مصر موتورز مجتمع السيارات - انا نزلت التحرير النهاردة ..

مصر موتورز مجتمع السيارات (https://www.masrmotors.com/vb/index.php)

- ثورة الحرية 25 يناير (https://www.masrmotors.com/vb/forumdisplay.php?f=177)

- - انا نزلت التحرير النهاردة .. (https://www.masrmotors.com/vb/showthread.php?t=72544)

رد: انا نزلت التحرير النهاردة ..

اقتباس:

المشاركة الأصلية كتبت بواسطة dr.wael7yran (المشاركة 557148)

السلام عليكم ..
رغم عدم اهتمامي بالسياسة و عدم المامي بكل الظروف اللي ادت الي اللي بيحصل في التحرير دلوقتي ..
انما انا نزلت بناء على نداء نشره هنا احد الاعضاء المحترمين في احد المواضيع انه المستشفى الميداني في حاجة ماسة للاطباء و التبرعات الطبية ..
و كطبيب و بدون اي صفة اخرى توجهت الى المستشفى الميداني ..
و هناك الحمد لله لقيت ناس كتير من زمايلي لبوا النداء ..
و اطباء جراحين و اطباء طوارئ و على كافة الاعمار و المستويات ..
و كلهم ما شاء الله خبرة( احسن مني على الاقل انا طبيب اطفال) و منظمين و مسيطرين على الوضع ..
و كانسان انا هالني الوضع يا جماعة ..
اكتر من 500 مصاب في المستشفى صباحا نتيجة لمواجهات الامس ..
شباب زي الورد ..
مخنوق
و مضروب
و متكسر
و معظمهم - ان لم يكن كلهم - حاصلين على مؤهلات عليا او لسه طلبة ..
ولاد ناس يعني موش بلطجية و لا قلة مندسة و لا اجندات خارجية ...
ناس شافت القمع و الضرب من جندي متخلف واخد اوامر من ظابط متخلف زيه واخدين اوامر من قيادة متخلفة تماما..
ناس لسه فاكرة انه احنا هنفضل بقر .. هيضربونا بالكرابيج فهنمشي و هنسيب حقنا ..
انا اكرر انا موش عارف الناس نزلت ليه .. و هل صح نزولهم و لا لأ انا موش شايف الصورة على بعضها ..
بس اي كان سبب نزول الناس ..فلا يوجد مبرر واحد للتعامل بكل هذا العنف مع الشعب المصري ..

انا موش عاجبني حال البلد .. انا من حقي اني اعترض لاني انا حر .. انما انت موش حقك انك تموتني او تضيعلي عيني او ايدي او رجلي علشان انا عليك ..
انت لا ربنا و لا الرسول - حاشا لله- علشان اموت لما اقولك لأ..

مطلوب استقالة المتخلف عن الوصول لهذه الحالة و الناس لازم تتعلم انه الرد يبقى بالعقل موش بالمدرعة و الخرطوش و الغاز المسيل للدموع ..

لو المجلس السمكري فضل يتعامل بنفس اسلوب النظام القديم هتبقى مجزرة و الدنيا هتخرب ..

سامحوني لانفعالي بس فعلا منظر الشباب و هو عمال يتطحن حاجة تحزن و تغلي الدم يغلي لاي بني ادم ..

انا اضطريت للرجوع لأني اطلبت في المستشفى عندي و دول عيانين برده و ليهم عليا حقوق بس هاخلص و ارجع فورا للميدان ..

رغم عدم معرفتي ايه اللي خلى الامور توصل لكده ..
و الله الموفق :GROWIN~12:

ربنا يجعلها فى ميزان حسناتك ، ودى شهاده عيان هامه جدا جدا للفضائيات جميعها،،
ومن وجهه نظرى الحل الوحيد هو استقاله الوزارة بالكامل أو على الأقل اقاله وزير الداخليه التعبان ده

رد: انا نزلت التحرير النهاردة ..

انا لسه جاى من التحرير حالاً والوضع كالتالى
اولاً الاعداد فى تزايد ماشاء الله غير عادى ومداخل الميدان يتوافد عليها المئات كل لحظة
ثانياً المتواجدين شباب وبنات وستات وكهول واطفال والله كمان
ومن جميع المستويات من افقر الناس لاغناهم
الروح هى هى روح الميدان الكل ايد واحدة اغنيا وفقراً اخوان وسلفيين ولبيراليين وغير مسيسين اصلاً كمان
الوضع عموماً مستقر على كل المداخل واللجان الشعبية واقفة وناس كتير جاية بعربياتها وراكنين جمب المتحف جايبين اكل وبطاطيين واسعافات طبية وفيه شاب اكتر جايين بموتسيكلات بيساعدو فى نقل القتلى والمصابين الى المستشفيات الميدانية

الشباب كمان منظمين طابور يستحق لقب موسوعة جينيس على صفين لتامين طريق مفتوح دائما لمرور المصابين خاصة وان الميدان بقى زحمة موت

مفيش خيام كتير ويمكن مفيش خيام خالص وكل الناس واقفة وبتهتف بمزيج من الغضب والرجاء من الله والبكاء احيانا والامل احياناً اخرى لكن اجمالاً الروح المعنوية فى السماء

زى ما قولت الاوضاع عموماً مستقرة فيما عدا شارع محمد محمود بطولة حتى ناصية الجامعة الامريكية وهادريز ،، الشارع شكلة كئيب بشكل بشع ضلمة عتمة ودخان اسود متصاعد باستمرار فى نهايتة ورؤس وايدى المتظاهرين تسدة من نهايتة لبدايتة
ولا يخترق عتمتة الا اضواء الاسعاف او الموتوسيكلات او الشباب والدكاتر بالنقالات مهورلين خارجين منه فى اتجاة المستشفيات الميدانية

تقريباً من اول ما روحت المغربية لحد ما مشيت من نص ساعة وكل دقيقة او اقل مصاب او اتنين
الاصابات مابين اختناقات واغماء الى كسوروجروح وقتلى

الهتافات متنوعة مابين تاكيد استمرار الثورة ومابين هتافات بداية الثورة الى هتافات الاستهزاء والسخرية من المجلس العسكرى وطنطاوى وعنان بالاخص
الخلاصة :
من الواضح جداً ان الاجماع على اسقاط المشير واعوانة فى المجلس العسكرى وحتى محاكمتهم واعدمهم وتحميلهم مسؤلية اداء الشرطة من عنف وتفريط امنى

والدعوات الاكثر تحفظاً تنادى باسقاط الحكومة وتقديم جدول زمنى واضح لتسليم السلطة فى موعد اقصاه ابريل القادم

رد: انا نزلت التحرير النهاردة ..

سامحني يا بابا
سامحني ياااارب اني هخلف وعدي
انا نزله الجمعه علشان اجازتي من الشغل
مين جاي معايا

رد: انا نزلت التحرير النهاردة ..

ربنا يجعل المجلس العسكرى يفهم ان الشعب المصرى (الحقيقى) اتغير فعلا
اللهم احفظ مصر الغاليه وثبت أبطال ميدان التحرير...آمييييييييييييي ييييين

رد: انا نزلت التحرير النهاردة ..

اقتباس:

المشاركة الأصلية كتبت بواسطة mar mar (المشاركة 557220)

سامحني يا بابا
سامحني ياااارب اني هخلف وعدي
انا نزله الجمعه علشان اجازتي من الشغل
مين جاي معايا

ربنا يحفظك أنت وكل من في الميدان وكل من هينزل الميدان