رد: عمرة محرك لانسر 98 - أريد معرفة آرائكم بارك الله فيكم
 

في إنتظارك أخانا الكريم
يسّر الله لك أمرك ..

رد: عمرة محرك لانسر 98 - أريد معرفة آرائكم بارك الله فيكم
 

حنحاول مع بعض نلخص الأمر ده دون الأسهاب الكتير فى الكلام

طالما فيه بوجيه بيعرق زيت

يبقى غرفة الحريق بتاعة البوجيه ده بيخشلها زيت من أحد أتجاهين

1- من خلال كاوتش الصباب من أعلى ( منطقة حوض التاكيهات )

2- شنبر زيت الغرفه دى بأه معيب وبيدخلها زيت وبيلوث البوجيه

طيب

نفرق أزاى بين الوضعين علشان نشتغل على نور

لو المكنه كانت بتاكل زيت كتير وبنلاقى الشكمان بيطلع دخان كثيف ومائل للزرقه

ومعدل أستهلاك الزيت كتير بدرجه ملفته للنظر

يبقى نشك بقوه فى حدوث تلف لشنبر زيت الغرفه دى

طيب

نفترض أن مفيش دخنه من الشكمان وشكل العادم عادى جدا ومعدل أستهلاك الزيت يكاد يكون غير ملحوظ

يبقى على طول نشك أن كاوتش الصباب هو السبب فى تلوث هذا البوجيه بالزيت

وممكن نحاول نرفع صوره لأيضاح دور كاوتش أو سيل الصباب فى عملية الحبك

من أعلى لمنع دخول زيت لأسفل

وجارى تجهيز صوره لأى محرك

كنوع من أخذ الفكره عن مكان ودور سيل الصباب فى محركات الأحتراق الداخلى

سواء كانت محركات بنزين أو محركات ديزل

رد: عمرة محرك لانسر 98 - أريد معرفة آرائكم بارك الله فيكم
 

http://i728.photobucket.com/albums/w...titled-102.jpg

دى رأس سلندر من راسين

بتوع مكنه 6 سلندر ( الرأسين على خط واحد )

لمكنه ديزل طراز فولفو بنتا

سيل الصباب ( كاوتش الصباب ) هو القطعه رقم 19 على الصوره ( حاجه كده شبه

الخاتم بس بلاستيك وليها سوسته من أعلى ) للحبك على ساق الصباب رقم 13 أو 14

طبعا السيل ده بيركب زى طربوش على قمة دليل الصباب المشحوط فى وش السلندر

الدليل هو القطعه رقم 4 بالصوره

على كل دليل بيكون فيه سيل زى ده لمنع الزيت من النزول من خلال الخلوص بين

ساق الصباب ودليله ( المشحوط بالرأس )

أثناء حركة الصباب التردديه لأعلى وأسفل والمحرك بيمر بأشواط حريقه الأربعه

رد: عمرة محرك لانسر 98 - أريد معرفة آرائكم بارك الله فيكم
 

على فكره

لو أتضح لك أن المشكله كاوتش صباب

بعد تحليل الوضع عندك حسب مابينت لك

فالتكلفه مش حتصل ل 300 ج

بكتيره أوى ( مصنعيه وقطع غيار )

______________________


ولو موعد تغيير سير الكاتينه قرب معاك

غيره بالمره وأنت حالل وش السلندر

حتزود فى الحاله دى كمان بتاع

قول 200 ج ( مثلا )

رد: عمرة محرك لانسر 98 - أريد معرفة آرائكم بارك الله فيكم
 

ما شاء الله عليك
ربنا يبارك فيك
بس لو تسمحلى سؤال:
احنا اخدنا في الكلية ان الصمامات دي ليها وقت معين للفتح ,ازاي الميكانيكي حيظبتها
اظن هو حيفضل يجرب لحد ماتظبط معاه صح؟
ولا فيه حاجة معينة بتحدد الوقت ده وتظبته؟
معلش تقلت عليك بس بجد انا بحب مجال السيارات
فلو كدا ابقا اخد عندك كورس في الصيانة GIFT4U