مصر موتورز مجتمع السيارات - عندى مشاكل فى عربيتى الانوس ارجو منكم الرد للأهمية

فيه نوعين رشاشات يركبوا عندك, الأول بتاع الهيونداى الأكسنت وده هيقلل أستهلاك البنزين بس هيخنق العربية شوية ويقلل السحب, والنوع التانى بتاع المكنة البى أم m40 وده هيرفع السحب جامد ويقلل زمن الدوارة بس مع زياده فى أستهلاك البنزين عن الرشاشات الأصلية.

البى أم بحوالى 200 جنيه والهيونداى ب 140 الى 180 .

البى أم من عند المتحدة فى الحرفيين.

اقتباس:

كنت بشتكى من الاعراض الاتيه و هى ...

عدم سهولة الدواره و العربيه نص بارده .... يعنى مثلا بعد ربع ساعه من وقت ما طفيتها ... لازم ادورها كذا مره عشان تدور و ساعات بحتاج كمان ادوس بنزين ....
وكمان ريحة الحريق نى فى اول الدواره مع وجود دفعة دخان كمان....

المهم بعد السؤال ... اتضحلى انه عيب رشاشات ..... يعنى ايه رشاشات ؟؟
الرشاش ده عباره عن حاجه شبه القلم كده مسئوله عن رش البنزين داخل غرفة المانيفول لخلطه بالهواء ثم دخوله غرفة الاحتراق .... نظام كده شبه كربراتير العربيات القديمه .... و ادى صورة الرشاش اهى .....

http://i864.photobucket.com/albums/a...ulInjector.jpg

========================= ========================= =====

كيف تعمل الرشاشات؟

الرشاشات فكره عملها سهله جدا بس الشرح هو إلي صعب بدون صوره فرسمتلكوا صوره توضيحيه ليها.

http://i864.photobucket.com/albums/a...lustration.jpg

1. فتحة دخول البنزين
2. كهرومغناطيس
3. فتحة خروج البنزين
4. سوسته فتح و غلق البستم
5. مصدر كهرباء
6. بستم

أول ما الرشاش ياخد أمر من كومبيوتر السياره انه يرش بنزين, مصدر الكهرباء يبعت كهرباء للكهرومغناطيس فيشد البستم للخلف, فبيسمح للبنزين بالمرور في فتره ما البستم مفتوح و بعد ما تكون كميه البنزين المطلوبه دخلت, بيقطع المصدر الكهربائي الكهرباء عن الكهرومغناطيس فبيخلي البستم يقفل تاني و بيعطل مرور اي كميه بنزين إضافية.

يقوم الرشاش برش البنزين على شكل ذرات و ذلك لجعل عملية حرق البنزين تتم بصوره أفضل و أسهل.

مميزاته: يمتاز الحقن الإلكتروني (الإنجكشن) بتوفير استهلاكه للبنزين حيث انه يقوم برش الكميه المطلوبه فقط من البنزين و بنسب معينه تم حسابها مسبقا بناء على بعض العوامل الرياضيه التي تحدد نسبه الهواء للبنزين في وحده تحكم المحرك (ECU). و تمتاز أيضا محركات الحقن بصوتها الأهدى من مثيلاتها الكاربيراتير. الحقن أيضا اسرع إستجابه من الكاربيراتير, و لا يجعل السياره تشرق, لماذا؟ لأن كما قلت يقوم برش النسبه المطلوبه من البنزين و أيضا لأن الرشاشات لن تعمل و السياره مغلقة عكس الكاربيراتير فبمجرد الضغط على دواسه البنزين فهو يرش البنزين غير عابىء بالكمية قليله ام كثيره.

عيوبه: تكلفة إنتاجه تكون مرتفعه عن إنتاج الكاربيراتير, فبالتالي تصبح السياره أعلى من نظيراتها الكربيراتير, أيضا صيانته تحتاج دقه و مهارة عاليه لا تؤهل الميكانيكيين باللعب فيه, فالكشف على الرشاشات يكون عن طريق الكمبيوتر. و غالبا ما تنسد الرشاشات بسبب وجود الشوائب الكثيره في البنزين عامة و المصري خاصة[IMG]http://www.**********.net/Nile/images/smile2/msn-wink.gif[/IMG] لذا ينصح بتغير فلتر البنزين كل فترة, 5000 كم كحد أدنى و 10,000 كم كحد أقصى للحفاظ على الرشاشات نظيفة.
========================= ========================= ======

طيب ايه هو عيب الرشاشات دى .... قالك بتسيل ... يعنى ايه بتسيل ؟ ... يعنى بعد ما العربيه بتنطفى ... البنزين الى فى دورة الوقود قبل الرشاشات بينزل على مانيفولد السحب ... فا العربيه عامله زى متكون شرقانه بنزين ... عشان كده بتغيب فى الدواره .... حد يصححنى يا اخوانا لو انا غلطان ....

