رد: عربية تقيلة ولا خفيفة؟؟؟ طبعا الخفيفة أحسن
 

موضوع ممتاز و شرح وافي و مبسط لاقصى درجه ...
الواحد بقاله كتيييير مفتقد النوعيه دي من الموضوعات
اتمنى الموضوع يضم مقارنه في الاداء بين العربيات الرياضيه ثقيله الوزن بمحركات كبيره (اغلب الامريكي او النيسان جي تي ار مثلا ) والعربيات خفيفه الوزن بمحركات متوسطه (زي المازدا مياتا مثلا )
احييك بشده ومتابع باهتمام :14369D~149:

رد: عربية تقيلة ولا خفيفة؟؟؟ طبعا الخفيفة أحسن
 

انا موافق على كل كلمة اتقالت فى الموضوع وجربت عربية هاتش باك صينى وسافرت بيها 140 اتزان غير عادى وانا اتعقد ان وزن العربية لا يتعدى 800 كجم

رد: عربية تقيلة ولا خفيفة؟؟؟ طبعا الخفيفة أحسن
 

الله الله عليك وعلى الموضوع الجامد اللى غير الفكرة بتاعت العربية التقيلة دى خالص ....تسلم ايدك

رد: عربية تقيلة ولا خفيفة؟؟؟ طبعا الخفيفة أحسن
 

أشكركم على الردود الظريفة دي، وعندي أمل إني أكمل بنفس الطريقة السهلة

المرة دي حنتكلم عن إيه اللي ممكن يتعمل في العربيات عشان ننزل مركز الثقل...

طبعا... الحاجات اللي حقولها دي غالبا بتبقى برضو في تصميم العربية، بس فيه حاجات تانية ممكن تتعمل في ورش متخصصة، وعلى سبيل المثال:

- تركيب المحرك في وضعية منخفضة، لإن المحرك وعلبة التروس من أكتر الحاجات اللي ليها وزن في العربية،

طب إزاي ننزل وضعيته؟؟؟
هو بصراحة إحنا حنغيره ونجيب موتور إسمه "بوكسر"، الموتور ده موجود في عربيات قليلة دلوقتي، بس من أشهر العربيات اللي مركبة الموتور ده:
بورشه، ألفاروميو، سوبارو، وزمـ ـ ـ ـ ـ ـ ـ ـ ـ ـ ـ ـ ـ ـ ــان كان متركب في البيتل
الموتور ده فكرته زي فكرة الموتور على شكل حرف V، بس زاويته 180 درجة، بيقت البساتم بتتحرك زي الملاكم، وده سبب تسميته "بوكسر"، فالموتور كده ما لوش ارتفاع عالي، وإن كان عايز مساحة عرضية.
زي اللي في الصورة ده:
ملف مرفق 12095 موتور بوكسر
ملف مرفق 12096 موتور حرف V
ملف مرفق 12097 موتور رأسي (In-Line)

ملف مرفق 12098


طيب تغيير الموتور مش نافع، نعمل إيه؟؟؟

نحاول نشيل من الوزن اللي موجود في أعلى السيارة، مثلا:
العربية تبقى كابروليه، أو نستغنى عن الزجاج ونركب بلاستيك، وممكن نغير الكبوت ونركب واحد فايبر،

وفيه أفكار زي دي كتير، كلها مطبقة في عربيات بنشوفها في الشوارع

طب ما ينفعش ننزل وزن العربية ككل، مش الأجزاء العلوية بس؟؟؟؟؟

أكيد، ممكن نشيل الفرش من العربية وأي حاجة مالهاش لازمة زي ما بنشوف في سباقات الرالي (طبعا مش هشيل الفرش من عربيتي :) )، وممكن نركب جنوط ألومنيوم (سبور)

بس الكلام ده ممكن ما يأثرش على مركز الثقل، بس هيأثر في القوة اللي بتسيطر على العربية،

وده اللي هبدأ كلام عليه المرة اللي جاية

...

