مصر موتورز مجتمع السيارات - خفايا و اسرار السيارات المستعمله

أهم حاجة في شرا المستعمل إنك ما تكونش مستعجل وعايز تركب وخلاص؛ لأن ده أكثر حاجة ممكن تعرضك للنصب، خليك صبور واستنى نصيبك، واوعى تنخدع في المظاهر؛ لأن المظاهر في العربيات بالذات ياما بتداري بلاوي.
لو البائع حس إنك واقع على العربية هتلاقيه بيتعنت معاك في كل حاجة، تقوله عايز أكشف عليها؟ يقولك هات إلا إنت عايزه هنا وهي واقفة مكانها. تقوله: عايز أجربها؟ يقولك: ما ينفعش عشان ما أرخصش العربية ، وغيره. ولذلك خليك صبور واوعى تحسس إلا قدامك إنك مستعجل.
ابدأ بالسمكرة واتأكد إن الدواخل سليمة، وإن العربية ما فيهاش برومة وصدأ، وإنها مش مركبة انصاص، وإن رقم الشاسيه هو نفسه إلا في الرخصة، واوعى يكون رقم الشاسيه مدقوق على القائم، لأن ده معناه إن العربية مركبة نص أمامي.
ارفع العربية وانزل تحتها، واتأكد إنها ما فيهاش أي لحامات عرضية لأن ده في الغالب بيبقى لحام النص. واتأكد إن مفيش برومة أو شغل في الشاسيهات.
ودي العربية لبتاع ظبط زوايا محترم وقوله العربية دي ناوي أظبط فيها عفشة وعايز بيان بكل المطلوب فيها، وهو يرسيك على كل إلا في العفشة.
وطبعا ميكانيكي يكشف على الموتور.
لكن المشكلة إنك لو مستعجل مش هتعرف تعمل كل ده؛ لأن صاحب العربية في الغالب هيرفض ويقولك: إنك كدة بترخص عربيته، فالموضوع محتاج صبر منك وإنك تحسس إلا قدامك إنك مش مدلوق على العربية.
وعموما المستعمل وجع قلب، وعايز واحد صاحي وعنيه في وسط راسه، وكل واحد بياخد نصيبه. والأهم في القصة إنك تستخير وتستشير وما تستعجلش. وربنا يوفق الجميع.