طب و الرشاشات دى راكبه فين فى العربيه ..... الصوره خير من الوصف .... اهوه ...

http://i864.photobucket.com/albums/a...sEngineBay.jpg

و الجزء الفضى الى راكب عليه الرشاش بالجسم الاسطوانى الكبير ده يبفى اسمه مانيفولد السحب ...

طيب قلت انضفهم بالسائل الى بيتحط على البنزين ده .... جبت نوع المفروض انه نضيف اوى اسمه "Gunk Injector and Carbeurator Cleaner" و ادى صورة العلبه ...

http://i864.photobucket.com/albums/a...viser/Gunk.jpg

المهم .... حطيت علبتين منه على تانك متفول .... و مشيت بالعربيه لحد ما التانك فضى .... مفيش تغيير ولا حتى تحسن ....

قولت اعمل بنصيحة الاخ محمد ممدوح و اغير رشاشات العربيه لرشاشات المحرك
"BMW M40 - 1600 cc"
و هما من نوع اسمه "Bosch" و ده المانى .... و ادى صورته عشان و انت رايح تشترى تبقى عارف انت رايح تجيب ايه .....

http://i864.photobucket.com/albums/a...chInjector.jpg

طب اشمعنى النوع ده .. اقولك عشان الاصلى بتوعها بيبوظو على 40,000 كم حسب تجربة الاخ محمد ممدوح و هو كان جايبهم اصليين .... تمنهم دلوقتى 1000 جنيه جداد ... و على فكره مش بيتنضفوا بالالتراسونيك "Ultrasonic Waves" حسب كلام الفنى .... يعنى بيترمو من الآخر ....

و على فكره فى ناس بيركبو رشاشات الهيونداى و دول شبه البوش برده بس صناعه كورى مش المانى .... و بيقولو بيوفرو فى البنزين عن رشاشات البى ام ... بس بيخنقو العربيه شويه ... و همه جداد بحوالى 750 جنيه و استعمال حوالى 300 جنيه ...

المهم انا قولت اعمل زى ممدوح لانه بقاله سنتين مركب رشاشات البى ام و مستريح معاهم .... و انا اشتريتهم ب 180 جنيه من عند محل " المتحده بورسعيد" فى منطقة "الحرفيين"

حد هيسأل فين الحرفيين دى .... اقولوكم ....
لو انت على يمين الملعب ..... مش هتشوف حاجه ... ههههههه
مش عارف ليه حاسس انى بعلق على ماتش كوره [IMG]http://www.**********.net/Nile/images/smilies/C_laugh%5B1%5D.gif[/IMG]
المهم .... افضل وصف للطريق و صفه الاخ العزيز سبعاوى ....

وصف sab3aawy - إستشارى المنتدى لقسمى الورشة والتعليمي - بتصرف
========================= =============
الحرفيين فى أول طريق الإسماعيلية،

يمكن الوصول للحرفيين من الطريق الدائرى، لو احنا جايين على الدايرى من الهرم او المهندسين او مصر اسكندرية الزراعى فى اتجاه مدينة نصر والمعادى،بعد ما نعدى تقاطع المرج بحوالى 12 كيلو تقريبا بنوصل عند نفق طريق الإسماعيلية الصحراوى مننزلوش وناخد يمين ونطلع فى طريق القاهرة الإسماعيلية الصحراوى فى اتجاه القاهرة، بنمشى حاجة كدة زى 2كيلومتر هنلاقى كوبرى الحرفيين "بيسموه برضه كوبرى الهايكستب" ، منطلعش الكوبرى وناخد اول يمين بعديه ، هنلاقى نفسنا فى مدخل الحرفيين - شارع جمال عبد الناصر

لو جاى على الدائرى من مدينة نصر او المعادى او المنيب تفضل ماشى لحد ما توصل لنزلة طريق الإسماعيلية الصحراوى ، انزل النزله و هتبقى فى طريق الإسماعيلية فى اتجاه الإسماعيلية، خد اول يو تيرن وارجع فى اتجاه الفاهرة ، تمشى حاجة كدة زى 3-4 كيلومتر هنلاقى كوبرى الحرفيين "بيسموه برضه كوبرى الهايكستب" ، متطلعش الكوبرى وتاخد اول يمين بعديه ، هتلاقى نفسك فى مدخل الحرفيين - شارع جمال عبد الناصر