رد: عربية تقيلة ولا خفيفة؟؟؟ طبعا الخفيفة أحسن
 

في الحقيقة السيطرة على الوزن في العربيات هي اللي بيتعمل فيها شغل كتير في العربيات، وده اللي بيفرق عربية عن التانية من ناحية الاتزان، بس علشان نقدر نتكلم صح لازم نوضح شوية حاجات:

السيطرة على الوزن (الاتزان) دي جزء من ثبات العربية، في جزء تاني مهم وهو (التماسك) وهو إزاي أخلي العربية "ماسكة" في الطريق وتروح زي ما أنا عايز، والموضوع ده كبير شوية .... بس حنجيله إن شاء الله، لإن الاتزان والتماسك مرتبطين ببعض

زي ما قلنا قبل كده، أحد المشكلات الكبيرة هي السيطرة على الوزن بحيث ما يتحركش لحد ما يوصل نقطة الانقلاب، وحل الموضوع ده ببساطة إننا نحافظ على وضعية جسم السيارة ثابتة على قد ما نقدر... إزاي؟؟؟

زي ماحنا عارفين إن العربيات كلها محمولة على سست أو ياي، والسبب في الكلام ده عشان نقلل من الصدمات اللي بتوصل لجسم الركاب، وطبعا ده بيعمل نوع من التأرجح، عشان كده النظام اللي شايل العربية بيسموه نظام التعليق

بس المعروف هندسيا إن عشان أسيطر على أي جسم متأرجح بسبب ربطه بسوسته إنه لازم يتعمل فيه نظام لـ"تخميد" الذبذبة (Damping System)، وده ببساطة اللي معروف بالنسبالنا باسم "المساعدين" أو (Dampers)
وعشان تعرف الفرق بين جسم مربوط بسوستة وواحد راكب عليه مساعد بص للشكل ده
ملف مرفق 12295

طيب إيه دخل المساعدين في الموضوع؟؟
كل ما قللنا مقدار التأرجح ومدته كل ما قللنا من خطر انتقال الوزن بصورة ممكن تكون عشوائية بحيث إن الوزن يوصل للنقطة الحرجة.
عشان كده العربيات الاسبور بتبقى ناشفة، مش مريحة زي العربيات العادية بتاعتنا، يعني المساعدين بتاعتها صعبة الحركة

يعني كده نظام التعليق بشكل عام متكون من سست ومساعدين وطبعا الوصلات اللي رابطة الحاجات دي بالعجلات وجسم العربية (المقصات)


فيه حاجة تانية مهمة في نظام التعليق ... حاجة إسمها الاستابليزر (Stabilizer) أو المثبت... وده مهمته إنه يقلل من زاوية ميل العربية في الملفات
إزاي؟؟
الاستابليزر عبارة عن عمود على شكل حرف U غالبا، وموجود في معظم العربيات على العجلات الأمامية (وفي الخلفية في بعض السيارات اللي مطلوب منها إداء بثبات عالي) وبيبقى مربوط في العجلتين ومتثبت في جسم السيارة، ولما العربية بتاخد ملف قوي وتبدأ تميل... العمود "بيتلوي"... أيوه بيتلوي، وهي دي الفكرة إنه بيشد جسم العربية بحيث ترجع لوضعها الطبيعي
بص على الصورة كده:

ملف مرفق 12296

ملف مرفق 12297

ملف مرفق 12298

الحاجتين دول بيتحكموا بشكل أساسي في موضوع انتقال الوزن، بس لازم ناخد بالنا من حاجة:
• المساعدين والسست الطرية مريحين في الركوب... بس الاتزان بتاعهم ضعيف والعكس صحيح
• الاستابليزر بيشتغل بس في وقت إن ارتفاع العجلة اليمين غير العجلة الشمال
• كل عربية متصممة على أساس أسلوب استخدام معين، وده يشمل السرعة وكمية الحمولة ونوعية الطرق وكمان نوعية الناس اللي حتركب العربية، وده كله بيدخل في كيفية تصميم نظام التعليق إذا كان حيبقى مريح ولا رياضي ولا خدمة شاقة .. إلخ

فاضل حاجة واحدة
استخدامنا لعربياتنا من ناحية توزيع الوزن لما نحمل فيها ناس أو نشيل بضاعة أو خلافه... لازم نراعي إن الوزن يبقى متناسق بحيث إن اللي في اليمين يبقى قد الشمال واللي قدام يبقى قد اللي ورا (مع إن منطقة التحميل أساسا بتبقى ورا!!!)
على سبيل المثال، أنا في مرة كان معايا راكب ورا بس كان وزنه كبير شوية، وكان قاعد جنب الشباك اليمين، كنت بلاقي العربية عايزة تعوم مني لما باخد غرزة شمال، بصراحة طلبت منه إنه يقعد في النص، وساعتها العربية اتظبطت

لحد هنا نقدر نقول إن موضوع الاتزان خلص.... لسه فاضل موضوع التماسك.....وده حابدأ فيه المرة اللي جاية إن شاء الله
...