طلباتك كلها النهاردة بس من الأخر (هاتلصأك) يا إما تسيبلي العربية و أشتغل بما يرضي الله و أنا بصراحة إقتنعت وإن شاء الله هاستلمها يوم الجمعة الجاية علشان أنا مسافر في شغل و راجع الخميس بالليل.

ملحوظاتي المتواضعة عن الزيارتين:
1- الناس اللي في المركز كلهم بيفهموا و مافيش حد بيفتي.
2- صاحب المركز كان داخل ببدلة قطيفة شيك... و في خلال ربع ساعة لقيته لابس عفريته و جزمة سيفتي وواقف مع الصنايعية.
3-منذ أول زيارة و حتى الأن هناك متابعة مستمرة من صاحب المركز بالتليفون و مافيش مره إتصلت بيه إلا و لازم يرد و لو ماردش يكلمني بعديها.
4- مبدأ (التلصيم) غير موجود.. يعني مايخلكش ترجعلة تاني بنفس العيب و لكن يعملك شغلك مظبوط علشان تبعتله زباين جديدة على سمعة المكان.
5- أسعار الصيانة و قطع الغيار الأصلية مكلفة بعض الشيء و لكن في مقابل الخدمة و جودة الصيانة و قطع الغيار المعمرة كل شيء يهون.
6- المكان نفسه كبير و منظره مشجع يعني ماتحسش إنك داخل ورشة الأسطى بلية.. أبداً.. المكان كبير مبنى ثلاثة أدوار.

في النهاية أنا قلت الكلام ده كرد للأمانة اللي إستخدمها صاحب المركز معايا و ماليش أي مصلحة معاه على فكرة.. و ماحبتش أذكر تفاصيل ليها علاقة بالمكان أو أرقام التليفونات إحتراماً للإدارة و أي حد ليه إستفسار أنا في الخدمة.<!-- google_ad_section_end -->