رد: طلب نصيحة و تسعير شراء كابريس كلاسيك موديل 1983
 

اخى الفاضل
فكر فى حاجه واحده ,,مش هقولك قطع غيار وصيانه لكن فكر لو وش فانوس اتكسر منك وده طبيعى بسبب حجم العربيه فكر فى اللف الى هتلفه علشان تلاقى وش فانوس وحتى لو افترضنا ان فيه واحد فى القاهره ,,هتروح القاهره وانت من اليكس؟؟طيب ليه كل ده
انا عارف العربيه ممتازه واسعه جدا لدرجة ان الواحد ممكن يعيش فيها وصالون وفخامه وكماليات وماتور غول وعربيه بمعنى الكلمه بس هى غير مناسبه لشوارعنا ولا للصنايعيه بتوعنا ولا قطع غيار ..فيا فرحتى بكل بده وهى واقفه جمبى ولما احب اخلص منها مش هعرف
هى ممكن تكون مناسبه لو جيت بسعر واقع وماتكونش هى العربيه الاساسيه فى البيت يعنى فيها عربيه تانيه للمشواير والهلك ودى مثلا للسفريات البعيده

رد: طلب نصيحة و تسعير شراء كابريس كلاسيك موديل 1983
 

بس فية حاجة ان العربية دى غاز واللى انا اعرفة ان العربية عشان تتحول غاز لازم يكون الماتور بحالة ممتازة يبقى مشكلة الماتور محلولة بس بعد كام سنة لازم الماتور حيتغير اية الحل ياترى حيلاقى ماتور ؟؟؟؟؟
خلية يفكر الف مرة

رد: طلب نصيحة و تسعير شراء كابريس كلاسيك موديل 1983
 

مفيش كلام بعد اللى قالوه الاخوه هنا
وفعلا الحجم ده صعب سواقته دلوقتى هنا فى مصر المحروسه

رد: طلب نصيحة و تسعير شراء كابريس كلاسيك موديل 1983
 

أنا رأيى أننا كلنا هنا كأعضاء فى المنتدى لازم نتكاتف و نعمل كل اللى فى وسعنا عشان نمنع أن نسيبك يجيب العربية دى بأى شكل , حتى لو اضطر الأمر أننا نجيب حكم من المحكمة ببطلان البيعة دة .

شيفورليه كابريس مو 1983؟؟؟؟؟؟

يا خبر أسود!!!!!!!

دا مثلا, السعودية اللى هى كانت أكبر مستورد للشيفروليه الكابريس على مر العصور و الأزمنة , لو حبيت تدور فيها على قطعة غيار للعربية دى , مش هتلاقى , تقوم تقوللى العربية قطع غيارها متوافرة هنا و بسعر رخيص كمان , بلااااااااااااااااااش السعودية , أنا أراهنك أنه لو واحد معاه العربية دى فى أميركا و احتاجلها قطعة غيار هناك , غالبا مش هيلاقيها .

فكرتنى بمرة كنت ماشى فيها فى سوق السيارات اللى فى مدينة نصر و كان فيه واحد معاه عربية تقريبا فولكس فاجن باسات مو 1984 , حاجة زى كده, عربي هاتشباك هيه , المهم , اللى بيشترى بيقول للبياع , مش دى قطع غيارها مش موجودة , قام البياع قاله, لا و لايهمك, أنا عندى قطع غيار كتير ليها, هديهالك فوق البيعة !!!!!!!!!!!, يعنى أنا مثلا أشترى العربية و معاها طرمبة بنزين احتياطى اللى هى أكيد استيراد مش جديدة, ولما تبوظ الطرمبة اللى فيها, أركب التانية , اللى هى استيراد و لما تبوظ , أجيب حصيرة و أفرش جمب العربية و أغنى ظلموه.

قال كابريس قال .

رد: طلب نصيحة و تسعير شراء كابريس كلاسيك موديل 1983
 

السلام عليكم استاذ علي
انا رأيي من رأيي باقي الشباب
الفيصل في الشراء هو تواجد قطع الغيار و اسعارها
و ملائمه العربيه لقريبك من حيث الوسع و الركنه (جايز يكون عنده جراج)
انما الكابريس كعربيه لا غبار عليها و عربيه معمره جدا
و صعب انك تلاقي فيها فانوس مكسور او حاجه من هذا لاقبل الا لو مقطوره طلعت فوقيها:)
الاتوماتيك بتاعها برضه كويس و لو الفتيس كويس يبقي مش حتلاقي له مشاكل لان الامريكاني معمر جدا في الجير بتاعه.
خلي قريبك يستخير و يشوف قطع الغيار نظامها ايه من المحل اللي صاحب العربيه بيقول عليه.
و بعدها يتوكل علي الله و يشوف هو ناوي علي ايه