مصر موتورز مجتمع السيارات - سؤال بخصوص ماستر الفرامل

مصر موتورز مجتمع السيارات (https://www.masrmotors.com/vb/index.php)

- منتدى الصيانة العام (https://www.masrmotors.com/vb/forumdisplay.php?f=4)

- - سؤال بخصوص ماستر الفرامل (https://www.masrmotors.com/vb/showthread.php?t=41776)

رد: سؤال بخصوص ماستر الفرامل

اقتباس:

و ضغت على البساتم و بقوا المخرجين بيخرجوا السائل بقوة فهل ممكن يكون دلوقتى بقى شغال كويس

ليه لا

جرب تركبه وتستعمل العربيه فى مكان هادىء وبعيد

عن الزحامات مع الحرص طبعا

فى التدرج فى السرعات وأستخدام الفرامل

إلى أن تطمئن على الآداء

لقيت الوضع تمام

يبقى سلكت والحمد لله

اقتباس:

و لو ممكن شرح مبسط ازاى البساتم ديه بتتحرك و من اين تستمد قوة الحركة بتاعتها لضغط الزيت

إن شاء الله

نبقى نعمل موضوع مبسط عن التشريح الداخلى لماستر الفرامل الرئيسى فى القسم التعليمى بالمنتدى

فى أقرب وقت .....وقريب بأذن الله

لأنه دقيق وحساس فى طريقة عمله

وعاوز تركيز صح

وبأذن الله نعمل الموضوع ده

رد: سؤال بخصوص ماستر الفرامل

متشكر يا هندسة على اهتمامك و متابعتك و لو ممكن شرح مبسط عن فكرة عمله على ما حضرتك تجهز الموضوع الكبير علشان انا محتار و خايف ارجع الماستر اللى انا جبته و ترجع المشكلة تانى فعشان كده انا عايز اعرف فكرته علشان اكون متاكد من اللى عندى بقى مضبوط و سامحنى يا هندسة ان كنت دوشتك بس انا مؤمن ان كل عيب و له حل لو فهمنا طريقة عمله مش زى ما معظم الميكانيكيا شغالين على اى عيب يبقى تغيير و هما مش خسرانين حاجة ماهو الزبون هو اللى هايدفع

رد: سؤال بخصوص ماستر الفرامل

فكرة عمله ببساطه شديده

قضيب واصل بدواسة الفرامل من خلال السيرفو

القضيب ده عليه بستمين ( ثانوى وأبتدائى )

وحول كل بستم رنج كاوتش لحبك كل بستم على قميص الماستر من الداخل ومنع التفويت

وطالما فيه بستمين

يبقى فيه منطقة سحب ومنطقة طرد لكل بستم

منطقة السحب لكل بستم بتكون لأعلى ( تحت تنك الزيت )

ومنطقة الطرد بتكون لأسفل ...لتغذية فردتين من الفرد الأربعه

أول مابدوس فرامل بتروح زاقق الرود أو القضيب إللى عليه البستمين

وهما واخدين زيت قدامهم وبيروحوا طاردين الزيت خلال مواسير الفرامل بقوه

بتتم بأه عملية توزيع الزيت على كل فردتين من مخرج بستم من البستمين

حسب تصميم دورة الفرامل

بمعنى

ممكن تلاقى مخرج البسنم الأبتدائى بيودى للفردتين الأمامين

ومخرج البستم الثانوى بيودى للفردتين الخلفيتين

وفيه تصاميم تانيه بتشتغل بطريقة الصليبه

بستم يودى لفرده أمامى وفرده خلفى ( شمال أمامى + خلفى يمين )

والبستم التانى للفردتين التانين

موضوع شبيه بالحقنه العاديه

بس الحقنه جواها بستم واحد

أنما ده جواه بستمين ( مع الفارق طبعا )

فطالما المخرجين بتوع الماستر بيطلعوا زيت صح وزى بعض

نظرا لوجود abs عندك

وكانت المشكله مخرج مسدود من الأول

أعتقد لوجربت وبحرص

حتلاقى الأمور بأت تمام

رد: سؤال بخصوص ماستر الفرامل

شكرا يا هندسة على الشرح المبسط و ادينى نظفت الماستر و القربة و جمعته تانى و هاجرب بكرة وان شاء الله يضبط علشان يوفر تمن الماستر اللى انا جبته

رد: سؤال بخصوص ماستر الفرامل

إن شاء الله

حتلاقى كله تمام