مصر موتورز مجتمع السيارات - مطلوب رايكم بسرعة

معلش أتأخرت على حضرتك أوى, بس أنا مدخلتش الأيام اللى فاتت خالص.

الأعضاء الكرام لخصوا الأمر فى عدة مشاركات, الجى أم سى جبارة فى كل حاجة وعربية أمريكانى رائعة, بس متنفعش لمصر للأسباب اللى الأعضاء قالوها, دى أندر من العربيات الأولدز موبيل والكابريس ومشفتهاش فى الشارع غير مرة واحدة بس, وده بيؤدى لمشكلة عدم توافر قطع غيار أو حتى خبرة ميكانيكية فى العربية, وأنها كمان كاربراتير ومش عايز أفاجئ حضرتك العربية بتنزل بتانك بنزين سعته 100 لتر مقارنة ب 45 للانوس مثلا, فالتفويلة مش هتقل عن 120 جنيه مرتين تلات مرات فى الأسبوع, وفيه منها بينزل بتانك سعته 120 لتر.

النوبيرا أستيشن فيها مميزات الكورى من أعتمادية وسهولة تصليح وقطع غيار وهكذا, عيبها اللى انا شايفه شكلها وحش جدا, بس بعيدا عن العيب ده فهى كويسة قوى وواسعة جدا, وعربية عائلية رائعة, بس النوبيرا 2 الأستيشن والسيدان عندى أحسن منها, الأستيشن علشان الشكل, والسيدان برضه علشان الشكل والفخامة.

سعر النوبيرا وان السيدان حوالى 40000 الى 43000 جنيه, فهفتى وأقول الأستيشن هتبقى فى نفس الرينج لحد 45000 لأنها متفرقش فى مكوناتها عن السيدان فى حاجة.

والبنزينة للأسف معرفش خالص حد عند الكلية الحربية, فياريت حد من الاعضاء يفيد حضرتك أكثر منى.

الخلاصة, الجى أم سى متنفعش بتاتا, النوبيرا شكلها وحش بس عربية كويسة وسعرها حلو, لو عاجبة حضرتك توكل على الله, بس لو مقلق ممكن تدور على أختيار تانى, بس للأسف مش هيبقى فى نفس السعر او المميزات.

وبتأسف تانى على التأخير, انا داخل صدفة وخارج ولسه شايف رسائل حضرتك, سامحنى :)