رد: عيوب هيونداى اى 10؟؟؟؟؟؟؟؟؟
 

موضوع ومشاركات اكثر من رائعة
انا عايز اشترى البيكانتو
اتفرجت على العربيتين وشايف ان البيكانتو اعرض شوية من الاى تن لو وقفت ورا العربيتين هتلاحظ الفرق البسيط وسمعت ان البيكانتو اثبت على الطريق كمان
فهل الكلام دة مظبوط رغم ان المقاسات المكتوبة فى مواصفات العربيتين انهم نفس العرض
وسمعت ان الصاج اقوى شوية من الاى تن
تانى حاجة موضوع لمبة الحرارة دة مش مطمئن خالص
انا معايا اوبل كورسا وقبل كدة ساعة الحرارة باظت واللى بينلى عداد الحرارة
وقبل كدة المروحة كان السلك بيعلق وكانت ساعات تطفى وساعات تشتغل بمزاجها واللى بينلى عداد الحرارة
والحمد لله كنت بلحق العربية قبل العلامة الحمرا
دلوقت انا عايز اشترى بيكانتو والعقبة الوحيدة اللى محيرانى موضوع اللمبة بدل عداد الحرارة
وهل لما تشتغل يبقى خلاص العربية على اخرها ولا زم اقف فورا ولا فى مدة امان بعد ما تشتغل اللمبة
ارجو الافادة من اللى جرب او سمع من حد مجرب
هل تصلح هذة السيارات للسفر مثلا 300 كيلو اسبوعيا
وشكرا جدا معلش طولت عليكوووووووووووو

رد: عيوب هيونداى اى 10؟؟؟؟؟؟؟؟؟
 

الاي 10 عيبها الجوهري نقص قطع غيارها ( عدم توافرها ) و ارتفعا سعرها جدا مقارنة بالفيرنا و الالنترا حتى!! ( مقاربة لاسعار قطع غيار الماتريكس و الجيتز)

رد: عيوب هيونداى اى 10؟؟؟؟؟؟؟؟؟
 

اللهم احفظ بناتنا ونسائنا فى كل مكان من شياطين الانس :playing_music:

رد: عيوب هيونداى اى 10؟؟؟؟؟؟؟؟؟
 

يا باشا الأى تن عربية خروجات و كلية فقط
إنما جرى و هرى و تخميس يبقى فيرنا أو أكسنت أو i20
سفر كتير يبقى أى حاجة إلا الفيرنا علشان الأمان و طبعاً لو هتسافر كتير بالi10 فمانصحكش لإن الموتور 1100 يعنى سنة فى السفر الكتير و حتلاقية تعبان
لو السفر خفيف فمفيش مشكلة بس أخرك إسكندرية (ولازم تريح فى النص)
طبعاً العربية واخدة أعلى نجوم فى الأمان فى فئتها من مركز سلامة القيادة و الطرق الأوروبية
عيبها الوحيد اللى مالوش حل: غالية أوى على الفئة بتاعتها و قطع غيارها ... ناااار

رد: عيوب هيونداى اى 10؟؟؟؟؟؟؟؟؟
 

بص يا سيدي

أولا:موضوع عداد الحرارة انا شايف ان مفيش مشكلة انها لمبة بس ، كان معانا أونو فيها لمبة بس و المرة الوحيدة اللي سخنت نورت تمام بس لما تنور لا قدر الله لازم تقف فورا و تشوف ايه المشكلة و علي فكرة النيو اكسنت برضه فيها لمبة بس انا بتكلم علي موديل 2008 ماعرفش الجديد و علي فكرة برضه علي معلوماتي ان ال i10 2011 برضه هيبقي فيها لمبة بس لان دلوقتي الهاف أوبشن هتنزل ب عداد rpm و ده مكانش موجود في 2010 فدي مش مشكلة خالص ان شاء الله.

الحاجة التانية موضوع الشكل انا كان رأيي انه لحد موديل 2010 شكل البيكانتو احسن كتير لكن دلوقتي شكل ال ‏i10 موديل 2011 احسن ألف مرة من بيكانتو .

ثالثا موضوع قطع الغيار انا معرفش اوي لكن سمعت فعلا انها غالية بس علي فكرة طبيعي انها دلوقتي تكون اغلي من بيكانتو لأن زي ما حضرتك عارف البيكانتو بتنزل من 2004 لكن هيونداي اولها 2008 فجايز ترخص مع الوقت ، هو طبعا كله بأمر الله و محدش ضامن الظروف لكن لو حضرتك جبت i10جديدة ف ان شاء الله مش هتحتاج قطع غيار قبل 3 أو 4 سنين علي الأقل ما عدا طبعا الفلاتر و البوجيهات و كده و دي مش غالية في ال i10 عن باقي موديلات الهيونداي

رابعا بالنسبة للسعر انا معاك انها دلوقتي اغلي من فئتها هي أولها 63500 و البيكانتو 61500 تقريبا بس ده في موديل 2011 الجديد بس قبل كده كانو زي بعض

خامسا لو بتفكر في الفئة دي ف دول افضل عربيتين و بيدخل معاهم punto classic مع الوضع في الاعتبار انها اوروبي و ده معناه طبعا كفاءة احسن بكتير بس معناه برضه اولا تكلفة توكيل اعلي بكتير و انا هنا أقصد حتي تكلفة الصيانة العادية من غير قطع ولا حاجة و برضه معنا resale او سعر اعادة بيع أقل بكتير من هيودانداي او كيا و طبعا سعر اعادة بيع i10 اعلي شوية من بيكانتو لأنك لو اشتريت دلوقتي هتشتري شكل جديد لكن اسمع ان شكل بيكانتو الجديد هينزل 2012

بص انا ماشوفتش سبارك بس اسمع من ناس جربوها انها مش كويسة و برغم اسم منصور الكبير الا ان الشكاوي منه اكتر كتير من غبور و من نصير رغم مساوئهم

الحاجة اللي انا متأكد منها مليون في المية هي ان فعلا الجديد جديييييييييد بتشتري حاجة ضامنها و ياما ناس اشترت مستعمل نضيف جدا و طلع فيه عيوب ، نصيحة لو معاك تمن عربية جديدة مهما كانت حتي لو ماروتي ابعد عن المستعمل قد ما تقدر

موضوع السفر مقدرش افيدك فيه الصراحة انت مقولتش هتسافر قد ايه لكن لو مثلا بتسافر مرة في الاسبوع مثلا فافتكر ان البيكانتو و i10 مناسبين و خد بالك فرق البنزين بينهم و بين الفيرنا مثلا الi10 علي الطريق بتعمل حوالي 4.8 إو 5 لتر في 100كيلو يعني 400 كيلو في الصفيحة لكن فيرنا بقي ربنا يعينك عليها

انا الحقيقة العيب الوحيد اللي شايفه في بيكانتو و i10 هو الشنطة الصغيرة و ان كانت بتاعةi10 اكبر حاجة بسيطة آه علي فكرة استبن ال i10 زي الكاوتش الأصلي لكن بيكانتو الرفيع بتاع 80 كيلو ده و لكن شكل طاسات البيكانتو 2011 احلي بكتير ، برضه خد بالك البيكانتو بتنزل من غير كاسيت لكن ال i10 فيها كاسيت معقول و علي فكرة هو اتغير في 2011 و اتحسن و بقي فيه مكان ل usb

أخيرا و ليس آخرا عليك بصلاة الاستخارة دي اهم حاجة اعملها و توكل علي الله فيما انت ماض فيه و لو مفهوش خير ربنا هيبعدك عنه ان شاء الله


اتمني اكون افدتك