مصر موتورز مجتمع السيارات - كل اللى بيفهم فى السينا يخوش

عمر باشا ...
كانت معايا سيينا 1400 موديل 2000
مبدئيا العربيه كأداء ناعمه و سحبها حلو والفتيس سلس جدا
تسارع اولي كويس لحد 100 - 110 و بعد كده يقل وممكن تجيب 170 - 180 حسب الطريق
الثبات معقول لكن توزيع الوزن اغلبه قدام علشان الحوض صغير وكمان الشنطه طويله وبالتالي تبقى حريص بس في الملفات السريعه
شنطه اكبر من شنطه اي عربيه في الفئه بتاعتها 500 لتر
لكن ده على حساب الصالون .. الكنبه ضهرها واقف و اي حد كبير يقعد ورا حتبقى ركبه في ضهر اللي سايق الا اذا طلعت الكرسي لقدام اوي
ال 1600 بتخنق الميكانيكيه علشان الحوض صغير وبالتالي بيضايقهم في الشغل
ده غير ان ال 1600 انجكشن و معقده اكتر ... طبعا موتور اقوى لكن تصليحها اصعب
ال 1400 مش كاربيراتير ولكن اسمه مونو انجكشن .... لكنه اسهل بكتير من ال 1600
قطع الغيار موجوده و مقدرش افيدك اوي دلوقتي اسعارها ايه لأني بعتها من 3 سنين
لكن حتلاقيها بسهوله في الكيلاني واسعارها معقوله (لكن مش حتبقى بانتشار و سعر الانوس مثلا )
المشكله بتكون في الاكسسوارات (مقبض باب - شراعه بلاستك للازاز الخلفي - وكده .. ) دي اللي ممكن تلف عليها شويه و تلاقي تفاوت في اسعارها ... دوخت على مقبض باب امامي شمال ..الاصلي كان ب 110 ومش نفس اللون و التركي ارخص وفضي و في الاخر لقيته ب 75 جنيه نفس اللون ... في حين ان مقبض البرايد مثلا كان ب 15 جنيه !!
بس ده مقبض و ده مقبض تاني خالص

السيينا من 2000 ل 2004 تقفيل مصري وبالتالي حتلاقي عيوب التقفيل المصري التقليديه ( كاوتش باب مش متثبت كويس - حاجه بلاستك ضعيفه شويه - ...)
لكن اساسايات العربيه كويسه ومحترمه
رأيي الشخصي ... انا كنت بحب العربيه دي و بفضلها عن الانوس و الاكسنت اللي يعتبرو من نفس فئتها
لكنها للاسف محققتش انتشارهم و لا عليها طلب زيهم ....
وتغيير الوكيل و نزول الصيني منها حاليا قضى على اي فرصه لاستمرار الزيرو منها بعكس الانوس اللي مستمره لحد النهارده
وبالتالي طبيعي ان الناس تفضل الانوس عنها
في ناس تفضل الانتشار و ناس تفضل التميز ... لكن اهم من ده كله الحاله
لو عايز تبقى في المضمون و تجيب زي الناس ... دور على اكسنت او لانوس
لكن لو لقيت سيينا 1400 بحاله كويسه ... استخير ربنا وتوكل عليه فيها ... لحد النهارده بيعجبني شكلها وبحسها مميزه ...
للأسف معرفش حد في فيصل ... لكن التصليح العادي مش حتغلب فيه و لو احتاج الامر متهيألي في مركز صيانه معتمد لاوماترا في شارع العريش ( بس انا مجربتوش لأني كنت بعمل الصيانه في مركز اخبار اليوم بأكتوبر )

اتمنى اكون افدت حضرتك وربنا يوفقك ان شاء الله في احسن عربيه .. سواء كانت سيينا او غيرها :)