ممكن تيجى من طريق صلاح سالم فى اتجاه المطار، تطلع كوبرى شيراتون "ساعات بيسموه كوبرى المطار" وتننزل من المنزل الشمال "منزل طريق الاسماعيليه الصحراوى" هيبقى على يمينك سور المطار وشمالك سور الكلية الحربية، بعد كدة هتلف يمين إجبارى مع سور المطار فى شارع جوزيف تيتو، اللى فيه السندباد وبعديها بحوالى كيلو بتروجت، كمل فى جوزيف تيتو لحد ما يخلص هتلاقى قدامك كوبرى الحرفيين، متطلعش الكوبرى... لف من تحتية شمال و ارجع اكنك داخل جسر السويس وتاخد اول يمين بعد ما تلف ، هتلاقى نفسك فى مدخل الحرفيين - شارع جمال عبد الناصر

لمن لديه جى بى إس ، احداثيات مدينة الحرفيين: 30.08.47 N و 31.24.09 E

و ادى خريطه من عندى كمان ....

http://i864.photobucket.com/albums/a...afeyeenmap.jpg

تمام كده ؟؟؟ عارف عارف .... هلاقى واحد بيسأل فين محل "المتحده بورسعيد" ده ...
اقولك يا سيدى ..... بعد متدخل الحرفيين الى هو شارع جمال عبد الناصر .... كمل قدام بتاع 100 متر كده ... و بص على الشمال كده ... فى محل بتاع زجاج سيارات .... اسمه "الثلاثى" ... ايوه هوه اسمه كده ... انا مالى ... بعد متبقى جمبه كمل قدام كمان كام خطوه كده هتلاقى شارع يمينك .... متدخلوش ... ههههه
ادخل الشارع الى بعده ..... الشارع مليان محلات قطع غيار لكل اشكال و انواع العربيات و جديد و استيراد و كله ......
امشى قدام و اسأل على "المتحده بورسعيد لقطع غيار البى ام استيراد" .... هوه قدام بتاع 150 متر و على اليمين .... و هتلاقى قدامه كذا ربع امامى بى ام ....

انا خدت منه اربع رشاشات و حسبهملى ب 180 جنيه بعد الفصال .... كان طالب 200 ... و خدتهم على تجربه ...

المهم يا سيدى ..... خدت الرشاشات و بقيت محتاس ...... طب اعمل فيهم ايه دول .....
يا جدعان مفيش هنا حد بيقيس الرشاشات و بينضفهم ..... قالك اه فى .... قولت ها فين يا عم .... قالى كمل قدام كده لحد متلاقى فسحه كبيره خليك مكمل هتلاقى صنايعيه كتير هناك .... افضل ماشى لحد متلاقى كابينة رش سيارات "فرن رش يعنى" بتاع الرشاشات جمبيها علطول .... هوه قبل آخر الشارع بتاع 30 متر كده و على الشمال هوه .....

رحت عند الراجل .... و خد الرشاشات قاسهم .... طلعو اتنين كويسين جدا نوفى و اتنين يعنى كويسين بس عاوزين يتنضفوا .... قالى انضفلك الاتنين دول ... قولتله لا نضف الاربعه .... قعد بتاع تلت ساعه كده بينضف فيهم على جهاز الالتراسونيك .... و بعدين قام قايسهم تانى ....لاقينا كده كله تمام .... و على فكره كان بيشرحلى هوه بيعمل ايه .... و شكله مهندس لانه كان بيتكلم انجليزى كويس و مثقف يعنى و فاهم شغله كويس ..... خلاص خلص .... قلتله حسابنا كام قلى 200 جنيه .... طبعا انا عمرى ما نضفت رشاشات قبل كده و لا اعرف بيتنضفو بكام .... فا ياريت حد يقولى ان كان كده السعر كويس ولا ايه ..... و عرفت منه انه برضه بيبيع رشاشات و بيبعها متنضفه جاهز و بيدى عليها ضمان ستة اشهر .... ب 500 جنيه الاربعه .....

و رحت واخد الرشاشات و روحت طالع على الميكانيكى بتاعى .... على فكره ممكن تركبهم عند اى ميكانيكى هناك "فى واحد اسمه عبده فى اخر الشارع" .... وخلى بالك و هوه بيركب يحط زيت على الجوانات بتاعت الرشاش عشان متتقطعشى و هى بتركب ....

و بكده رحت مروح بقه لانى كنت خلصت خلاص ..... و لسه مجربتش العربيه غير فى المشوار من الميكانيكى للبيت ..... بس حسيت انها مظبوطه و كويسه عادى يعنى .... لسه بقى هشوف ايه اخبار الرشاشات الجديده و اكيد ان شاء الله هقولكم على النتيجه ....

اتمنى انكم تكونو استفدتم و اكون جاوبت على قد مقدر على استفسارتكم فى موضوع الرشاشات ده ...

اشوفكم على خير فى المقابله انهارده ان شاء الله ...

MMamdouh

nah, just kidding, hands up for the daewoo master